O lo o taofia i le falema’i i Fagaalu se ali’i pagota o lo o tuli sona fa’asalaga fa’a falepuipui i le toese i Tafuna i le taimi nei, ona o manu’a tuga sa a’afia ai o ia i le fa’aiuga o le vaiaso na te’a nei, e mafua mai i le fa’alavelave lea na toe fa’ao’olima i ai le isi ali’i pagota ia te ia.

O lenei mataupu na fa’ailoa mai e ni molimau i le Samoa News i le taeao ananafi, ma mafua ai loa ona fesiligia le afioga i le ali’i Komesina o Leoleo e tusa ai o le mea moni sa tupu.

Na fa’amaonia mai e le afioga i le ali’i komesina ia William E. Haleck i le Samoa News le taofia ai o se ali’i pagota i le falema’i o le LBJ i Fagaalu, ona o se manu’a na a’afia ai o ia, e mafua mai ina ua fa’ao’olima i ai se isi ali’i pagota.

“Pau fa’amatalaga e mafai ona ou fa’amaonia atu i le taimi nei, e to’atasi le ali’i pagota o lo o taofia i le falema’i ona o manu’a sa a’afia ai lona tino, e mafua mai ina ua fa’ao’olima i ai le isi ali’i pagota, e ala lea i lona fa’aaogaina o se a’upega maai, ae le mautinoa mai i le taimi nei pe o le a le matuia o le manu’a o lo o a’afia ai le ali’i o lo o manu’a, e le o iloa fo’i le mafua’aga tonu o lenei fa’alavelave,” o le saunoaga lea a le alii komesina.

Na fa’amaonia mai fo’i e le ali’i komesina e fa’apea, e le tatau ona tutupu fa’alavelave fa’apenei i totonu o le toese, aua e le tatau ona umia e pagota ni a’upega po o ni mea maai e ono mafai ona fa’ao’o ai manu’a i isi pagota.

“O lo o fa’aauau pea suesuega a leoleo i le taimi nei e tusa ai o le mea sa tupu, ma e i ai le talitonuga e tatau ona mae’a ia su’esu’ega i se taimi o le vaiaso nei,” o le saunoaga lea a le komesina.

Ae na taua e se molimau i le Samoa News e fa’apea, o le fa’alavelave na tula’i mai i le aso Faraile na te’a nei, ina ua fa’aaoga e se ali’i pagota matua se tama’i naifi e tui ai le itu o le ali’i pagota na a’afia ma manu’a ai.

Na taua e le molimau e fa’apea, o le fa’alavelave na tula’i mai i le taimi a’o taele le ali’i pagota na a’afia, ae fa’afuase’i loa ona alu atu le ali’i pagota ua tu’uaia ma fa’ao’olima i le ali’i pagota na a’afia.

Na taua fo’i e le molimau e fa’apea, e masalomia o le naifi na fa’aaoga na aumai i le umukuka a pagota, pau le itu e le o mafai ona manino, pe na fa’apefea ona o o le ali’i pagota ua tu’uaia ma le naifi i le paipa sa taele ai le pagota ua a’afia.

O le ali’i pagota o lo o tu’uaia i lenei fa’alavelave, o lo o tuli sona fa’asalaga fa’a falepuipui e 5 tausaga le umi.