O le amataga o le masina nei na faalauiloa mai ai e le afioga i le kovana le tumau ia Lemanu Peleti Mauga, ni isi o ana tofiga mo i latou e avea ma totino o ni isi o Komiti a le malo.

O ia tofiga e aofia ai le tofia o Father Vaiula Iulio e avea ma totino o le Komiti o le Palola (Parole Board), ma i latou e to’alima ua ia tofia e avea ma totino o le Komiti o Suesuega (Survey Board).

KOMITI O LE PALOLA

O Father Vaiula ua atoa i ai le to’afa o totino o lea Komiti taua a le malo. O isi sui tuai e to’atolu o le komiti o lo o i ai e aofia ai Ipu Lefiti, Uso Lago’o ma Tauaifaiva Suiaunoa.

I se poloaiga na sainia e Lemanu i le aso 9 Aperila 2014 sa ia taua ai e fa’apea, ina ia tusa ai ma vaega o le tulafono, ua ia tofia ai Father Vaiula e avea ma totino o le Komiti.

“Ua ou talitonu atoatoa i le agava’a o lo o ia te ia, e mafai ai ona faia faaiuga ma tuuina atu auala e faufautua ai i le komiti, e tusa ai ma ala o le tulafono o lo o faavae ai a latou tiute tauave,” o se vaega lea o le tusi a Lemanu.

E tusa ai o le saunoaga a Lemanu, o i latou e toafa ua tofia e avea ma totino o le Komiti, o le a faaauau pea ona galulue i le faatinoina o a latou tiute tauave mo se taimi faatulagaina, se’i vagana ua aloaia ma tofia i latou e le alii kovana.

I le faaiuga o le tusi a le afioga Lemanu, sa ia talosagaina ai matagaluega ma ofisa uma o le malo, ina ia tuu atu la latou lagolago i le komiti, ma fesoasoani i soo se auala mo le faatinoina o a latou tiute tauave.

KOMITI O SU’ESU’EGA

Na taua e Lemanu i sana poloaiga na sainia i le aso 10 Aperila 2014 e faapea, ua ia tofia ai i latou nei e to’alima e avea ma totino o le Komiti o Suesuega a le malo.

O i latou ia e aofia ai Taliga Vaiolo, o le sui faatonu o le Ofisa o le TEO; Faauuga Mailo, o se inisinia laisene mai se tasi o pisinisi tumaoti; Vaipuna Fo’ifua Fo’ifua, o le pule o le toese i Tafuna; Jesse Yandall, o se inisinia laisene mai le Ofisa o Galuega a le malo, ma Seiuli Alvin Tuala, o le loia sili lagolago a le malo.

Saunoa Lemanu e faapea, o i latou e to’alima ua ia tofia, o le a galulue pea e avea ma totino o le Komiti seia oo i le taimi e aloaia ai le tofiaina o i latou e le alii kovana.

Na faaiu saunoaga a Lemanu i lona talosagaina lea o matagaluega ma ofisa a le malo ina ia ave la latou lagolago ia i latou ua ia tofia e galulue i totonu o le komiti.