Ads by Google Ads by Google

Fa’amanatu 10 tausaga tautua Nana’s

O savali fa’aaloalo ma fa’afiafiaga fa’asamoa, o ni isi ia o polokalame sa fa’atinoina e le aufaigaluega a le Nana’s Company, e fa’amanatu ai le atoaga o le 10 tausaga talu ona fa’avae mai lana tautua i Amerika Samoa, e pei na fa’ataunu’uina i le aso ananafi i le nofoaga autu a le kamupani i Pago Pago.

 

“I le tausaga 2004 na na ou nofo ai ma manatunatu i sa’u mea a fai, ua litaea mai galuega, ua fo’i mai fo’i tafaoga e fa’ailo ai le olaga faigaluega sa fai, peita’i, o lo’o i ai pea le malosi mai le Atua.” O le saunoaga amata lea a le tausi o Fiapa’ipa’i, i lona toe tau manatu i le afuaga o pisinisi e ono sa fa’ailo, “Nana’s Landscaping, Nana’s Car Wash, Nana’s Security, Nana’s Construction, Nana’s Heavy Duty Machinery for Rent ma le Nana’s Janitorial.”

 

I nei taumafaiga uma sa i ai le a’ao ta’ita’i o le Atua, aua e le o i ai lava se Kamupani o fa’atautaia, o fa’aletonu lona fa’atautaiga. O lo’o lelei ana galuega fa’atino, ua lelei fo’i maka e tauva ai Nana i filigamaea ma isi kamupani i tauofoga a le Malo i tulaga o Galuega Lautele.

 

I lena vaitau, sa fiu e finau se avanoa, peita’i, ai ona o le va’ai i le tagata na ulufale atu ma le ofo, na ala ai ona matu’u mai se ulua’i galuega i le Landscaping, e le’i toe ma Nana e saluvao ma vele vao i autafa o alatele ma malae e va’aia e tagata le galulue fa’atasi ai ma lana aufaigaluega.

 

Sa fa’alua e le Faife’au i lana tautalaga lea mau, Rev Fa’atauva’a Talamoni, lea sa ia amatalia le sauniga i le tatalo ma ia toe fa’ai’uina fo’i.

 

“Afai e te to’ai taunu’u i Kanana, aua ne’i galo ia te oe le na foa’ia nei mea uma ia te oe. Ina ne’i e ‘ai ma e ma’ona, ma e inu ma le olioli, ae galo ia te oe, le na ia aumaia oe mai le nu’u sa e nofo pologa ai.” O le fuaitau mai le afioga a le Atua i tusi a Mose, sa ia fa’autagia ai Isaraelu i taimi o le maua o manuia.

 

“E iloga kamupani e olaola, o lo’o tausisi i le amiotonu, e faia fo’i le fa’afo’i a le Atua, sefulua’i ma le vi’iga e si’i i le Atua, ae alolofa fo’i i tagata ma e ola ai i le soifua alofa atu. E alofa foi ma tausi lelei ana tagata faigaluega ma o latou aiga.” O se tautalaga lea a le fa’afeagaiga aua sa molimau fo’i o ia, i le ola faitaulaga ma le tausi feagaiga o le afioga le Komesina o Palotaga ma le Tiakono Toeaina o le Ekalesia Fa’apotopotoga Kerisiano i Amerika Samoa i Pago Pago lava.

 

I le kamupani i le taimi nei, ua atoa le 68 o ana tagata faigaluega o i ai, e tofu fo’i le Kamupani ma se tasi o le fanau e fa’auluulu i ai, ina ia mautinoa o lo’o aluga lelei a latou galuega, pe i’inei Nana pe ua malaga fo’i i fafo, ae o lo’o mautinoa e fa’agaoioia lelei pea o galuega uma.

 

Ese mai le Malo ae ua i ai fo’i galuega a le Ekalesia ua malo ai i latou ma mae’a fo’i na galuega, ua atili lelei ai o latou maka i galuega fa’apena. E fou lava i nei tautua uma o le konekarate o le fa’amamaina o le Malae Va’alele, ma e iloga lava le matagofie o lena itu o tautua lautele a le atunu’u i lenei vaitau ua faia e Nana’s lea auaunaga.

 

I le vaega na soso’o ai o fa’afiafiaga fa’atauva a le aufaigaluega i ana pisinisi e fa. Sa ta’ilua aitema sa fa’amasinoina ai, ma ua manumalo le vaega a le Security lea e fa’auluulu ia Sandra Fruean Herrerra. Soso’o ai le fa’afiafiaga a le Au Faufale, soso’o ane ai le Landscaping ae mulimuli lava ia Blanche ma lana vaega a le Malaeva’alele. Sa fai fa’ailoga tupe lea tauvaga.