Na taua e sui o le Falema’i o le LBJ na molimau i luma o le komiti o le Soifua Maloloina a le maota o sui i le taeao ananafi e fa’apea, e ui e silia i le $1.1 miliona le tupe o le a fa’aitiitia ai tupe maua a le falema’i ona o le fa’aiuga e fa’aitiitia le $5 mai le totogi pe a vaai le foma’i, peita’i o lo o maualuga lo latou talitonuga o le a fesoasoani malosi tupe o lo o maua mai i le lafoga o totogi e 2%, e toe fa’atumu ai lea vaega tupe o le a le toe maua.

O se vaega lea o tali sa tu’uina atu e sui e to’alua a le LBJ ina ua fesiligia e le afioga i le ali’i faipule ia Vailoata Eteuati Amituana’i i le taeao ananafi, i se a’afiaga e ono fetaia’i ma le falema’i ona o le fa’aiuga e fa’aitiitia le $5 mai ni isi o ana tautua masani.

Na taua e Vailoata e fa’apea, o popolega o lo o nofo ma ia talu ona fa’asalalau e le Komiti Fa’afoe le latou fa’aiuga e fa’aitiitia ai totogi o pili a le falema’i, ina ne’i avea le naunau o le falema’i e tu’u atu se avega mama i le atunu’u ma itu e mamafa tu ai le latou avega e amo.

“O le mea moni e le tau fesiligia, afai e fa’aitiitia e le falema’i totogi o ana tautua i le $5, o le a tele se vaega tupe e le toe maua e le falema’i”, o le saunoaga lea a Vailoata ma ia fesiligia ai loa molimau pe fia se vaega tupe o le a le toe maua, ae na fa’amanino e le Teutupe fou a le LBJ o Pauline Gebauer, e tusa ma le $1.1 miliona le tupe o le a le le maua ona o le suiga i pili a le falema’i.

Na taua e Gebauer e fa’apea, ina ua mae’a le ulua’i fa’aiuga sa faia e le Komiti Fa’afoe e fa’aitiitia le isi $5 mai pili a le falema’i i le masina o Aperila o le tausaga nei, sa ia faia ai loa se suesuega i tulaga o tupe maua po o i ai se a’afiaga, peita’i i suesuega sa ia faia na manino ai, e silia ma le $1 miliona le tupe o le a le mafai e le falema’i ona toe maua.

Na fesili ni isi o faipule pe aisea na faia ai le faaiuga e faaitiitia pili a le falema’i, pe afai sa silafia lelei e le Komiti Fa’afoe e i ai le a’afiaga e tula’i mai ai, ae na saunoa le ali’i foma’i ia Dr. Victor Tofaeono e fa’apea, “o le fautuaga sa tuuina mai e le kovana ina ua fa’atoa ia tofia le Komiti Fa’afou ua i ai nei, ia toe fa’a fo’i pili a le falema’i i le tulaga tuai sa i ai, ina ia gafatia e le atunu’u, o le mafua’aga lena na talia ai e le Komiti Fa’afoe ma le talitonuga, e i ai isi auala o le a mafai ona toe faatumu mai ai tupe o le a le toe maua”.

Na fesili e le afioga i le tamaitai faipule ia Vui Florence Saulo i le molimau po o a auala e manatu le falema’i e mafai ona toe fa’atumu mai ai tupe o le a le toe maua, ae na saunoa le ali’i foma’i, “o le a fa’atuputeleina le aofa’i o tagata e o i le falema’i ina ua fa’aitiitia totogi o pili, aemaise ai le lafoga o le 2% o lo o maua mai i le tulafono na pasia e le fono”.

Na toe talosagaina e le alii foma’i le komiti ina ia silasila alofa i le tulafono na pasia mo le lafoga o totogi e 2%, ina ia fa’aauau pea e fesoasoani ai i auaunaga fa’atino a le falema’i.

Na taua e le ta’ita’ifono o le Komiti Fa’afoe ia Leilua Mase Akapo i luma o le senate i le vaiaso na te’a nei, o le tupe o lo o maua mai i le lafoga e 2% o lo o fa’atupe ai le polokalame lea e auina ai gasegase i fafo mo togafitiga, e matua manaomia tele fo’i e le falema’i le vaega tupe lea.

E le i fa’ataunu’uina i le aso Lulu na te’a nei le iloiloga na fa’atulaga e le komiti o le Sailiga o le Tamaoaiga a le maota o sui, e iloilo ai le tulafono ua i luma o le maota o sui e fa’amuta ai le lafoga o totogi e 2%.