O le fa’aitiitia o le aofa’i o turisi ua fa’amauina na asia Amerika Samoa i le tausaga na te’a nei 2014 i le aofa’i e 5,099, fa’atusatusa i le 5,130 i le 2013 ma le 5,427 i le 2012, ua a’e ai se finagalo i le faigamalo, ua tatau ona tu tu fa’atasi ma pisinisi tua e una’i ma fa’aleleia le atina’e tau turisi i le atunu’u

O ni isi o auala ua manatu le malo e tatau ona fa’aleleia i le taimi nei ina ia foia ai le fa’aitiitia o le aofa’i o turisi e malaga asiasi mai i le atunu’u, e le gata ia fa’atosina e le malo fonotaga mo atina’e tau turisi ia faia mai i Amerika Samoa ina ia tupu ai le itu tau i le tamaoaiga, ae ua tatau fo’i ona lelei auala e faalauiloa ai faletalimalo tetele ma fale talimalo laiti i pepa o lo o fa’asalalau i fafo atu o Amerika Samoa, ina ia silafia ai e le lalolagi tala fa’aopoopo e fa’atatau ia Amerika Samoa.

“O le fa’aitiitia o le aofa’i o turisi ua faamauina le malaga asiasi mai i le atunu’u, ua a’e ai se finagalo i le malo ina ia vaavaai i ni isi auala fou e mafai ai ona fa’atosina ni isi kamupani va’alele e fesoasoani i auala o femalagaaiga, ona o lea ua tele talosaga ua tu’uina atu i le feterale, ina ia fa’aagafua a latou tulafono mo femalagaaiga, ae fa’ataga ai va’alele mai kamupani va’alele tua e faimalaga i le teritori, ae foliga mai e le o i ai lava se tali maoti o aliali mai”, o se vaega lea o le ripoti a le faigamalo lea ua tu’u atu i le Fono Faitulafono.

E le gata i le fa’aitiitia o turisi malaga asiasi mai i le atunu’u, ae o lo o maitauina fo’i le fa’aitiitia o tupe o lo o maua mai ai.

O le tausaga e 2011, e $2,361,150 na maua e le malo i turisi malaga mai i le atunu’u; o le 2012 e $2,308,500, ma le 2013 e $2,294.550.

O gaioiga o lo o fa’agasolo i le taimi nei e pei o le tauvaga a le ‘Tisa’s Tattoo Festival’ lea e fa’ataunu’u i tausaga ta’itasi, o se tasi lea o auala o lo o fesoasoani malosi i le fa’atosinaina mai o turisi i le atunu’u, peita’i e manatu le malo, e tatau lava ona tele ni isi polokalame fa’apea ina ia unaia ai pea lagona o tagata tafafao e aga’i mai i Amerika Samoa.

O le isi fuafuaga lea ua manatu i ai le malo, o le toe fausiaina lea o le vaega e alu ai le Ato i luga o le mauga, ‘Mt. Alava Tramway’ sa avea ma mataaga manaia mo turisi i tausaga ua mavae, ina ia mafai ai ona toe fa’atosina mai turisi i le teritori.

Ua i ai le fuafuaga a le malo, e le o toe umi se taimi o lo o totoe ona tatalaina loa lea i lalo o le isi vaega o le fale talimalo tuai a le Rainmaker Hotel i Utulei o lo o totoe, ae tu’uina atu le galuega e tau ofo mo le fausiaina o se isi fale talimalo fou.

Ua leva na tatau ona fa’ataunu’uina lea galuega e pei ona taua i le ripoti a le malo ua tu’uina atu i le fono, ae o lo o tuai fuafuaga a le feterale i tulaga o a latou asiasiga ina ia mautinoa e fa’amalieina a latou tulafono.

O isi galuega tetele ua fuafua le malo e fa’atino ina ia atili fa’amatagofie ai le taulaga, o le suia lea o foliga o le apitagalu, amata mai i le taelega o le Si’ugaula o le Atuvasa i Utulei, ma fa’asolo atu ai i le vaega o lo o i ai le uafu o va’a faila i Malaloa, ina ia mafai ai fo’i ona si’itia le silasila a tagata maimoa mai fafo i le teritori o Amerika Samoa.

Na taua e Lolo i lana saunoaga i luma o le fono i le vaiaso nei e fa’apea, o le agaga autu o le malo ua mafua ai ona taumafai e fa’aleleia le tele o atina’e i le atunu’u, ina ia tupu ma ola le tamaoaiga o le malo, e le gata e manuia ai tagata ma aiga ae manuia atu ai ma le atunu’u atoa.