ma Senatoa Itumalo Maoputasi ...

Ua aloaia nei le avea o le afioga i le Maopu ia Uti Petelo, 69 tausaga le matua o lona soifua ma Senatoa mo le Itumalo o le Maoputasi mo le afioaga o Aua, Leloaloa, Atu’u, i le mae’a ai lea o se sauniga fa’apitoa sa faia i le taeao ananafi i luma o le maota maualuga, lea na fa’atautoina ai o ia e le afioga i le ali’i Fa’amasino ia Logoai Siaki.

A o le i faia sauniga e fa’atauto ai le afioga Uti, na muamua tofia e le Peresetene o le Senate ia Gaoteote Palaie Tofau se Komiti Iloilo a le Senate, latou te iloiloina tofiga a le Itumalo mo Uti, ina ia tusa ai ma tulafono a le maota.

O sui e to’atolu sa auai i le Komiti Iloilo e aofia ai le Sui Peresetene ia Nuanuaolefeagaiga S. Nua, o ia fo’i lea o le ta’ita’i komiti, o le afioga i le Maopu ia Soliai T. Fuimaono ma le afioga a LeAtualevao Sosene Asifoa.

E le i atoa se 2 minute na iloilo ai e le Komiti tofiga a le Itumalo, ae tu’uina atu loa la latou fa’aiuga i luma o le maota e pei ona fofogaina e le afioga a Soliai, e fa’ailoa ai lo latou lagolagoina o tofiga a le itumalo fa’asaga ia Uti, ma ua latou taliaina fo’i le leai o se vaega e ono fa’alavelave ai i le fa’aiuga a le Itumalo ua faia.

O le afioga i le ali’i peresetene na taliaina le ripoti, ma valaaulia fa’apitoa ai loa le ali’i fa’amasino mo le fa’ataunu’uina o le sauniga o le fa’atautoga o le ali’i senatoa.

Na tau fai pati uo ma aiga aemaise ai ni isi o le tapuaiga a le itumalo a le afioga i le ali’i senatoa sa fa’atumulia ai totonu o le maota fono a le senate, i le taimi na mae’a ai ona fa’atauto le afioga Uti, fa’apea ai ma le taimi na alala ai i luga o le nofoa o le itumalo mo le ulua’i taimi.

O le afioga i le Tama’ita’i o le Ao na fa’afeiloaia le toai taunuu o le afioga Uti i totonu o le maota, ma ia faafetaia ai tofiga a le Itumalo ua mafua ai ona filifilia o ia e fai ma sui o le afioga a Faumuina.

Saunoa Gaoteote e fa’apea, o le agaga fiafia ia te ia, o le maua lea e tupu ma tamali’i o le atunu’u o le avanoa latou te nofoia ai le maota o le atunu’u.

O le afioga a Uti na fa'atauto i le aso tonu na mae'a ai aso o le Tauaofiaga lona fa o le nofoaiga lona 33 a le Fono Faitulafono i le aso ananafi, ma ua fa'amoemoe o le vaiaso fou e amata nofoia ai le Fono Fa'apitoa lona tolu ua valaaulia e le alii kovana mo le umi e le silia ma le 10 aso.