Ads by Google Ads by Google

Fa’asamoa Initiative:To’atele gasegase sa gasolo atu

E ta ane le fitu i le taeao ananafi, ua leva ona tutumu nofoa i totonu o le falema’i itumalo i Tafuna, ona ua silafia e le to’atele, e i ai lo latou avanoa e va’aia ai foma’i fa’apitoa mai le Fa’asamoa Initiative a le Polamalu Foundation.

 

E leai se tasi na te’ena, peita’i e na’o le to’a 60 gasegase na manana’o foma’i fa’apitoa nei latou te va’aia i le aso ananafi, ae o le aofa’i o i latou na lesitala mo lea talavai e 116 na fa’amauina.

 

Ona sa i ai nisi foma’i masani a i tatou i le Primary Care i Tafuna lava, sa fa’afaigofie atili ai ona siakia le to’atele, peita’i o nisi o gasegase sa mana’omia lava e i latou ona va’aia foma’i na malaga mai ma le Fa’asamoa Initiative.

 

“O a’u latou o lo’o mana’o e fia va’aia foma’i nei, ona o lo’o i ai sa’u filifiliga e fia faia, e tusa o ma’i ua mae’a ona faia ai lo’u ta’otoga, ae ua ese le isi ituaiga tiga ua fa’alogoina, ae sili ona ou mo’omia ona va’aia i latou nei mo se va’aiga lona lua, e ese mai a’u foma’i masani, ina ia faia ai sa’u fa’aiuga tatau mo a’u,” o se tala lea a se tasi o tina sa le manatu ina ia fa’ailoa lona suafa, ae na o’o ane e le’i taina le fitu i le falema’i itumalo i Tafuna.

 

O nisi na o ituaiga gasegase sa gasolo atu, ua leva ona faia talavai i fafo, ma i’inei fo’i, ae o se isi lava va’aiga e mo’omia ina ia una’ia malosi ai ni a latou fa’aiuga fai ae a se togafitiga mo i latou.

 

“E ui ina sili mamao le faitau aofa’i o i latou na mana’o foma’i fa’apitoa o le Fa’asamoa Initiative latou te va’aia, ae na latou iloa lelei le mo’omia o le latou tautua ma sa latou va’aia ai le to’a 100 o i latou, ae o le isi to’a 16 ua fa’amuamua nei i le lisi mo le aso Faraile,” o se lipoti lea a le tama’ita’i o Silika Young Similai.

 

O se tasi o mea taua na tupu i le aso ananafi i le falema’i i Tafuna, ona o lo ua mafuta mai le vaega a le Medsphere, o i latou nei o lo ua mafaia ona fa’ata’atia le polokalama fa’akomipiuta ua mafai ai ona feso’ota’i fa’amaumauga i falema’i e lua, le Tafuna Dispensary ma le LBJ Medical Center i Faga’alu. Ua mafai ona taina mai i Tafuna le suafa o le gasegase, ae va’aia uma fa’amaumauga a foma’i i ana talavai sa faia i Faga’alu ae maise o ituaiga vaila’au ma togafitiga sa faia i lea gasegase i taimi na faia ai ana talavai i Faga’alu.

 

E to’atolu i latou na latou na auai i ananafi i le falema’i mo le va’aiga maumaututu pe o aluga lelei lea suiga o feso’ota’iga o galuega fa’amaumau i le va o falema’i e lua, aua o le ulua’i aso fo’i lea ua amatalia ai lea faiga fou ma le lelei mo falema’i ae maise o gasegase fo’i.

 

O sui e to’atolu o lo’o i ai nei o le Medsphere i Tafuna e aofia ai Jo Anne Drake, Holly Robinson, Sharon Bowen ma le ali’i e to’atasi o Justin Coker o le latou ali’i inisinia po’o le Technical services lena.