Ads by Google Ads by Google

Fa’amanino Loia Sili le malu puipuia o fanau pe a pasia tulafono

Na fa’amanino e le Loia Sili a le malo i se iloiloga sa faia i luma o le Komiti o Mataupu Tau Tulafono a le Senate ma le Maota o Sui ananafi, o le tulafono tau faaofi lea ua i luma o le Fono e lesitala ai le igoa o le tagata ua fa’amaonia i solitulafono e aofia ai le faia o uiga mataga i fanau laiti, o se tulafono e taua mo le puipuia o le saogalemu o fanau i le atunuu.

 

Saunoa Talauega Eleasalo Ale e fa’apea, e ui ua leva ona i ai le tulafono a Amerika Samoa e lesitala ai le igoa o le tagata e ta’usala i solitulafono o le faia o uiga mataga i fanau laiti, peita’i o lea tulafono e le o lava lona malosi e puipuia ai le saogalemu o fanau mai le a’afia i ni isi gaioiga fa’asolitulafono e faia e i latou ua ta’usala i ituaiga solitulafono mataga nei.

 

ILOILOGA A LE SENATE

 

O le agaga autu o le tulafono e pei ona fa’amanino e Talauega i luma o le senate ma le maota o sui, e le gata e mafai ai ona lesitala le igoa o le tagata ua tausala i le faia o solitulafono mataga i fanau, ae o le a mafai ai fo’i e le atunuu ona silafia fa’amatalaga uma e uiga i lea tagata e aofia ai ma le nofoaga fou lea o le a nofo ai.

 

Na taua e Talauega e fa’apea, o le taimi nei i le tulafono lea e lesitala ai le igoa o le tagata e ta’usala i le faia o solitulafono mataga fa’asaga i fanau, o lo o faigata lava ona iloa tonu ituaiga tagata ua uma ona lesitala.

 

“O ni isi taimi e emo ane ai le ata ua galue se tagata sa tausala i le faia o amioga mataga i fanau laiti i se galuega e fesootai ai ma fanau, e pei o le fai ma faiaoga, po o isi foi ituaiga galuega, ae o le teuteuga la o le tulafono lea ua i luma o le fono, o le a iloa ai faamatalaga uma e faatatau i le tagata lea, tusa lava pe sa solitulafono i Amerika e mafai lava ona iloa i Amerika Samoa nei”, o le saunoaga lea a Talauega.

 

E i ai alagatupe feterale, e maua mai i le tulafono lenei, ae peita’i na faamanino e le loia sili i luma o le senate, e le o le tupe le mafua’aga ua ala ai ona ia lagolagoina lenei tulafono, ae ona o le naunau lava ia puipui le saogalemu o fanau laiti a le atunuu.

 

O lo o taua i le tino o le tulafono vaega e tolu o lo o fa’atulaga mai ai ituaiga tagata solitulafono, e pei o le tagata e nofosala i solitulafono mama; tagata fa’atoa solitulafono; atoa ai ma le tagata ua toe solitulafono fo’i.

 

Saunoa le afioga i le alii senatoa ia Magalei Logovi’i e fa’apea, e mafua ona toe solitulafono le tagata, e le o lava le mamafa o le fa’asalaga o lo o fa’asala ai tagata solitulafono i le taimi nei, ae i lona talitonuga, “e sili ai pe a toe fa’aaoga fa’asalaga i taimi o Mose”, a le o lena fo’i, “e sili ai le sisi”.

 

Na fesili le afioga i le alii Senatoa ia Nuanuaolefeagaiga S. Nua i le loia sili, pe fa’amata o le lesitalaina o le igoa o le tagata ua mae’a ona fa’amaonia lana solitulafono, o se faiga lea ua atagia mai ai le fa’asala fa’alua o lea tagata, pe o se auala fo’i e soli ma le amanaia ai ona aia tatau, i le soona fa’alauiloa o lona igoa, o lona ata atoa ai ma fa’amaumauga uma e fa’atatau ia te ia, ae na tali le loia sili, e le taua ia te ia pe a’afia ai aia tatau o le tagata ua nofosala, ae taua atu ia te ia le saogalemu o fanau a le atunuu mai le a’afia i se isi solitulafono e toe faia e lenei tagata ua mae’a ona nofosala.

 

Saunoa Talauega, o lo o i ai fo’i le lisi o i latou ua uma ona ta’usala i solitulafono mataga nei, ma o lea lisi o lo o vaavaaia e le Ofisa o Leoleo.

 

Na talosaga le afioga i le alii senatoa ia Mauga Tasi Asuega, pe fa’amata e le mafai ona tu’u fa’atasi le lisi tuai o lo o i ai ma le lisi fou pe afai ae pasia e le Fono le tulafono taufaaofi lenei, ina ia mafai ai ona silafia e le atunuu tagata o lo o faia ituaiga solitulafono nei, ae na tali le loia sili, o se fautuaga lelei tele lea e fa’amalosia atili ai le tulafono.

 

ILOILOGA A LE MAOTA O SUI

 

Na fesili le tamaitai faipule ia Vui Florence Saulo, o ia fo’i lea o le taitaifono o le Komiti o Tulafono a le maota o sui, pe fa’apefea ona fa’alauiloa i le atunu’u fa’amaumauga e fa’atatau i le tagata ua nofosala i solitulafono nei, ae le o tagata uma o le atunuu e mafai ona maua le avanoa e faaaoga ai masini ma fesootaiga faaonaponei.

 

Na tali Talauega e faapea, o le agaga autu o le tulafono lenei, ia mafai ai e tagata o le atunuu ona iloa faamatalaga uma e faatatau i tagata ua tausala i le faia o uiga mataga i fanau laiti, ma o faamaumauga foi ia e maua i le ofisa o le loia sili po o le ofisa o leoleo.

 

Na fesili le Sui Fofoga Fetalai ia Talia Faafetai Iaulualo, pe manaomia ni isi tagata faigaluega fa’aopoopo e fesoasoani i le fa’amalosia o le tulafono, ae na tali le loia sili, e i le va o le 3 ma le 5 le aofai o tagata faigaluega fou e manaomia.

 

O i latou nei o le a galulue i le tuu faatasia o faamatalaga e faatatau i tagata e lesitala, atoa ai ma le mata’ituina o nofoaga e aga’i solo i ai i latou ua lesitala.

 

Ae na saunoa le afioga i le alii faipule ia Toeaina Faufano Autele e fa’apea, e taua fo’i ae galulue faatasi le ofisa o le loia sili ma le Ofisa o Mataupu Tau Samoa, e ala i le logo o Pulenuu i le lisi o tagata ua lesitala, ina ia taofia ai le soona fa’asalalau o faamatalaga e fa’atatau i tagata nei, ma aafia ai o latou aia fa’aletulafono.