Talu mai le aso Gafua na te’a nei, ua maitauina le fa’aitiitia o le pipisi solo i totonu o le atunu’u o le siama o lo o feavea’iina le gasegase o le ‘Manava Tata’, po o le ‘Diarrhea’ i le gagna fa’aperetania, e pei ona fa’amaonia mai e le Fa’atonusili o le Matagaluega o le Soifua Maloloina i le Samoa News, le tofa Motusa T. Nua.

Na taua e Motusa i se talanoaga ma le Samoa News e fa’apea, o asiasiga, fautuaga ma aoaoga o lo o tu’uina atu e le Matagaluega fa’apea ai le falema’i i le atunu’u, i auala e puipuia ai aiga mai le a’afia i lenei fa’ama’i, o le isi lea auala ua mautinoa le fesoasoani e fa’aitiitia le pipisi solo atu o le fa’ama’i i afioaga ma nofoaga e le i o o atu i ai.

“O ripoti ua maua mai e lo’u ofisa mai sui o le Matagaluega o lo o ta’amilo i tua i afioaga ma aiga, ua vavala mai ai le fa’aitiitia o le pipisi atu o le fa’ama’i, ma o se tala fiafia lea mo le atunu’u atoa,” o se vaega lea o le saunoaga a Motusa.

Na taua e le ali’i fa’atonu le vave tele o le pipisi o le fa’ama’i o le Manava Tata i totonu o le atunu’u, ona e na o le masina lava o Me lea na molimauina ai le pipisi o le fa’ama’i, ae a’afia ai le to’a 165 tagata mai afioaga e 22 i le motu o Tutuila nei, lea e aofia ai ma le to’afa na a’afia mai i le motu o Ta’u, Manu’a.

“O lo o fa’aauau pea le tautua a le Matagaluega e ala i le tu’uina atu o fautuaga i le atunu’u atoa, ina ia tu mama ma taumafai e fa’aleleia vaega uma o lo o kuka ai meaai i totonu o fale.”

Na taua e Motusa lona maofa tele i le ripoti sa tu’uina mai e ni isi o lana aufaigaluega o lo o asiasi i tua i aiga, i le mata’utia o vaaiga eseese o lo o molimauina i ni isi o aiga na a’afia o latou tagata i le fa’ama’i lenei, i vaega e nonofo ai tagata, o nofoaga e kuka ai meaai, atoa ai ma le ituaiga olaga o lo o ola ai tagata nei i totonu o latou aiga.

Saunoa le ali’i Fa’atonusili e fa’apea, afai e le suia le ituaiga olaga e soifua ma ola ai tagata nei, tusa lava pe malosi aoaoga ma galuega a le Matagaluega e fautuaina ai i latou ina ia saoloto mai le fa’ama’i, e le mafai ona taofia le toe a’afia fo’i o i latou nei i se isi taimi o i luma, pe afai o le ituaiga olaga lava lenei e ola ai i latou i tua i aiga.

“O le fautuaga mo aiga na a’afia, sui nei le ituaiga soifuaga e ola ai lou aiga, fa’aaoga fautuaga ua tu’uina atu e sui o le Matagaluega, ae mo afioaga e le i o o atu i ai le fa’ama’i fa’apea ai aiga e le i a’afia e aofia ai ma isi motu o Manu’a ma le motu o Aunu’u, tumau i le tu mama, puipui lou aiga ma le ono a’afia i le siama o lo o feavea’iina lenei fa’ama’i, aua e sili lava le puipuia nai lo le tau togafitia.”