Na fa’atonu e le fa’amasino sili ia Michael Kruse se ali’i talavou i le taeao ananafi, ina ia alu atu sauni ma sana ato lavalava i le taimi o le isi ana iloiloga lea ua fa’atulaga mo le aso 27 Aokuso 2014, aua e le iloa le mea e tupu ai, pe te’i ua pa ai loa iina lana nofo vaavaaia ma toe fa’afo’i ai loa o ia i totonu o le toese.

“Afai e te toe sau i le aso 27 Aokuso e tumau lava au alofaga i le totogiina o le tupe lea na faatonu oe e le faamasinoga e totogi, ona e sauni lea e te toe alu i totonu o le toese, ae sau sauni i le aso lea, sau ma aumai sau ato”, o le saunoaga lea a Kruse i le ali’i o Patrick Upusili.

E ta’i $2,600 le vaega tupe na poloaina e le fa’amasinoga ia Upusili ma Tusi la te totogi i le McConnell Dowell i totonu o le ulua’i 6 masina o le la nofova’ava’aia, lea na amata mai i le masina o Novema 2013.

O ananafi na faatulaga e iloilo ai e le faamasinoga le tulaga o lo o i ai le nofovaavaaia a Upusili ma Billy Tusi, talu mai le aso na lau ai le la fa’asalaga i le faaiuga o le tausaga na te’a nei, ina ua ta’usala i laua i moliaga o le faaleaga mea totino, e mafua mai i le fa’alavelave lea na la fa’aleagaina ai masini fai auala a le kamupani o le McConnell Dowell.

Na muamua valaau le mataupu a Tusi fa’atoa valaau ai le mataupu a Upusili, e ui e tasi lava le la loia fautua, le tama’ita’i ia Karen Shelly, ae o le ali’i loia sili lagolago ia Tony Graf na tula’i mo le itu a le malo.

Ina ua valaau le mataupu a Tusi, na talosagaina ai e lana loia le faamasinoga ina ia aloaia le fautuaga a le ofisa faanofovaavaaia, ae toe tolopo i le aso 27 Aokuso le isi iloiloga, sei saili se galuega a Tusi e totogi ai lana salatupe.

Na fesili Kruse ia Shelly, faapefea pe a o o atu i le aso lea ae le i maua se galuega a Tusi e totogi ai le tupe ua uma ona poloaina o ia e totogi, na tali le loia a le ua molia, “Ona tuu atu loa lea i le ofisa nofovaavaaia latou te faila se talosaga i le faamasinoga e faaleaoga ai tuutuuga o le nofovaavaaia”.

“O anafea na aveea ai oe ma tagata fai polokili”, o le fesili lea a Kruse ia Shelly, “O le tagata fai polokiki e le tali sa’o mai i le fesili e avatu”, o le isi lea saunoaga a Kruse ma ia faatulaga ai loa le mataupu a Tusi e toe valaau i le aso 27 Aokuso.

Na faapena foi le talosaga a Shelly ina ua valaau le mataupu a Upusili i luma o ali’i fa’amasino.

Sa ia talosagaina le faamasinoga ina ia talia le fautuaga a le ofisa faanofovaavaaia, e faaauau pea ona usita’i le ua molia i isi poloaiga o lana nofovaavaaia, ae toe tolopo mo se isi aso ina ia maua ai le avanoa e totogi faamaea ai e le ua molia le tupe na poloaina o ia e totogi.

E tusa ai ma faamaumauga a le faamasinoga, e na o le $200 le tupe lea ua maea ona totogi e Upusili, ae na faatoa totogi fo’i i le aso Tofi na te’a nei ina ua ia iloa o le aso Faraile e sosoo ai lana iloiloga.

Na taua e le loia a Upusili i le faamasinoga e fa’apea, o Upusili lea ua maua le avanoa e faigaluega ai i le kamupani a le McConnell Dowell.

O Upusili ma Tusi na ta’usala i lo la fa’aleagaina o masini fai auala a le McConnell Dowell sa paka i se vaega o le afioaga o Aua.

Na fesili Kruse ia Upusili pe fia lona totogi e maua i le vaiaso, na tali le ua molia, e i le va o le $200 i le $300 lona totogi e maua i le vaiaso, ae o le aso 4 Fepuari 2014 na amata faigaluega ai.

“O le a la lau mea sa fai i lau siaki?” o le isi lea fesili a Kruse ia Upusili, ae na tali le ua molia, “sa ave lo’u tina i Upolu mo lana talavai.”

Na toe fesili Kruse ia Upusili po o le a lana mea sa fai i lana siaki, ae na toe tali le ua molia, sa fa’atupe ai le malaga a lona tina mo Apia.

Na umi se taimi o nofo le alii faamasino sili ona ia saunoa lea e fa’apea, “o lea ua 4 masina talu ona e faigaluega, 4 vaiaso i totonu o le masina, lona uiga ua faa 16 ona maua lou totogi e i le va o le $200 ma le $300 i le vaiaso, ae na o le $200 lea na faatoa e totogiina mai ananafi (aso Tofi na te’a nei) ina ua e iloa o nei (aso Faraile) e te tula’i ai i luma o le fa’amasinoga, e sa’o la’u tala”? o le fesili lea a Kruse, lea na tali ai le ua molia, “ioe”.

Saunoa Kruse, ua lava le gaioiga lea a Upusili e atagia mai ai e le kea le ua molia i le poloaiga sa tuuina atu i ai e le fa’amasinoga.

O le faaiuga o le vaiaso na tea nei na tali ioe ai Upusili ma Tusi i le moliaga mama o le faaleaga meatotino i le tulaga lua, atoa ai ma le moliaga o le inupia ae lei atoa le 21 tausaga na tali ioe i ai Tusi.

E ta’i 90 aso na faasala ai i laua e le faamasinoga i le toese i Tafuna, atoa ai ma le totogi e le tagata e to’atasi o le ta’i $2,600 mo vaega o masini sa la faaleagaina, aemaise ai o le salatupe e ta’i $1,000.

O moliaga na tausala ai Upusili ma Tusi na alia’e mai ina ua la faaleagaina masini fai auala a le kamupani o le McConnell Dowell sa paka i se vaega o le afioaga o Aua i le tausaga na te’a nei, ma tula’i mai ai le tau aofa’i o vaega o masini na faaleagaina i le $6,500.

Ua poloaina e le faamasinoga ia Upusili ma Tusi ina ia o o atu ia Aokuso ua feololo se vaega o le tupe lea sa poloaina i laua e totogi e totogi atu i le faamasinoga, afai e leai, o le a mafai ona faaleaoga tuutuuga o le la nofovaavaaia, ae poloaina loa le taofia o i laua i le toese i Tafuna.

O le totogiina e i latou o lo o nofo vaavaaia o vaega tupe ua maea ona poloaina i latou e le faamasinoga e totogi, o se tasi lea o tuutuuga e masani ona tuu atu e le faamasinoga ia i latou ua ta’usala e sili ona faataua e le fa’amasinoga, ma o ni isi o taimi, e ono avea le le usitaia e le tagata ua nofovaavaaia o le tuutuuga lea ma auala e mafai ai ona faaleaoga tuutuuga o lana nofovaavaaia, ae poloaina loa le taofia o ia i le toese mo le tuliina o se fa’asalaga fa’a falepuipui ua uma ona fa’amalumalu e le fa’amasinoga.