I le fonotaga sa mua’i faia i le masina talu ai a le US Coast Guarrd ma le au faifaiva i va’a alia, sa fa’aleoina ai, e mana’omia ona fa’amasani tagata uma e faifaiva, kapeteni ma le auva’a, i le fa’aaogaina o au’upega fa’aola ua fa’atulafonoina e ao ina i ai i luga o va’a fagota, a’o le’i tu’ua le uafu.

Ina ia fa’afofogaina e le US Coast Guard popolega o le au faifaiva alia, sa latou matauina ai, e moni, e mo’omia ona fa’amasani tagata uma i le fa’aaogaina o nei auupega fa’aola, aua e matua leai se aoga e avea ai, pasia ina ia i ai i luga o va’a fagota nei mea, ae le iloa e se tasi fa’aaoga.

“Ae maise le taimi ua vevesi vale ai le mafaufau, ua le to’a, ina ua va’aia se fa’aletonu ua tupu i le va’a ma nisi o le au faifaiva, ae tu ai i le va’a o vale se sui o mafaia ona fana se fa’ailo mo se fesoasoani e fia o’o atu mo latou i le vasa,” o le finagalo fa’aalia lea o le ali’i faifaiva ia Eo Sonoma.

Ua talia ua faliu fo’i le US Coast Guard ma ua fa’atulaga loa lenei a’oa’oga e fa’atino i le aso Faraile nei e amata i le 7:30 i le taeao i le Uafu Laititi i Pago Pago i tua ane o le TAOA ma le Faletupe o Atina’e. O iina o le a fa’atino ai uma nei fa’ata’ita’iga fa’amasani a ali’iva’a i le teritori.

I le fonotaga lava lea e fa’ailo ma fa’amautu ai le tapenaga mo mea uma e ao ina fa’aauupegaina ai alia fagota ma le US Coast Guard, sa matua fa’amamafa lava e le Matagaluega o le DMWR fa’apea ma le Peresetene o le Asosi o Au Faifaiva Alia [PAFA] Va’amua Sesepasara le fa’atinoga o lea aoaoga fa’amasani mo ali’iva’a uma, ia faigofie ona oso tatau so’o se tasi i luga o va’a e tafana fa’ailo, ma faia uma isi galuega e fa’ailoa atu ai i Niu Sila, Marine Patrol Amerika Samoa fa’apea ma Hawaii, o lo ua afaina lo latou sa i luga o le sami.

Ua le fa’atulaga lenei aoaoga fa’amasani mo na’o e faifaiva ma latou ali’iva’a, ae ua talosaga atu ma le fa’aaloalo fo’i ia i latou e masani ona femalaga’i i va’a mo latou faigafaiva fa’atauva pe o i latou lava e i ai va’a folau ina ia auai, ia iloa ona fa’ailo mai ua fa’aletonu i latou i le tai.

E amata mai i le ituaiga o mama fa’aola e fa’aaoga e o’o atu i ituaiga o tinei afi e fa’aaoga, o le kiina o leitio ma le tafanaina a’e o felea fa’aola, ma le fa’atulagaga o mea e ao ina vave faia pe a mu se va’a i le sami, e tau mai i le fa’aolaina o le Uaealesi ma le tala e fa’aaoga mai, o le a a’otauina ai le vasega o ali’iva’a i lea a’oa’oga taua.

E le gata i lea, ae ua fa’ailoa mai, e fa’ata’ita’i ai fo’i ma le siakiga a le US Coast Guard o va’a fagota ma pasia ai. O le a fa’ava’ai patino ai ali’iva’a i mea uma e ao ina pasia ai o latou va’a alia fagota. O le ituaiga fo’i o va’a faola e ao ina fa’aauupega ai va’a fagota, o le a fa’ailo i lea aso e le Coast Guard.

O nisi o le a i ai mo lea aoaoga fa’amasani ua aofia ai le Coast Guard, NOAA Fisheries, Marine Patrol, DMWR Enforcement, Fire Bureau ma le Safety Offshore Systems.