Ads by Google Ads by Google

Fa’amanino sui DOL le tulafono e fa’atatau i livi tagata faigaluega

E silia i le to’a 100 sui o kamupani tua i le atunu’u, matagaluega ma ofisa tu maoti a le malo na auai i se aoaoga sa fa’atautaia i le taeao ananafi i le Fale Laumei, lea na fa’atautaia e ni sui se to’alua mai le Matagaluega o Galuega a le malo tele o Amerika (USDOL), e fa’amanino ai le tulafono e fa’atatau i livi e mafai ona agava’a i ai tagata faigaluega, po o le ‘Family and Medical Leave Act’ (FMLA).

 

O sui e to’alua a le USDOL na malaga mai mo le fa’atautaia o lenei aoaoga e aofia ai le Sui Fa’atonu o le Ofisa i Honolulu ia Min Kirk, fa’apea ai ma le tama’ita’i e gafa ma le faia o su’esu’ega o Heather Skidmore mai le Ofisa i San Diego.

 

O le afioga i le Fa’atonusili o le Matagaluega o Tagata Faigaluega a le malo ia Sonny Thompson na saunoa e fa’afeiloa’i le mamalu o le aofia na auai atu i lenei polokalame, ma ia fa’amanino atili ai le taua o lenei aoaoga mo so o se tagata faigaluega atoa ai ma i latou o lo o pulea fale faigaluega i le atunu’u.

 

O le autu atoa o le aoaoga lenei e pei ona fa’ailoa e Kirk, o le taumafai lea e puipuia le galuega a le tagata faigaluega pe afai o le a agava’a o ia i le livi lea e taua o le livi ona ua a’afia i se gasegase pe ona ua gasegase fo’i se isi o le aiga, ona manaomia lea o le tagata faigaluega e nofo e tausi le gasegase a se tasi o lona aiga.

 

“O le taua o le aoaoga lenei, e tatau ai ona malamalama le tagata faigaluega i ona aia tatau fa’aletulafono, atoa ai ma le iloa lelei e le pule o le fale faigaluega o ona tiute tauave, ina ia aua ne’i tula’i mai ai se fete’enaiga i le va o le pule ma le tagata faigaluega”, o se saunoaga lea a Kirk.

 

Na fa’ailoa e le tama’ita’i su’esu’e ia Skidmore i le aofia, e le tatau ona mumusu e fesili i so o se mataupu e fia malamalama ai, e le tatau fo’i ona mumusu e fa’asoa ni o latou lagona, e le o se su’esu’ega lea na mafua ai ona ia malaga mai, ae o le taumafai e fesoasoani.

 

“O le agaga atoa o le USDOL, ia matou fa’asoa atu fa’amatalaga eseese uma nei, e fesoasoani ai i tagata faigaluega ma pule o fale faigaluega ina ia malamalama i polokalame eseese o lo o faatulaga mai e le malo tele mo so o se galuega i totonu o setete ma teritori”, o le isi lea saunoaga a Skidmore.

 

O le polokalame la lea o le FMLA, e mafai ona talosagaina e se tagata faigaluega pe afai ua fia maua se avanoa e ave ai livi ona o ni fa’alavelave matuia ma talafeagai ua tula’i mai ia te ia po o se isi o lona aiga.

 

O le FMLA e pei ona taua i ni ata fa’aali sa maimoa i ai latou sa auai i le aoaoga, e agava’a ai pisinisi tua e silia i le 50 le aofai o tagata faigaluega, faapea ai matagaluega ma ofisa tu maoti a le malo.

 

O le FMLA, e mafai ona agava’a i ai le tagata faigaluega pe afai ua leai ni ona livi ma’i po o livi tausaga, ae ua manaomia lona malolo ona o ni manaoga faapitoa e pei o le aafia o lona tino i se gasegase, pe ua aafia fo’i se isi o lona aiga e pei o lona toalua po o lana fanau i ni gasegase, ma ua manaomia ai lona malolo e tausi le gasegase o se isi o le aiga.

 

Na fa’amanino e Kirk e fa’apea, afai e agava’a le tagata faigaluega i le livi ma’i lea, lona uiga o le a nofo o ia mai lana galuega e aunoa ma se totogi tusa lava po o le a le umi ua fa’atulaga, ae mafai lava ona toe fo’i atu o ia i lana galuega ma toe alu i lona tulaga sa galue muamua ai, atoa ai ma lona totogi sa mua’i maua.

 

“E mafai e le tulafono lea o le FMLA ona puipui lau galuega, e le mafai foi e le pule o le fale faigaluega ona aveese lou totogi sa maua”, o le saunoaga lea a Kirk.

 

Na fa’amanino e Thompson le taua o le aoaoga lenei mo so o se tagata faigaluega, ina ia malamalama ai i ona aia tatau fa’a tagata faigaluega ao galue ai i lana galuega o lo o i ai nei.

 

Ina ua fesiligia sui sa auai i le aoaoga po o i ai se pisinisi tua po o se matagaluega a le malo o lo o latou fa’aaogaina le polokalame o le FMLA, e leai ma se isi tali ioe.

 

A o i ai Kirk ma Skidmore i le atunu’u, o le a maua ai fo’i le avanoa o le tama’ita’i su’esu’e ia Skidmore na asia ai matagaluega ma pisinisi tua i le atunu’u, ma fesiligia i ni isi o mataupu e fia malamalama atili ai, ina ia mautinoa e faigofie ona malamalama pisinisi tua i le tulaga tonu e fa’atatau i le FMLA.