Ads by Google Ads by Google

Fa’atonu le toe fa’afo’i o le $20,000 i le kamupani va’a a Samoa

Ua toe fa’atonu e le Fa’amasinoga Apili, ia le malo o Amerika Samoa, ina ia toe fa’afo’i i le kamupani va’a a Samoa, le $20,000 lea na totogia mai e lea kamupani, i lalo o se poloa’iga a le Fa’amasinoga Iloilo, i le 2008.I se fa’aiuga na tu’uina mai e le Fa’amasinoga Apili i le vaiaso na te’a nei, o lo o taua ai tulaga uma na mafua ai ona fa’avae lenei fa’aiuga.O le tupe e pei ona taua, o se sala lea na fa’ae’e atu e le malo o Amerika Samoa fa’asaga i le kamupani va’a a Samoa, ina ua malaga mai le Lady Naomi i le aso 17 o Oketopa, 2006 ma aumai sui o se ‘au lakapi a le Iunivesite a Samoa (NUS), i le teritori e aunoa ma se pemita e fa’ataga ai ona ulufale mai i le teritori.O le aso 18 Oketopa na taunu’u ai le au lakapi mo le fa’amoemoe e tausinio i le ta’amilosaga, peita’i sa le’i mafai ona ulufafo ma le va’a ona e leai se pemita e fa’ataga ai i latou ona ulufale mai i le teritori.O se tusi na tu’uina atu e le Loia Sili ia Sialega Malaetasi i lena taimi e taofia ai le va’a mai lona toe fo’i atu, se’i vagana ua totogi le sala e $20,000, ma sa usitaia e le kamupani va’a a Samoa lea fa’atonuga, ma mafai ai loa ona toe fo’i atu le va’a i Apia, i lea afiafi.Ae na faila se talosaga i le fa’amasinoga, mo se fa’amaninoga o le mafua’aga ua sala ai le kamupani va’a.Fai mai le fa’amasinoga iloilo, e le’i tulau’ele’ele sui o le ‘au lakapi na malaga mai i le Lady Naomi, i laufanua o Amerika Samoa, aua sa taofia uma lava i latou i luga o le va’a. Ona o lea tulaga, e talitonu ai le kamupani va’a e le’i talafeagai le sala ua tu’uina atu e le malo o Amerika Samoa.O le poloaiga a le fa’amasinoga, e aofia ai le toe fa’afo’i atu o le $20,000 i le kamupani va’a a Samoa, atoa ai ma le tului e tusa ma le $4,000.O le tausaga e 2010 na tu’uina atu ai se fa’aiuga a le fa’amasinoga ina ia toe fa’afo’i atu e le malo le tupe e pei ona taua i le kamupani va’a, peita’i o lea fa’aiuga na apili e le malo.I le fa’aiuga a le fa’amasinoga apili, o lo’o taua ai le tu’uina mai e le fono o le tulafono e fa’amanino atili ai tulaga o mataupu fa’apenei, atoa ai ma le mafai ona iloiloina o ituaiga mataupu nei i luma o le fa’amasinoga tau pulega.Fai mai le fa’amasinoga, o le faaiuga e pei ona tu’uina atu ai e le loia sili i lena taimi le salatupe i le kamupani va’a, o se fa’aiuga tau pulega ma e tatau fo’i ona manino tulaga uma e aiaia ai galuega ma malosiaga tau i mataupu pulega ma mataupu e iloiloina e le fa’amasinoga iloilo.Na taua fo’i e le fa’amasinoga i lana fa’aiuga, i lalo o tulafono tau Pulega o lo’o manino mai ai, o le fa’aiuga fa’ai’u e faia e se Ofisa o le malo, e pei o le fa’aiuga lea na faia e le Loia Sili e fa’asala ai le kamupani va’a, e tatau ona iloiloina i luma o le Faamasinoga o Mataupu Tau Pulega, ma, afai ae manatu le itu ua faiaina e apili lea fa’aiuga, ona faila lea o se talosaga i luma o le fa’amasinoga apili.Fai mai le fa’amasinoga apili, o le loia sili o se ofisa o le malo ma o lana faaiuga fa’ai’u e pei ona ia fa’asalaina ai le kamupani va’a e mana’omia le matua fa’amanino atili.O le fa’aiuga a le fa’amasinoga apili o lo’o sainia ai le afioga i le fa’amasino sili Michael Kruse, John Ward ma le afioga ia Elvis Patea, fa’apea ai ma afioga i fa’amasino lagolago ia Fa’asua Pomele ma Satele Lili’o.