O le vaiaso na te’a nei na tuuina mai ai e le Fa’atonusili o le Matagaluega o Tagata Faigaluega a le malo, se fa’amaninoga o le tulafono e faatatau i livi ma’i ma livi tausaga mo tagata faigaluega a le malo.

Saunoa Sonny L. Thompson i le Samoa News e fa’apea, talu lava ona talanoaina e le Kapeneta lenei mataupu, ua to’atele tagata faigaluega a le malo ua valaau atu i lona ofisa e fia malamalama i le tulaga sa’o e tatau ona i ai lenei mataupu, aemaise ai o le vaega o lo o taua i le tulafono e faatatau i livi ma’i ma livi tausaga.

Na faamanino e Thompson e fa’apea, i lalo o le Mataupu VII, Ulutala 12, o Livi ma’i ma Livi tausaga (7.1202 & 7.1202) o lo o fa’amanino mai ai le tulaga sa’o e tatau ona i ai livi ma’i ma livi tausaga.

LIVI MA’I

(a)            Livi ma’i, lona uiga ua le faigaluega ona o se gasegase pe ua le atoa fo’i le malosi

(c)            Livi ma’i, e tatau ona totogi i totonu o le piriota totogi ta’i lua vaiaso i le tasi ma le afa itula

(d)            O tagata faigaluega ua faamalolo ona o se mafuaaga e ese mai i le malo litaea, tagata faigaluega ua aveese mai ona o ni tulaga faaletonu i gasegase, aemaise ai i latou ua malolo litaea i le atoa ai o le 30 tausaga o le tautua, e agavaa ona totogi a latou livi ma’i i le totogi e 50% mo livi i luga atu o le 239 itula.

Saunoa Thompson e faapea, o le faamalamalamaina o le tulafono i livi ma’i, e le faatapula’aina livi ma’i a tagata faigaluega, ae afai e ausia e le tagata faigaluega tulaga uma e aofia ai ma le atoa o le 30 tausaga o le tautua, e toese mai itula e 239 mai livi o lo o i ai, ona vaevae lea i le lua itula o lo o totoe, o le tupe e maua ai e aofia uma i le totogi faaiu o lea tagata faigaluega.

LIVI TAUSAGA

(a)            O tagata faigaluega tumau e tatau ona agavaa i latou i livi tausaga, ma o le faatulagaina la lea o ia livi

            (1) fa itula o piriota totogi e maua pe afai e i lalo ane o le 3 tausaga le umi o le tautua.

            (2) ono itula o piriota totogi e maua pe afai e i luga atu o le 3 tausaga e oo atu i le 15 tausaga le umi o le tautua, sei vagana ai le piriota totogi mulimuli o le tausaga e 10 itula e maua mai ai.

            (3) valu itula o piriota totogi e maua pe afai e i luga atu o le 15 tausaga o le tautua a le tagata faigaluega.

(f) O livi tausaga e le faaaogaina e le tagata faigaluega e tatau ona faaaoga i totonu o le tausaga pe afai e sili atu ma le 60 aso e le o faaaogaina.

(i) E le faatagaina le totogi tupe mo livi sei vagana ua faate’a le tagata faigaluega.

faaliliu Ausage Fausia