I fa’amaumauga o le Paketi a le malo mo le tausaga tupe fou 2016 lea ua tauaao e le Fono Faitulafono, ua fa’aalia ai le fa’aitiitia o le Paketi a le Fono Faitulafono i le aofa’i e $6.91 miliona mai le aofa’iga e $7.68 miliona o loo i ai mo le tausaga tupe lenei, fa’apea ai ma le aofa’i o tagata faigaluega ua fa’aitiitia i le to’a 207 mo le tausaga tupe fou, mai le to’a 216 o loo i ai i le tausaga tupe lenei.

O le tele o vaega o loo talosagaina ai e le Fono vaega tupe ua fa’aitiitia uma, se’i vagana ai le vaega o Malaga (Travel-5400) ua faaopoopo i le 31%,  lea ua $170,000  ua fa’aagaga mo malaga i le tausaga tupe fou, mai le $129,500 o loo i ai mo le tausaga tupe lenei.

Mo le paketi a le Senate, e 6% ua fa’aitiitia ai mai le tausaga tupe lenei, e pei ona i ai le $2.71 miliona i le tausaga tupe lenei, ae na o le $2.54miliona mo le tausaga tupe fou, ae mo le maota o sui, 9% ua fa’aitiitia ai lana paketi, mai le $2.79 miliona o loo i ai i le tausaga tupe lenei, mai le $2.54 miliona e pei ona fuafuaina mo le tausaga tupe fou.

Mo totogi o tagata faigaluega a le Senate, e 2% lea ua fa’aitiitia ai mo le tausaga tupe fou, i le aofaiga e $1.70 miliona, mai le aofaiga o loo i ai i le tausaga tupe lenei e $1.74 miliona, ae mo le maota o sui, e 7% lea ua fa’aitiitia ai totogi o tagata faigaluega, mai le $1.61 miliona i le tausaga tupe fou, ae $1.73 miliona o loo i ai mo le tausaga tupe lenei.

O isi vaega ua fa’aitiitia ai le paketi a le Senate e aofia ai le vaega e fa’atino ai galuega (materials & supplies), e 9% lea ua fa’aitiitia ai mo le tausaga tupe fou, i le aofai e $557,000, mai le $613,500 o loo i ai i le taimi nei; o le konekarate ua fa’aitiitia i le 91%, tusa lea e na o le $3,000 lea ua fa’aagaga mo le tausaga tupe fou, fa’atusatusa i le $35,000 o loo i ai i le tausaga tupe lenei, atoa ai ma isi manaoga ua fa’aitiitia fo’i i le 40% mo le tausaga tupe fou, tusa lea o le $110,000 ua fa’atulaga mo le tausaga tupe fou, fa’atusatusa i le $183,000 o loo i ai i le tausaga tupe lenei.

Ae mo le maota o sui, e 8% lea ua faaitiitia ai tupe mo ana galuega fa’atino, mai le $647,000 mo le tausaga tupe fou i le $700,000 o loo i ai i le taimi nei; 94% ua faaitiitia ai tulaga o konekarate, mai le $3,000 ua fa’atulaga mo le tausaga tupe fou i le $50,000 o loo i ai i le taimi nei, ma le 28% ua fa’aitiitia ai isi manaoga, e pei ona fa’atulaga i ai le $110,000 mo le tausaga tupe fou, ae $152,000 o loo i ai i le taimi nei.

I le fa’atulagaina o tulaga faigaluega mo le Senate, e to’alima i latou o loo fa’aigoaina o Fesoasoani Fa’apitoa mo le Peresetene o le Senate (special assist to the president) i totogi e ta’i $40,000 i le tausaga mo tagata e to’alua, $30,000 le isi, $25,000, ae $15,120 le isi to’atasi.

I totonu o le paketi a le Senate, e to’atolu i latou o loo lisiina mai ai o loo umia le tulaga o le “Liaison Officer”, ae eseese uma fo’i o latou totogi. O le isi e $50,000, sosoo ai ma le isi e $35,000, ma le isi e $18,000 i le tausaga.

O le totogi o le ‘Chief of Staff’ e $55,000, ae o le totogi o le ‘Senate Chief of Personnel’ e $30,000 i le tausaga.

Na fa’ailoa e le afioga i le ali’i peresetene o le senate i le vaiaso nei i luma o le maota maualuga i le vaiaso nei e fa’apea, o le itu e sili ona taua ai, e le o mumu le paketi a le Fono i le tausaga tupe lenei.