O le ali’i pagota lea o lo o ia tuliina se fa’asalaga fa’afalepuipui e 9 tausaga, ina ua ta’usala o ia i lona i lona taumafai e susunu le latou fale ae o lo o i ai lona to’alua ma le la fanau, ua toe fa’aopoopo e le fa’amasinoga le isi 20 masina i lana fa’asalaga, ina ua ta’usala o ia i lona umia fa’asolitulafono o vaega o le laau fa’asaina o le mariuana.

Na fa’atoese le ali’i o Nathan Mauga i luma o le faamasinoga maualuga i le taeao ananafi e tusa ai o lana solitulafono sa faia, ma ia talosagaina ai se isi avanoa mo ia, ona ua lagona lona salamo e tusa ai o le mea sa tupu.

Sa ia fa’ailoa fo’i i le fa’amasinoga e fa’apea, e le gata ua ia iloa le leaga o le fa’a uo i tagata o lo o latou tagofia fualaau fa’asaina, ae ua aoga fo’i le taofia ai o ia i le toese ua mafai ai ona ia toe aoaoina se isi lesona aoga mo ia.

O le mataupu e pei ona ta’usala ai Mauga i luma o le fa’amasinoga, na afua mai i le fa’alavelave lea na maua ai e se leoleo o le falepuipui se afifi o lau mamago o le mariuana o lo o ia te ia, ina ua mae’a ona talosaga le ua molia i le leoleo, e fia alu e aumai lona solo taele o lo o tautau i le uaea.

Na avea le umi ona alu o Mauga ma itu na mulimuli atu ai loa i ai ma le leoleo i le vaega sa aga’i atu i ai o ia, ae na fa’ateia le ali’i leoleo ina ua ia vaaia le ua molia o lo o taumafai e taai se mea i lona lima, ma fa’atonu ai loa e le leoleo ia Mauga e avatu le afifi ia te ia ma iloa ai, o laau mamago o le mariuana sa i totonu o le afifi, lea e mafai ona maua ai sikaleti mariuana e 5 pe a taai.

Na talosaga le loia a Mauga o Joel Shiver i le fa’amasinoga maualuga ananafi, ina ia fa’amama se fa’asalaga mo le ua molia, ona o lo o ia tuliina fo’i se fa’asalaga mamafa e 9 tausaga le umi, peita’i na finau le loia a le malo ia Tiffany Oldfield i le fa’amasinoga, e fa’asala Mauga i le 5 tausaga i le toese, ona o le matuia o le solitulafono sa ia faia.

E 5 tausaga na manatu le fa’amasinoga e fa’aopoopo i le fa’asalaga a Mauga, ma o lea fa’asalaga fa’atoa tuli pe a mae’a ona tuli lana fa’asalaga o lo o tuli i le taimi nei, ae ua manatu ali’i fa’amasino, o le a fa’amalumalu le tuliina e Mauga o le 5 tausaga, ae o le a nofovaavaaia o ia mo le 5 tausaga i lalo o poloaiga a le fa’amasinoga e ao ona ia usita’i i ai.

O ni isi o ia poloaiga e aofia ai lona tuliina o masina e 20 i le toese, atoa ai ma le fa’asa lea ona ia toe tagofia fualaau faasaina po o le ‘ava malosi, o le a mafai fo’i ona su’esu’eina lona tino i so o se taimi ina ia fa’amaonia ai, na te le o toe tagofia fualaau fa’asaina po o le ‘ava malosi.