Na fa’aalia e ni isi o matua e fa’apea, e mafua ona latou taumulimuli i so o se mea e o i ai a latou fanau, o le taumafai e fia vaai ia i latou i le taimi e galulue ai i ofisa ma kamupani ua tofia i latou e le malo e galulue ai, ae o isi na latou taua e fa’apea, e mafua ona tau mulimuli i nofoaga eseese e o ai fanau, ia mautinoa lo latou saogalemu.

“O se taimi muamua lenei ua alu ese mai ai la’u tama mai lo matou aiga, o se lagona faigata tele ia te a’u o le tina le alu ese mai o la’u tama e aunoa ma lo’u vaai po o fea o lo o alu aga’i i ai, o le mafua’aga lena ua ou sau ai, ina ia ou mautinoa e saogalemu o ia”, o le molmau lea a Tina Ulufale o Aua, o lana tama teine e 16 tausaga o lo o agava’a i le polokalame a le malo lea e galulue ai fanau i galuega mo le umi e 8 vaiaso (Summer Youth Employment Program).

Ae na taua e le tama o Richard Lutu e fa’apea, e eseese lava mafua’aga e ala ai ona tau mulimuli matua i mea e o i ai fanau.

“E mafua ona ou tau mulimuli i le mea e alu i ai si o’u afafine, ou te popole i tula’i mai ai se fa’alavelave ia te ia ae o lea ou te tau mamao ese, e lelei lava le tula’i mai o se fa’alavelave a o lea ou te i ai i ona tafatafa”, o le saunoaga lea a le susuga a Lutu.

Na taua e ni isi o matua i le Samoa News e fa’apea, e ese fo’i le silasila a le malo i la latou pito laau, e ese fo’i le vaai a matua i le latou pito laau fa’amatua, o le mafua’aga lena e to’atele ai matua e mulimuli i nofoaga eseese e aga’i i ai a latou fanau, latou te naunau ia mautinoa o lo o saogalemu fanau.

O finagalo eseese mai ni isi o matua sa mafai ona fesiligia ina ua mae’a ona fautuaina e se sui o le polokalame i latou i le aso Gafua na te’a nei, e le o se tulaga tatau lo latou taumulimuli i nofoaga eseese e aga’i i ai fanau, e pei ona maitauina i le tausaga ua mavae.

Na taua e le Fa’atonusili o le Matagaluega o Tagata Faigaluega a le malo ia Sonny Thompson e fa’apea, o se tasi o fa’afitauli sa maitauina i ni isi o matua ina ua amata le polokalame lenei i le tausaga ua mavae, o ni isi o matua sa tau mulimuli lava i fale faigaluega na tofia a latou fanau e galulue ai.

“Matua, matou te talosaga atu, e le tatau ona toe tula’i mai lena fa’aletonu i le tausaga lenei, matou te malamalama i o outou lagona mo fanau, ae ou te tatalo atu, tu’u mai la outou fa’atuatuaga i le aufaigaluega a le malo, matou te tausi ma puipui i le saogalemu o a outou fanau”, o le saunoaga lea a Thompson ina ua tatala aloaia le polokalame i le aso Gafua na te’a nei.

Saunoa Thompson e fa’apea, o le isi lea vaega o le ola tupu tupu a’e o fanau, o le alu ese mai i le aiga ma alu e faigaluega, e pei fo’i ona faia e fanau o lo o aooga i kolisi ma Iunivesite i fafo, e le gata e aooga ae faigaluega fo’i e saili se tupe e fesoasoani ai i le totogiina o le aoga.