Na avea le sese o le ali’i pagota na fa’asala e le fa’amasinoga maualuga i le taeao ananafi, ma auala na toe faia ai loa le poloaiga a le afioga i le fa’amasino sili ia Michael Kruse, ina ia fa’aleaoga lana fa’aiuga ua mae’a ona tu’uina mai fa’asaga i le ali’i pagota lea.

O le ali’i o Seilala Uesi na fa’asala e le fa’amasinoga maualuga i le taeao ananafi ananafi ina ia taofia o ia i le toese mo le 28 masina, o se tasi lea o tuutuuga o lana nofovaavaaia e 7 tausaga, ina ua ta’usala o ia e le fa’amasinoga i moliaga mamafa e lua o le faia o uiga mataga fa’afeusuaiga i se tama’ita’i e laititi i lalo o le tulafono, atoa ai ma le moliaga o lona toe faiaiga i se tama’ita’i e aiga i ai.

Ae ina ua toe manino le fa’amasinoga e le o moliaga ia na ta’usala ai e le fa’amasinoga le ali’i o Uesi, na toe tu’uina mai ai loa le poloaiga a Kruse ina ia fa’aleaoga lana fa’aiuga sa tu’uina mai mo Uesi, a ia toe taofia o ia fa’atasi ai ma Eneliko Seilala i le toese i Tafuna e fa’atali ai le aso Faraile o le vaiaso fou lea ua fa’atulaga e toe lau ai la fa’asalaga.

O Uesi na ta’usala e le fa’amasinoga i le moliaga o le talepe fale i le tulaga muamua, atoa ai ma lona tagofia o itutinosa o ni tama’ita’i, e mafua mai i le fa’alavelave lea na ia ulufale ai i totonu o fale o ni tama’ita’i ma matamata i ai ao momoe i latou, ae o Eneliko na ta’usala i le fa’alavelave lea na ia toe faiaiga ai i le tama teine a lona lava tuafafine.

O Uesi ma Eneliko na fa’atulaga e lau a laua fa’asalaga i le taeao ananafi, i le mae’a ai lea ona talia e le fa’amasinoga o ni maliliega na latou sainia ma le malo.

Ina ua valaau e le ali’i fa’amasino le igoa o Seilala, sa vaaia le tula’i atu o le ali’i o Uesi ma saofa’i i tafatafa o lana loia, ae o le taimi lea o lo ta’atia i luma o le ali’i fa’amasino sili le faila o le mataupu a le isi Seilala lea o lo o tu’uaia i lona faia o uiga mataga i lona niece.

Na amata taualumaga masani o le fa’amasinoga e ala i le fa’atoesega a le ali’i o Seilalo Uesi, ma vaaia ai le tau le mafai o sana tala i le maligi o ona loimata, ao ia fa’atoese i le fa’amasinoga e tusa ai o lana solitulafono sa faia.

Na taua e Uesi lona matua salamo e tusa ai o lana solitulafono sa faia, ma ia talosagaina ai le fa’amasinoga mo se avanoa e toe fo’i atu ai i lona aiga e mafuta ma nai ona matua fa’apea ona tuafafine.

Sa ia fa’atoese fo’i i ona matua ma lona aiga atoa ina ia fa’amagalo o ia, ina ua ta’uvalea le igoa o si ona tama i tala ua salalau i luga o le nusipepa, e mafua mai i lana solitulafono sa faia.

Na tu’uaia e le ali’i o Uesi le tiapolo, o ia lea ua mafua ai ona ia soliina le tulafono, ina ua ia fa’aosooso ia te ia ma vaivai ai ona lagona ae fa’atino loa le solitulafono.

Na maua le avanoa e molimau ai le tuafafine o Uesi i luma o le fa’amasinoga, ma ia talosagaina ai le fa’amasinoga mo se avanoa e toe tatala ai i tua lona tuagane. Na taua e le tuafafine i lana molimau e fa’apea, ua fai o ia ma sui o ona matua ua le mafai ona o o atu i le fa’amasinoga, e talosagaina ai se avanoa mo si ona tuagane ina ia toe fo’i atu ai i lo latou aiga.

Na taua e le ali’i loia fautua ia Michael Kruse na tula’i mo Uesi e fa’apea, o taimi uma lava sa la talanoa ai ma Uesi, e fa’ailoa atu ai e le ua molia ia te ia lona matua salamo moni e tusa ai o le mea sa tupu, ma ua ia ta’utino fo’i na te le toe soliina se tulafono.

Na pau le itu na taua e White mo le ua molia, o le tulaga fa’aletonu i ona pepa nofomau, ina ia fai i ai se fa’aiuga a le fa’amasinoga.

Ina ua maua le avanoa o le loia a le malo ia Tony Graf e finau ai mo se fa’asalaga o Uesi, sa ia talosagaina ai le fa’amasinoga ina ia fa’asala le ua molia i le toese mo le umi e 24 masina, o se tasi lea o tuutuuga o lana nofovaavaaia e 7 tausaga.

Ina ua mae’a ona iloilo e ali’i fa’amasino se fa’asalaga mo Uesi, na manatu ai loa ina ia fa’asala o ia i le toese mo le umi e 7 tausaga mo le moliaga o le faia o uiga mataga fa’afeusuaiga fa’asaga i se tama’ita’i, a uma ona tuli lana fa’asalaga lea, ona ia toe tuliina lea o le isi 5 tausaga mo le moliaga o le faiaiga ma se tama’ita’i la te aiga, peita’i o lea fa’asalaga fa’afalepuipui atoa ai ma le salatupe e $5,000, ua manatu le fa’amasinoga e fa’amalumalu lona tuliina, ae nofova’avaaia le ua molia mo le umi e 7 tausaga i lalo o poloaiga a le fa’amasinoga.

O ia poloaiga e aofia ai lona tuliina o masina e 28 i le toese i Tafuna, a maea ona ia tuua lea o le teritori ae toe fo’i atu i lona atunu’u mo le umi o lana nofova’ava’aia e 7 tausaga.

Ina ua mae’a ona tu’uina atu le fa’asalaga a le fa’amasinoga mo Uesi, sa valaau ai loa le mataupu a Eneliko Seilala, ma o iina na fa’atoa manino ai le fa’amasinoga i le fa’aletonu o lo o tula’i mai, ina ua fa’ailoa e le Failautusi a le fa’amasinoga i le ali’i fa’amasino sili, o lo o i ai se feeseeseaiga i mataupu a alii pagota.

Na fesili Kruse ia Eneliko po o le a le mea na mafua ai ona loka o ia, ae na tali le ua molia, na loka o ia i le fa’alavelave lea na la faiaiga ai ma le tama a lona tuafafine.

Na vave ona fa’atoese le ali’i loia o White i le faamasinoga ona o le fa’aletonu e pei ona tula’i mai, ma tolopo ai loa e le faamasinoga le lauina o faasalaga a ali’i pagota ia e to’alua e toe faaauau i le aso Faraile o le vaiaso fou.