Ua talosagaina e le Matagaluega o le Soifua Maloloina le malo le atunu’u atoa, ina ia tutu fa’atasi e fa’ataua soifua o i latou uma ua fa’asaoina mai i le gasegase o le kanesa, a o avea ai le masina lenei o Iuni o le masina e fa’ataua ai i latou nei i le lalolagi.

O le fa’atauaina o le masina lenei mo i latou ua fa’asaoina mai i le gasegase o le kanesa, na amataina lea i se sauniga lotu sa faia i le taeao ananafi.

“O se aso taua e tatau ai ona tutu faatasi le atunu’u e ave la latou lagolago ia i latou ua mafai ona fa’asaoina nai i lenei gasegase faigata”, o le saunoaga lea a le Fa’atonusili o le Soifua Maloloina ia Motusa T. Nua i le Samoa News.

O le vaiaso foi na te’a nei na faalauiloa ai i le kapeneta a le alii kovana le tatau lea ona tutu faatasi taitai o le atunuu e faailoa lo latou lagolagoina o lenei polokalame taua mo le atunuu atoa.

O le taua o le auai o le atunuu e faailoa lo latou lagolagoina o lenei faamoemoe e pei ona saunoa Motusa, o le a faailoa atu ai ia i latou uma sa aafia i lenei gasegase, le amanaia ma le manatu alolofa atu o uo ma aiga ina ia lagolago taumafaiga uma mo i latou, a o latou finau ai e tete’e atu i lenei gasegase faigata.

I se polokalame sa faalauiloa e le Matagaluega o le Soifua Maloloina i luga o le KVZK-TV i le vaiaso na te’a nei, na taua ai le to’atele o le mamalu o le atunuu ua fa’amaonia le a’afia i lenei gasegase talu mai tausaga e tele ua mavae, ma o le to’atele o ni isi o i latou nei ua maliliu ona o tulaga tuga o le gasegase, ae o ni isi o lo o soifua pea e o o mai i le taimi nei, ma o lo o latou finauina pea tulaga faigata o le gasegase.

Sa taua fo’i i ia fuainumera le silia ma le 300 ua faamaonia le aafia i le gasegase lenei talu mai le tausaga e 2010, mai lea aofa’i, toeitiiti lava o le o le 50% o i latou nei e talitonu ua maliliu ona o auga tuga o le gasegase.