Ads by Google Ads by Google

Fa’atulaga ta’amilosaga ta’ito’a 7 tama ma teine aoga

O le aso 18 & 19 o Me lea ua fa’amautuina mai e le Iuni Lakapi a Amerika Samoa (ASRU), o le a faia ai le taamilosaga ta’ito’a 7 a tama ma teine aoga o aoga maualuluga i le atunuu, ma ua faamoemoe o le a tausinio uma ai au mai aoga maualuluga uma lava i totonu o le teritori.

O le fonotaga a le ASRU i le vaiaso nei na faamautuina mai ai lea faamoemoe, faatasi ai ma le faailoaina mai o le taamilosaga ta’ito’a 15 lea o le a amataina i le Aso To’ona’i o le vaiaso nei.

Saunoa le afioga i le kovana sili, o ia fo’i o le ta’ita’i a le ASRU, le matua ia Togiola Tulafono e faapea, o le mafuaaga ua aapa ai le Iuni e fa’asafua atu le taaloga lakapi i totonu o aoga maualuuga, ina ia mafai ai ona televave le faalauiloaina o le taaloga i le atunuu, ma faigofie ai ona maua le avanoa o fanau aoga latou te a’oa’oina ai gaioiga uma e uiga i le taaloga lakapi.

“O le agaga maualuga, ia amata le atina’eina mai o le taaloga lakapi i fanau aoga, ma faasolosolo atu ai lava i totonu o nuu ma kalapu taitasi,” o le saunoaga lea a le alii kovana i le fonotaga a le komiti faafoe ma sui o kalapu lakapi eseese i le atunuu.

“Afai ae televave ma lelei le atina’eina o le taaloga lakapi i le atunuu, o le a televave foi ona sasa’a mai e le Faalapotopotoga o le taaloga lakapi a le lalolagi, le IRB faamanuiaga mo le atunuu, e fesoasoani ai i le atina’eina ma le faaleleia o le taaloga.

O le fonotaga a le IRB i le aso 15 Me ua faamoemoe e iloiloina ai le talosaga a Amerika Samoa ua maea ona tuuina atu, ina ia avea ai o ia ma sui totino tumau e pei ona i ai isi foi atunuu o le lalolagi ua ofi atu ai i totonu.

Saunoa le afioga ia Togiola e faapea, sa ia maua mai se imeli mai le Peresetene a le FORU, po o atunuu o le Pasefika o lo o i lalo o le faamalumaluga a le IRB e faapea, ua talia e le IRB faamaumauga a Amerika Samoa i tulaga o peimeni sa faia e le ASRU, ma ua faamoemoe o le a tuu faatasi ripoti ma le talosaga lea ua maea ona taoto i luma o le IRB, ina ia tuuina atu ai mo lona iloiloina i le fonotaga a le IRB lea o le a faia i le masina o Me.

“E taua tele le fonotaga lea o le a mafai ai ona iloilo la tatou talosaga ma iloa tonu ai, pe faamata o le a talia le avea o i tatou ma totino tumau a le IRB,” o le saunoaga lea a le alii kovana.

O le taimi nei, o Amerika Samoa o lo o avea ma totino faamalumalu a le IRB, ma o lo o i ai tulaga o tulafono ma aiaiga o loo tuuina mai i ai e le IRB e ao ona mulimulita’i i ai, ina ia mafai ai ona ausia tulaga e tatau ona ausia, ona mafai lea ona avea se atunuu ma sui tumau o le IRB.

Na faamanino foi e le alii kovana e faapea, afai ae talia le talosaga  a Amerika Samoa, ona avea loa lea o Amerika Samoa o le atunuu mulimuli lava e le tutoatasi o le a ofi atu i totonu o le IRB ma avea ai ma totino tumau.

Fai mai Togiola, o le masina o Oketopa o le tausaga na tea nei na tuu aloaia atu ai le talosaga a Amerika Samoa i luma o le IRB, ae o le masina o Novema na sosoo ai sui le tulafono, ma faasa ai ona le toe taliaina ni atunuu e lei tutoatasi ona toe talia e avea ma totino tumau a le IRB.

Ua talosagaina e le ASRU kalapu lakapi eseese i le atunuu ina ia galulue faatasi ma aoga  maualuluga mo le aoaoina o fanau i tulafono ma le taaloga, ona o le toatele o faiaoga latou te le o silafia tele tulafono a le IRB o loo faafoe ai le taaloga, ona o le taaloga football lava lea e matele i ai aoga maualuluga i le taimi nei.

O le faanaunuaga o le alii kovana, a’o le’i tu’ua le nofoa fa’a kovana, e fia vaai ua avea Amerika Samoa ma totino tumau a le IRB, e le gata fo’i i lea, ua manuia alo ma fanau o le atunuu i lenei taaloga, e pei fo’i ona ‘ae ‘ae ai tama fanau a Samoa i soo se vaega o le lalolagi.