O se tala fiafia lenei mo le Aufai Pisinisi i le atunu’u, o le a tele se vaega tupe e mafai ona latou nono mo le atina’eina o a latou pisinisi, ina ua talia e le Vaega e Vaavaaia Atina’e mo le Tamaoaiga o pisinisi a le malo tele (Economic Development Administration - EDA) se talosaga sa tu’uina atu e le Matagaluega o Fefa’atauaiga ma Alamanuia (DOC), e fa’aopoopo ai vaega tupe e mafai ona nono e le aufai pisinisi.

E $600,000 le vaega tupe lea ua fa’aopoopo e le EDA i le polokalame e taua o le ‘Revolving Loan Fund Program’ mo Amerika Samoa, lea o lo o fa’atautaia e le Matagaluega a le DOC, e pei ona taua i se pepa o fa’amatalaga sa sainia e le Fa’atonusili o le Matagaluega, susuga Keniseli Lafaele.

Na taua e Lafaele e fa’apea, o le mae’a ai ona iloilo e le EDA o le talosaga sa tu’uina atu a Amerika Samoa, sa latou taliaina ai loa ma pasia le fa’aopoopo o lenei vaega tupe i lalo o le polokalame, ina ia mafai ai ona fesoasoani i le atina’eina o pisinisi i le teritori.

Sa ia taua fo’i e fa’apea, i se tusi sa tuuina mai e le EDA e fa’ailoa mai ai le taliaina o le talosaga, o lo o tuu fa’atasi mai ai ma fa’amanuiaga i le DOC i lo latou unaia o auala e atina’e ma fa’aleleia ai pisinisi, peita’i o le a fuafua lava le taliaina i le tulaga avanoa mo vaega tupe e fa’atino ai manaoga e pei ona taua.

Na faamanino atili e Lafaele e fa’apea, o le tau o le poloketi o lo o fuafua e tusa ma le $600,000, lea e aofia ai le $480,000 o lo o fa’atupe mai e le EDA i lalo o le polokalame e taua o le ‘Economic Adjustment Assistance Program’.

Sa ia taua fo’i le talosagaina e le EDA o Amerika Samoa ina ia tu’uina atu sa latou Fuafuaga Fa’ataoto e fa’ailoa atu ai le mulimulita’i o le teritori i ta’iala ma tulafono mo le fa’aaogaina o vaega tupe fesoasoani nei, ma o lea talosaga e tatau ona fa’ao’o atu ia Iuni 2, 2014.

Ua mae’a ona tu’uina atu le tusi e pei ona talosagaina, ae o le isi tusi o lo o fa’atali i se fa’amaoniga mai le Komiti Fa’afoe o le Faletupe o Atina’e, a o le i tu’uina atu ina ia tusa ai ma le aso e pei ona fa’atonuina, e pei ona fa’amaonia e le susuga Lafaele.

O le polokalame lenei o lo o mafai ona fesoasoani ai i le atina’eina o pisinisi i le teritori, i lalo o ni fesoasoani tau tupe o lo o tu’uina mai e le malo tele, na amata fa’atautaia mai mo Amerika Samoa i le 1995, i lalo o le fa’atautaiga a le DOC.

O lenei polokalame o lo o mafai ona fesoasoani ai i le itu tau tupe mo le amataina o pisinisi fou i totonu o le teritori, talu mai le 30 tausaga ua tuana’i.

“O le polokalame lenei ua avea ma auala taua e mafai ai ona maua e le aufai pisinisi auala e fesoasoani ai i le itu tau tupe mo le pisinisi, ma ua mafai ai fo’i ona fesoasoani i le tele o pisinisi i totonu o le teritori, mo le amataina atoa ai ma le maua ai o avanoa faigaluega mo isi tagata,” o se vaega lea o le saunoaga a Lafaele.

fa’aliliu Ausage Fausia