I se pepa o fa’amatalaga sa tu’uina atu e le afioga i le Komesina o le Matagaluega o Leoleo, i vaega taitasi uma o le matagaluega i le aso 29 Setema 2014, o lo o taua ai ni isi o suiga tetele ua faia, fa’avae mai lea i fautuaga ma ni isi o ta’ita’i o le Matagaluega.

O ia suiga tetele na amata fa’amamalu i le aso 1 Oketopa 2014, e pei ona taua e le afioga a William E Haleck i sana fa’aaliga fa’alaua’itele ua mae’a ona tauaao e vaega ta’itasi o le Matagaluega.

Na taua e Haleck i lana fa’aaliga e fa’apea, “I le mae’a ai ona matou feutana’i ma vaega o ta’ita’i (command staff), ua ou faia ai loa suiga tetele i le vaega o tagata faigaluega i le tatou Matagaluega, ina ia fa’aauau ai pea ona aumaia suiga lelei mo le fa’aleleia o le auaunaga a Leoleo i le atunu’u”.

O le ulua’i suiga e pei ona taua e Haleck, o le aveese mai lea o le susuga a Captain John Cendrowski mai le vaega sa galue ai i le Ofisa o Leoleo i Tafuna, ae ua tofia nei o ia na te pulea le Vaega e Fa’amalosia Fualaau Fa’asaina a le Matagaluega (Vice & Narcotics Units).

O le susuga Cendrowski e pei ona saunoa Haleck, o le a ripoti i le Ta’ita’i o le Vaega o Leoleo Su’esu’e ia Comrd Lavata’i Ta’ase Sagapolutele mo fa’atonuga masani o le aso.

O le suiga fo’i lenei o le a fa’aleaoga ai isi poloaiga e fa’atatau i le Vaega a le ‘Vice & Narcotics Unit’, ona ua manatu e toe fa’afo’i mai i lalo o le vaavaaiga a le Vaega o Leoleo Su’esu’e (CID) a le Ofisa o Leoleo.

O le isi suiga e aofia ai toe tofia o Captain Pouuamea Supapo e galue i le lala o le Ofisa o Leoleo i Tafuna, o faatonuga fo’i mo ia o le a tuuina atu lea e le Ta’ita’i Leoleo ia ‘Police of Chief’ Vaimaga Maiava.

O le a tumau pea le avea o Captain Supapo ma sui o le vaega ‘Inter Affair’ i le Ofisa o Leoleo.

O le suiga lona tolu e aofia ai le aveese mai o le susuga a Captain Paulo Leuma mai le vaega a le ‘Vice & Narcotics Unit’ sa galue ai, ae ua tofia na te vaaia le lala o le Ofisa o Leoleo i Leone, o fa’atonuga fo’i mo ana galuega fa’atino i aso ta’itasi o le a tu’uina atu lea e le Ta’ita’i Leoleo ia Vaimaga Maiava.

O le suiga lona fa e aofia ai le aveese mai o le susuga a Captain Lima Togia sa vaaia le lala o le Ofisa o Leoleo i Leone, ae ua toe tofia e galue i le Ofisa tutotonu a Leoleo i Fagatogo, e sui tulaga i le susuga a Captain Moleli Tavai ua avanoa nei, ona ua valaau le Atua i lea auauna, o le a misia pea lava o ia e le Matagaluega i aso uma ona o lana tautua.

O suiga uma e pei ona taua e Haleck, o le a fa’aleaogaina ai ni isi lava suiga sa faia mo i latou e pei ona taua, ona o le naunau ia siisii pea i luma le auaunaga a le Matagaluega o Leoleo i le atunuu.