Ua talia e le fa’amasinoga maualuga se talosaga na fa’aulu e le Loia Tuto’atasi o lo o tula’i mo le malo, ina ia fa’atulaga loa le aso e faia ai se fa’amasinoga autu o Filifa’atali Mike Fuiava ma Marie Tauanu’u Ripley.

O le fa’amasinoga autu mo Fuiava lea ua fa’atulaga e faia i le aso 19 Me 2015, ae o Ripley ua fa’atulaga i le aso 7 Aperila 2015.

Pau le itu e le o manino i le taimi nei, po o le mea e fa’ataunu’u uma fa’amasinoga autu a i laua nei i luma o Tagata Iloilo Iuga (jury trial), pe tu’u atu le iloiloina o se fa’aiuga o a la mataupu e fai e ali’i fa’amasino (bench trial).

Ina ua valaauina le isi iloiloga a Fuiava ma Ripley i luma o le afioga i le ali’i fa’amasino sili lagolago ia Lyle L. Richmond i le aso Lulu, sa tu’uina atu ai loa e le loia a le malo ia Marcellus Talaimalo Uiagalelei sana talosaga i le fa’amasinoga, ina ia fa’atulaga loa se aso e faia ai fa’amasinoga autu mo lenei mataupu.

Na taua e Uiagalelei i lana talosaga e fa’apea, ua mae’a ona latou talanoa ma loia a i laua nei, ma ua talafeagai ai se taimi o le masina o Mati po o se masina e tau latalata ane i ai, e fa’ataunu’u ai iloiloga autu o lenei mataupu.

O le ali’i loia ia David Vargas o lo o tula’i mo Ripley, ae o le tama’ita’i loia ia Sharron Rancourt o lo o tula’i mo Fuiava.

Ina ua mae’a ona iloilo e le fa’amasinoga lana kalena mo masina amata o le tausaga, na tu’uina mai ai loa le masina o Aperila, o le taimi talafeagai lea e fa’ataunu’uina ai lenei mataupu, ma tu’u atu ai mau fa’amaonia i luma o tagatanu’u latou te iloiloina se fa’aiuga o lenei mataupu.

Na fesili Vargas i le fa’amasinoga, po o le a le ituaiga fa’amasinoga ua fuafua e faia mo Ripley, ae na saunoa Richmond, o lo o va’ava’ai le fa’amasinoga i le tu’uina atu o lenei mataupu e fa’amasino e tagatanu’u lautele, peita’i na finau le Vargas e fa’apea, ua uma ona tu’uina atu i luma o le fa’amasinoga le talosaga, ina ia faia sana fa’amasinoga i luma o ali’i fa’amasino (bench trial).

O le mataupu fa’asaga ia Fuiava ma Ripley, na afua mai i le taimi a o avea Fuiava ma Komesina Lagolago o le Matagaluega o Leoleo a le malo o Amerika Samoa, ae o Ripley sa avea ma Pulesili o le Ofisa o Ta’avale Afi a le malo i Tafuna, o se lala lea o le Matagaluega o Leoleo.

O lo o tu’uaia e le malo i laua i lo la tu’uina atu lea o se laisene ave ta’avale pepelo i se tagatanu’u o le malo o Tonga sa aumau i Amerika Samoa nei.

O lo o tu’uaia Ripley i le moliaga e pei o le faia o fa’amaumauga tau fa’asese, umia o ni mea e fa’atino ai fa’amaumauga sese, atoa ai ma lona fa’aaoga o lona tulaga fa’atagata faigaluega a le malo e maua ai ni taui i ni auala fa’aalatua.

Ae mo Fuiava, o lo o tu’uaia o ia i lona taumafai lea e fa’aleaga mea molimau a le malo, atoa ai ma lona taumafai e faia ni gaioiga e ufiufi ai se solitulafono.

O lo o tu’uaia e le malo ia Ripley i lona fa’aaoga o le numera saogalemu a se isi tagata e fai ai se laisene ave ta’avale mo le tama’ita’i Tonga o Rosemarie Rose Huni.