Na taua e le Fa’atonu o le polokalame o lo o faatupe mai e le Ofisa o le Initeria e taua o le ‘Executive Leadership Development Program’ (ELDP), susuga Jason Aubachon lona talitonuga, o le polokalame tonu lenei e mafai ai ona maua ni isi e avea ma ta’ita’i o atumotu o le Pasefika o lo o i lalo o le vaavaaiga a le malo tele.

“O le autu o le polokalame lenei ua mafua ai ona fa’avaeina i totonu o atumotu o le pasefika o lo o i lalo o le Iunaite Setete, ina ia mafai ai ona aoao ma faaaupega alii ma tamaitai ua latou umia tofiga feololo i totonu o matagaluega ma ofisa tutotonu a le malo, ina ia aoaoina i latou i auala e mafai ai ona avea i latou ma ta’ita’i o le atunuu i le lumana’i.

I le atoa ai o le liima tausaga tal ona tatalaina lenei polokalame, na taua ai e Aubachon e faapea, e le gata o se avanoa e aoaoina ai tama fanau a le atunuu ia iloa tula’i mai e tauave le galuega fa’ata’ita’i, ae o se avanoa lelei fo’i lea e mafai ai e tupulaga talavou ona faasoa o latou manatu ma aikia i auala e fa’aleleia atili ai lea polokalame.

“O le fa’anaunauga o le Initeria, ia aoga lenei polokalame mo atumotu uma o le pasefika o lo o i lalo o le faamalumaluga a le Iunaite Setete, afai e le avea i latou ma ta’ita’i o le malo, e mafai fo’i ona avea i latou ma ta’ita’i o fa’auluuluga po o vaega tumaoti a le malo”, o le saunoaga lea a Aubachon.

O ni isi o i latou e to’a 20 sa auai i le vasega lea na faia i le vaiaso nei i Amerika Samoa, o lo o galulue i ni isi o ofisa e faauluulu i ai le malo e pei o le ofisa o le kovana faapea ai ofisa o faipule i le konekeresi ma faipule o le fono.

Na taua e Aubachon e faapea, o ni isi o sui o lo o filifilia i le polokalame a le ELDP e tofia mai e taitai o a latou atunuu, ina ia mafai ona faalautele atili lo latou tomai i auala faatino ai la latou pito laau mo le atina’eina o le tamaoaiga po o tulaga i le tausia o le soifua maloloina o le atu nuu.

Na taua e le susuga a Nikolao Pula i le Samoa News e fa’apea, e le tasi se matata e mafai ona aoaoina ai i latou uma e lesitala i lalo o le polokalame.

“E mafai ona koleni mai ai se tasi e avea ma taitai o le falema’i, po o isi matagaluega a le malo e pei o tulaga tau i le atina’e po o le matagaluega fo’i o aoaoga, atoa ai ma le matagaluega o le tupe”, o le saunoaga lea a Pula.

O ni isi o atunuu na taua e Aubachon ua fa’amanuiaina i le polokalame a le ELDP, o atumotu laiti e pei o Guam ma Palau, lea sa i ai ni isi na aoaoina i le polokalame ma filifilia ai e le malo e avea ma taitai e pei o le teutue a le malo po o le loia sili fo’i.

Saunoa le afioga i le ali’i senatoa ia Galea’i M. Tuufuli e fa’apea, o le taua o aoaoga faapenei aemaise ai o le taimi muamua lenei ua fai mai ai i Amerika Samoa lenei aoaoga, o le a maua ai e tama fanau a le atunu’u le avanoa e faalautele ai lo latou iloa ma le tomai i auala e faatino ai galuega a le malo.

Na taua e le alii senatoa e fa’apea, talu ai ua televave le tomai i le taimi nei i atumotu o le pasefika, ma ua manaomia ai ni taitai talavou e tula’i mai e iloa faatino le galuega, ua ia manatu ai, o se avanoa lelei fo’i lenei mo Amerika Samoa e aoao ai ana tama fanau i lenei polokalame, ina ia mafai ai ona avea i latou ma fetu pupula mo le atunuu i le lumana’i.

“E le gata ia aoao tupulaga talavou i le poto faaonaponei, ae taua fo’i le aoao i le aganuu, tu ma le tautala, aua o mea uma nei e tatau ona faailoa atu i soo se tasi e filifilia e avea ma taitai o lona atunuu, ina ia tausisi i le faamaoni ma le fia fai mea sili mo le atunuu”, o le isi lea saunoaga a Galea’i.

Na taua e Eric Nailay o Guam e faapea, o se avanoa taua lenei ua ia maua e faasoa ma aoao ai isi tomai faapitoa e lei oo i ai le malosi, ina ia faafaigofie ai ona faatino lana galuega pe a filifilia o ia e lona atunuu e galue i oe, ae sili ai o lona malamalama lea i le aganuu, tu ma le agaifanua a Amerika Samoa, aua e tai foliga tutusa lelei le aganuu a Guam ma le aganu’u a le malo o Samoa.

O le faanaunauga o le Initeria e pei ona saunoa Pula, ia mafai ona toe agava’a nisi fanau faapenei i le polokalame i isi tausaga, ina ia faa faigofie ai pea ona malaga mai i latou e aoao le gagana tu ma le aganuu iinei.