Ads by Google Ads by Google

Fa’atautaia JROTC Aoga Maualuga Manumalo

Mai le aso 6 Aokuso, 2012, na amata fa’atautaia ai le Polokalama JROTC i le a’oga a Manumalo Baptist High School i Malaeimi.

O lenei avanoa, sa fa’ailoa mai e Gen. Mapu Jamias o le Ofisa autu o le JROTC Program i le teritori, sa ia fa’ailoa mai, o le talosaga lenei sa fa’aulu mai e le Manumalo High School e lua lelei tausaga o latou tatali ma taumafai e o’o i le sini, o le talia mai e amata a’oa’oina ai ‘tomai amata’ e a’otau ai o se ‘Fitafita o le Vaega ‘Au’ i le polokalama JROTC.

O lo’o ua mae’a tofia le ali’i faia’oga mo lea polokalama  i Manumalo Baptist High o SFC Tufele, ma ua ia fa’ailoa mai, “O lo ua va’aia le naunauta’i o le fanau a’oga, ma ua ‘ese fo’i le fa’agae’etia loto o le fanau ina ua amatalia lenei polokalama i le latou laumua. Ua iloga mai, e le tu’umamaina fo’i e Manumalo Baptist lo latou avanoa ua leva o tatali ia maua mai!”

O le aofai o tamaiti uma lava ua mae’a lisia suafa i le latou polokalama i le a’oga maualuga lea, e to’a 53 i latou. E la’eia e i latou uma nei le toniga a le JROTC i Amerika Samoa i le aso Tofi, ma e amata mai i le sisiga o le fu’a i le taeao a le a’oga atoa, o le a fa’atino ai e lea vasega le sisiga o le latou Fu’a Amerika, Fu’a Amerika Samoa ma le Fu’a a le A’oga Manumalo Baptist School.

Ua fa’ailoa mai e SFC Tufele, “O lo’o i ai sina fa’aletonu i le toniga, ona ua ‘ese’ese mamao tino o le fanau ua auai, o nisi ua lapopo’a tele, ae o nisi fo’i ua pa’e’e tele, a’o o nisi fo’i ua pupu’u tele, ae o i latou uma lava, e ao ina tofusia ma le toniga. Talosia, ae mafai ona fa’atoniga uma e le matou ofisa i latou i le aso Tofi nei.”

Pe afai o le a mae’a a’otauina le fanau i tiute ma le tomai mo’omia e fa’atino ai e i latou o latou tiute fa’afitafita amata, o le a i ai se isi fa’aulufalega aloa’ia o le JROTC Manumalo Baptist High School JROTC i le polokalama aoao i le teritori, e mafai ai fo’i ona tauva i latou fa’atasi ma isi a’oga, i so’o se ituaiga tomai ua alagatatau ona agava’a ai.

O lea aso, e le o mautinoa, ae o le vave lava ona fa’ailo e le faia’oga JROTC, SFC Tufele, i le latou Ofisa autu ua agava’a le fanau aoga mo ia ituaiga o tauvaga i le va o JROTC i a’oga maualuluga i le tatou teritori, o le a vave mai fo’i lena aso fa’ailogaina mo le a’oga ma le fanau a’otauina i Manumalo.

I le taimi nei, ua na’o le fanau a’oga i le Grade 9 - 12 ua aofia i lenei polokalama i le Manumalo Baptist. Ua numera fitu nei le Manumalo Baptist High i le lisi o a’oga i le tatou teritori ua fa’atautaia ai le Polokalama JROTC.