Ua fa’atali nei se fa’aiuga a le fa’amasinoga maualuga fa’asaga i le tina, lea na taumafai e fa’aulufale fa’asolitulafono vaega o le laau fa’asaina o le mariuana i le toese i Tafuna i le amataga o le tausaga nei, i ni fautuaga mai loia o lo o aofia i le iloiloina o le mataupu a le ua molia.

O le aso a taeao lea ua faatulaga e le alii faamasino sili ia Michael Kruse e toe valaau ai le mataupu a Teroa Faletoi, lea o lo o taofia pea i le toese i le taimi nei, e aunoa ma se tupe ua fa’atulaga e tatala ai o ia i tua.

E le gata ua ta’usala e le fa’amasinoga maualuga Faletoi i le solitulafono o lona umia faasolitulafono o vaega o le laau faasaina o le mariuana, ae ua ta’usala fo’i o ia i lona le usitaia o tuutuuga o lana nofovaavaaia e 2 tausaga, ina ua ta’usala o ia i le tausaga na te’a nei i moliaga mama e lua, o le umia faasolitulafono o se fana atoa ai ma pulu fana.

Na fa’ailoa e Kruse i loia a itu e lua i le aso Faraile na te’a nei e fa’apea, e lua vaega tetele e tatau ona taula’i i ai fautuaga a loia, ona o itu fo’i ia o lo o mamafa i ai le silasila a le fa’amasinoga, fa’asaga i poloaiga sa tuuina atu ia Faletoi i le tausaga na te’a nei na te tausi ma usita’i i ai.

O ia itu e pei ona saunoa Kruse, o le salatupe e $2,000 na poloaina o ia e totogi, peita’i e o o mai lava i le taimi nei e lei totogiina ma se mea, ma le poloaiga na te tuua ai le teritori ae toe fo’i atu i lona atunuu na malaga mai ai, pe afai na te solia se isi poloaiga a le fa’amasinoga.

Na fautuaina malosi e Kruse le loia a le malo ia Tony Graf atoa ai ma le loia a Faletoi ia Karen Shelly, ina ia aga’i tonu a laua fa’afinauga i mataupu ia, ona o iina lea ua sauni le fa’amasinoga a fa’aautu i ai lana fa’aiuga.

Na augani Faletoi i le fa’amasinoga mo se isi avanoa sei toe fa’aleleia ai lona olaga ua fa’aletonu, ona o lona le usita’i atoa ai ma lona le fa’alogo i ona matua.

Na fesili Kruse ia Faletoi pe ua uma ona ia faatoese i lona tina e tusa ai o lana solitulafono lona lua lea ua toe fai, ae na tali le ua molia ioe.

Na toe fesili Kruse ia Faletoi pe ua talitonu la lona tina i lana fa’atoesega lona lua lea ua fai atu, ae na leai se tali a le ua molia, ona saunoa loa lea o Kruse, “afai e le talitonu lou tina i lau fa’atoesega lona lua lea ua fai mai nei, e fa’apefea foi la ona ma talitonu i ai ma Logoai [Siaki]”.

E tusa ai ma faamaumauga a le faamasinoga, o Faletoi na alu e asi le ali’i o lo o avea ma ana uo tama o lo o loka i le falepuipui, ae maua ai o ia e leoleo i le faitoto’a o le falepuipui, o lo o ia taumafai e ave faanana mariuana i totonu.

O mariuana e pei ona taua e le malo, na sa i totonu o se mea na afifi i se pepa ‘foil’, lea na teu e Faletoi i totonu o le isi seevae o le pea seevae na alu atu ma ia e avea ma lana uo, le ali’i o Sam Tupuola.

O Tupuola o lo o tuli sona faasalaga faafalepuipui, ina ua tausala o ia i lona umia faasolitulafono vaega o fualaau faasaina o le aisa, ina ua osofaia e leoleo lana taavale ma le la taavale ma Faletoi i le tausaga na te’a nei.