E o o mai lava i le taimi nei o lo o fa’atali pea le malo o Amerika Samoa mo le toe fa’afo’iina mai o lana tupe e $1.3 miliona, lea na ave ese faasese ma tuuina atu i le faletupe o Vietnam i le tolu tausaga talu ai.

O le tali lea a le Loia Sili a le malo ia Talauega Eleasalo Ale, ina ua fesiligia o ia e le afioga i le ali’i senatoa ia Gaea Perefoti Failautusi, i le vaiaso na te’a nei ina ua iloiloina e le Komiti Soofa’atasia le Fono le Paketi a le Ofisa o le Loia Sili mo le Tausaga Tupe fou 2016.

Saunoa Gaea e fa’apea, e taua tele le toe fa’afo’i mai o le tupe lea, e fesoasoani ai i ni isi fo’i manaoga a le malo o lo o tula’i mai i le taimi nei i le itu tau tupe.

Saunoa Talauega e fa’apea, o le tupe e $1.3 miliona lea o lo o i ai i le Faletupe i Vietnam, sa i ai le fa’amoemoe e toe fa’afo’i mai i le amataga o le tausaga nei, e tusa ai o feutaaiga sa faia i le va o le malo a Amerika Samoa ma le malo o Veitnam, ae ina ua malaga atu le ali’i kovana i le amataga o le tausaga nei i se fonotaga sa faia i le laumua i Uosigitone, na maua ai i ripoti ua toe taofia e le malo o Veitnam le vaega tupe.

“O lo o fa’aauau pea ona galulue le faigamalo ma le Matagaluega o Setete a le malo tele, fa’apea ai le Matagaluega o Fa’amasinoga, mo le faia o feutanaiga atoa ai ma le tau sailiina o se auala e toe fa’afo’i mai ai le tupe a le atunu’u,” o le saunoaga lea a Talauega.

O le masina o Aokuso 2011 o lo o tu’uaia na sese ai ona uaea lenei vaega tupe a le malo o Amerika Samoa, i totonu o se teugatupe i le Faletupe i Vietnam, ma, talu mai lava lea taimi e o o mai i le taimi nei, o lo o i ai pea lenei vaega tupe i Vietnam e le o mafai ona tauaaoina e le malo o Amerika Samoa.

I le fesiligia ai e sui o le Komiti Soofa’atasi o tulaga tau tupe mo le faigamalo, na fesiligia ai e le ali’i faipule ia Larry Sanitoa le Loia Sili, i le vaega tupe a Amerika Samoa o lo o maua mai i le Maliliega o le Tapa’a (Tobacco Settlement).

Saunoa Sanitoa e fa’apea, e tusa ma le $2 miliona le tupe e tatau ona maua mai e Amerika Samoa i tausaga uma lava i le maliliega o le tapa’a, ae foliga mai i le paketi mo le tausaga tupe fou 2016, e na o le $500,000 le tupe lea o lo o fa’atulaga e tatau ona maua mai.

Saunoa Talauega e fa’apea, e o o fo’i ia te ia na te le iloa tonu pe fia sa’o le aofa’i o le tupe e tatau ona maua mai e le malo i le maliliega lea o le tapa’a, pau le itu o lo o ia manatua, e lua auala o lo o maua mai ai e Amerika Samoa le vaega tupe lea, e $1.2 miliona o lo o maua mai i le isi vaega o le maliliega, ma le $800,000 o lo o maua mai i le isi fo’i vaega o le maliliega.

Ae talu ai o lo o i ai se nonogatupe sa faia i le va o le malo o Amerika Samoa ma le Matagaluega a le Initeria (DOI) i tausaga ua mavae, o iina lea o lo o alu i ai le isi vaega o le tupe pe a ma le $800,000 e totogi ai le nonogatupe lea, se’i vagana ai le $1.2 miliona o lo o aga’i mai i le malo i tausaga ta’itasi, ae o lea fo’i vaega tupe ua aga’i ina fa’aitiitia.

O nisi o fesili i le iloiloga sa fesili ai le afioga i le ali’i Senatoa ia Magalei Logovi’i i le Loia Sili, i tupe o lo o totogi mai e kamupani va’alele e totogi ai ova taimi a tagata faigaluega a le Ofisa o le Tiute, ae foliga mai e le o sa’o le auala o lo o fa’aaoga i ai tupe ia.

Saunoa Magalei e fa’apea, ua to’atele tagata faigaluega a le Ofisa o le Tiute o lo o muimui ma fa’asea, i le le totogia lea o a latou itula ova taimi, ae ua fa’aaoga e le malo le tupe lea e maua mai i kamupani va’alele e fa’a faigaluega ai isi tagata faigaluega fou.

Na fa’ailoa e Magalei ia Talauega e fa’apea, e leai se vaega o le tulafono o lo o taua mai ai le fa’aaoga o tupe o lo o pili ai e le malo kamupani va’alele, e totogi ma fa’a faigaluega ai ni isi tagata faigaluega fou.

Saunoa Talauega e fa’apea, e le na o le Ofisa o le Tiute o lo o a’afia i le fa’afitauli lea, ae o lo o a’afia ai fo’i ma le Ofisa o Femalagaaiga, i latou o lo o tautua i le Malaeva’alele i taimi e taunu’u mai ai malaga a va’alele i po.

“O le tulaga o ova taimi ma le finagalo o le ali’i kovana, o lo o taumafai ai pea e fai se auala e tutusa ai gaioiga uma o lo o faia ma le tulafono, e tatau fo’i ona silafia e le Fono le agaga o le ali’i kovana, ia maua avanoa e fa’a faigaluega ai ni isi o nai tagata o lo o tau saili ma fia maua ni galuega,” o le saunoaga lea a le loia sili.

Sa ia taua fo’i e fa’apea, o ni isi fo’i o taimi atonu e le o totogia ova taimi o tagata faigaluega nei, ae o lo o fa’aaoga isi auala e fa’apaleni ai a latou itula faigaluega, ina ia aua ne’i toe a’afia le malo i se taimi o i luma i tulaga o itula ova taimi o tagata faigaluega.

Na fesili Magalei i le loia sili, po o fea le suiga o le tulafono lea sa ia folafola e fa’aulu i se taimi o i luma, ina ia mafai ai ona fa’aaoga tupe o lo o pili ai kamupani va’alele e faa faigaluega ai tagata faigaluega fou, ae na saunoa le loia sili, o lo o galulue ai pea loia i le tapenaina o suiga o le tulafono.

O popolega o le afioga a Magalei, lea fo’i sa avea ma Teutupe i le  nofoaiga a Togiola, ina nei avea le le mulimulita’i o le malo i le tulafono ma auala e toe a’afia ai le malo i se taimi o i luma, i le fa’atamala lea e totogi ova taimi o tagata faigaluega.