O le aso 15 Iulai lea ua fa’atulaga e fofoga ai le fa’asalaga a le fa’amasinoga maualuga fa’asaga ia Isaako Tausaamalu, ina ua ta’usala o ia e se vaega iloilo iuga i le aoauli ananafi i moliaga mama e lua, o le fa’ao’olima i le tulaga tolu atoa ai ma le fa’atupu vevesi i nofoaga faitele.

Na ulua’i tu’uaia e le malo ia Tausaamalu i le moliaga mamafa o le fa’ao’olima i le tulaga muamua, e mafua mai i le fa’alavelave lea na manu’a ai le alii o Kalena Atalima i le po o le aso 10 Aokuso 2013, ae ina ua mae’a ona fa’afofoga ali’i ma tama’ita’i fa’amasino i mau fa’amaonia o lenei mataupu e aofia ai ma le molimau a le ua molia, na latou fa’ai’uina ai loa, e le nofosala Tausaamalu i le fa’ao’olima i le tulaga muamua, sei vagana ai le nofosala o ia i moliaga mama e lua e pei ona taua.

E tusa ai ma le folasaga a le malo e faatatau i le faalavelave sa tupu, na taua ai e le alii loia ia Tony Graf na tulai mo le malo e faapea, o le mataupu lenei na alia’e mai ina ua tuli e le ua molia ia Atalima ma le $20 e fa’atau mai ai ni fagupia se 5 ma i latou e to’atolu, ae ina ua fo’i mai Atalima, e na o le lua fagupia na sau ma ia toe leai se sui o le tupe na totoe.

Na taua e le malo e fa’apea, na po e le ua molia le alii na aafia ma pau ai i tua ma tau lona ulu i le poloka sima,

E le i umi se taimi talu ona tuana’i le gaioiga sa faia e le ua molia, ae la tuua loa ma lana uo sa la i ai le nofoaga sa i ai Atalima ae la foi atu i le fale, ae nofo ai na o le alii na aafia.

O se alii na usu atu i le vaveao e fagota na ia maua atu Atalima o lo o taatia mai i le vaega na fai ai le latou inuga, na ia logo ai loa le ofisa o leoleo mo se fesoasoani.

I molimau na valaauina e le malo e aofia ai ma se ali’i leoleo su’esu’e, sa latou taua ai le tautino atu o Tausaamalu sa ia faaoolima ia Atalima i le po na tula’i mai ai le fa’alavelave, peita’i ina ua tula’i le ua molia mo lana molimau tauto, sa ia fa’ailoa ai i le vaega iloilo iuga e fa’apea, na te le i poina le ali’i na a’afia i se auala e ono pau ai o ia i lalo ma tau lona ulu i le poloka sima ma manu’a ai.

Na taua e Det. Filemoni Amituana’i i lana molimau e fa’apea, o ia sa suesueina le mataupu lenei ina ua logoina le ofisa o leoleo mo se fesoasoani, ma maua ai loa le avanoa la te talanoa ai ma le ua molia.

I le la talanoaga sa faia, na faamatala atu ai e le ua molia ia te ia lona ita tele ia Atalima, ina ua ia tuu i ai le $20 e alu e faatau mai ai ni latou fagupia se 5, ae ina ua fo’i mai e na o le 2 fagupia sa sau ma ia ae leai se sui na totoe.

Na taua e le ali’i leoleo i lana molimau e fa’apea, sa faamatala atu foi e le ua molia ia te ia lona ita i le mea ua tupu, ona ia fesiligia ai loa lea o Atalima e tusa ai o le faatau na alu e fai mai, mulimuli ane ona ia po faatele lea o le alii na aafia i lona lima.

Fai mai le molimau a le alii leoleo, e tusa ai o le faamatalaga a le ua molia ia te ia, na pau agai i tua le alii na aafia ma tau lona ulu i le sima ina ua tau ai lana po, ma ina ua maea, ona o ese ai lea o Tausaamalu ma lana uo sa latou i ai i le fale i le po lea ma le manatu e leai se faalavelave matuia e ono tula’i mai.

Ina ua maua atu e leoleo le tino o le ali’i na aafia, sa na o lona ofuvae pupuu (boxer) o lo o ofu ae o lo o taatia ua matapogia, peitai na taua e Amituana’i i lana molimau e fa’apea, sa faailoa atu e le ua molia ia te ia, sa ia tatala ese le ofu vae pupuu o le alii na aafia sa fai i le taimi na ia sailiina ai le sui o lana tupe sa ia ave i ai, ina ua mae’a, sa ia togi ese le ofuvae i le isi pito.

Ae na taua e Tausaamalu i lana molimau e fa’apea, na te lei tu’iina le alii na aafia, ae sa na ona ia po o ona au taliga, ma mafua ai ona tifa i le isi itu ma le isi itu ae lei pau o ia i tua e pei ona taua e isi molimau.

Na taua foi e le ua molia e fa’apea, o le alii na aafia o se uo mamae ia te ia mo se taimi umi, e le mafai foi ona ia faia i ai se gaioiga faapea.

Sa ia faamaonia i le vaega iloilo iuga lona ita ia Atalima ina ua ia aumaia na o fagu pia e lua, ae le faapea na avea lea ma mafuaaga na te faia ai se tulaga le manuia i lana uo.

O le faamaoniga o lana molimau, sa uma lava ona toe faalelei le la feeseeseaiga ma le alii na aafia i le po lea, ona ia alu ai loa lea i le faleoloa ma faatau mai le la meaai ma la aai ai.

Na taua e le loia fautua a le ua molia ia Joel Shiver i lana folasaga fa’ai’u e fa’apea, e leai se manatu sa ia Tausaamalu e faaoo ni manu’a tuga i le ali’i na aafia, e leai fo’i ni molimau e faamaonia ai sa ia faaoo ni manu’a tuga ia te ia.

E le i umi ona iloilo e le vaega iloilo iuga le mataupu ae latou tuuina mai loa le faaiuga ananafi, e le nofosala le ua molia i le moliaga mamafa, se’i vagana ai moliaga mama e lua e pei ona ta’usala ai o ia.