O le aso malolo na tea nei na faia ai se mafutaga tuu faatasi a autalavou a le Sinoti a le ekalesia Metotisi i Amerika Samoa, i le nofoaga autu i Tafuna. O le sauniga na tatala aloaia ai lenei faamoemoe, na taitaia lea e le Sea a le ekalesia, susuga Rev. Lokame Malaesilia

O lea mafutaga e aofia ai taaloga e pei o le lakapi taitoa 7, volipolo, ma isi lava ituaiga taaloga na mafai ona faafiafiaina ai tupulaga talavou a le ekalesia, ma o lea aso ma taaloga na vaaia ai le toatele o tama fanau a le ekalesia o loo i ai le taleni i soo se taaloga.

E amata mai i Alofau, Fagaitua, Lauli'i, Leloaloa, Vatia, Pago Pago, Fagatogo, Nu'uuli, Tafuna (Fagaima), Tafuna a (Susana Uesele), Futiga, Pavaiai, Leone, Malaeloa, Failolo ma Poloa.

Na saunoa mai le Afioga i le Sea, "O le fa'aiuga o le tausaga lea e faia ai le Camp po'o Mafutaga i Faleula, i Upolu, mafutaga lea e faia i le ta'ilua tausaga ma faia a le Pasifika."

O lea mafuataga e o mai ai Autalavou i Niu Sila, Ausetalia, e masani ona o mai ai fo'i Autalavou mai i Hawai'i ma le Amerika fa'apea ai ma Tonga i nisi mafutaga.

Na saunoa mai le Sea, "O mafutaga na, e fai ai tauvaga i tala, pese (fa'a-le-lotu), fa'a-evagalia, volleyball, kirikiti fa'a-Samoa e tofu lava le mea ma le siamupini."

Saunoa mai a ia, "Ana leai le mafutaga lenei o le Pasifika i le vaitaimi o le kerisimasi, semanu e fai fo'i le isi mafutaga fa'a-Sinoti i le vaitaimi o le kerisimasi. O lana lagona lena, e pei o le alofa i 'au-lotu ta'itasi, i le latou tautua e ala e mea e fai i mea fa'atino e ala mai ai manuia."

I le aso Sa lea na te'a atu nei, le Aso Sa lea na fai ai le Fa'amanatuga, lea na tete'i ai le 'Matagaluega a Malaeloa, i le tu o le tama o le latou fa'a-sinoti ua latou lolotu taeao i le fa'amanatuga i le Tino Maliu ma le Toto a lo tatou Fa'aola i masina ta'itasi.

Sa mae'a el sauniga lotu, ua susu ifo lea o le Sea i sana tautalaga fa'amalosi 'au, i le mamalu o le matagaluega, saunoa mai a ia, "Oute le'i sau e fa'avevesi ona o le tou vaai mai ia te 'au, ae ua sau e tatou fai tapuaiga fa'atasi, ma se'i avatu i lou fa'afetai i a te outou."

Ia na fesiligia fo'i le Afioga i le ali'i Sea, po'o le a sana finagalo i ai i le mau lea na ave i le fono i fausiaina lea o Hall o le Sinoti.

A fai mai a ia, "Ua leva ona tu'u mai e le Ekalesia e amata mea latou i le faiga o le Hall ua uma ona tu'u mai le avanoa ona fesoasoani lea i ai o le  Ekalesia Aoao i le latou galuega."

Ona saunoa mai ai lea o le Sea, "O le mea lea e tupu, e leai se tupe o totoe nei, mo le galuega o totoe. Ona o le mea lea ua tupu, e tatau ona toe fai le sailiga a tupe e toe faia ai le Hall. O le isi mea o le toe fono lava o le 'au faufautua o le galuega i ai le Sea, failautusi o le Ekalesia ma le 'au puletua o le Sinoti."