Na fa’atusa e le afioga i le ali’i Senatoa mai le Maoputasi, tofa Tuaolo M. Fruean vevesi o loo tula’i mai i le va o le Komiti Fa’afoe a le Falema’i o le LBJ ma lana Tau Pulega, “misa a tamaiti”, i le lalau solo ma tau tu’ua’i e le isi le tasi i luga o le nusipepa ao fa’afofoga le mamalu o le atunu’u.

Na umi se taimi o felafolafoa’i afioga i Senatoa i le taeao ananafi e fa’atatau i le mataupu o loo tula’i mai i le LBJ, ma tula’i mai ai le fesili, pe fa’apefea ona taumafai le fono e fofo le fa’afitauli o loo tula’i mai i le va o le Komiti Fa’afoe ma le Pulesili o le LBJ, aemaise ai fo’i le va o le Ta’ita’ifono o le Komiti Fa’afoe ma isi totino o le Komiti, e aofia ai ma ni isi o Foma’i sinia.

O le afioga i le ali’i Senatoa ia Soliai T. Fuimaono na lagaina le mataupu i le taimi o folafolaga a le maota maualuga ananafi, lea na ia taua ai e fa’apea, ua alu vaiaso e lua o le malologa a le Fono o fa’asalalau lava i luga o le nusipepa le vevesi o loo tula’i mai i le va o le Pulesili a le Falema’i ma le Komiti Fa’afoe, e mafua mai i le iloiloga lea sa valaauina a le Senate, i lalo o le ta’ita’iga a le Komiti o le Soifua Maloloina o loo ta’ita’i ai le tofa a Tuaolo.

“O loo talosaga mai le Pulesili o le Falema’i i se tatou fa’aiuga e fesoasoani ai i le fa’afitauli o loo tula’i mai i le falema’i, o lana fa’amatalaga ia te a’u, ua oo lava i tiute e patino ia te ia ua fa’atinoina uma e le Komiti Fa’afoe, o isi fo’i taimi, e liliu ai e le Komiti Fa’afoe sana fa’aiuga e fai, ma ua le iloa ai e ia poo fea tonu le sa’o o le faafitauli o loo tula’i mai i le falema’i,” o le saunoaga lea a Soliai, e faatatau ai i se la talanoaga ma le Pulesili o le Falema’i, tofa Taufete’e J. Faumuina.

Na fa’ai’u le saunoaga a Soliai i luma o le maota i lona fautuaina lea o le ali’i Peresetene ia Gaoteote P. Tofau, e sili pe a ave se fautuaga i le alii Kovana ia Lolo Matalasi Moliga, e fa’ailoa i ai, afai o le fa’afitauli o loo tula’i mai i le va o le Komiti Fa’afoe a le Falema’i ma le Pulega o loo mafua ai ona fa’aletonu le auaunaga a le falema’i i le atunu’u, ua tatau ona fa’amalolo uma totino o le Komiti ae toe saili ni isi sui fou.

Na saunoa Gaoteote e fa’apea, e le fou le mataupu o loo tulai mai i le lotoifale o le falema’i, ua mae’a fo’i ona ave i ai le la fautuaga ma le Fofoga Fetalai i le alii Kovana ina ua mae’a le iloiloga a le maota sa faia, ae foliga mai o le mafua’aga o le fa’afitauli, e le o maua se feiloaiga i le va o le Komiti Fa’afoe ma i latou uma o loo tula’i mai ai le vevesi.

Na pau le fautuaga a Gaoteote, e sili pe a tuu le avanoa ia Tuaolo e fai ai sa latou feiloaiga ma le pulega atoa a le falema’i se’i tau saili se auala e foia ai le fa’afitauli, ona fa’atoa toe la’a atu ai lea o le maota i se isi ana fa’aiuga.

Saunoa atili le ali’i peresetene, o le fa’afitauli lea e tula’i mai, e le molimau sa’o sui o le falema’i pe a oo mai i luma o le maota, ae taumafai le isi e ufiufi le tasi.

Na fa’aaoga fo’i e Gaoteote le avanoa lea e fautua ai i le maota, i taimi latou te tauaaoina ai tofiga a le alii kovana i totino o Komiti Fa’afoe, ina ia mautinoa latou te iloilo ma le toto’a le tagata i ona agava’a, aemaise ai o ana galuega e fa’atino i le falema’i pe a pasia atu e le Fono.

Ae na saunoa Galea’i Tu’ufuli e fa’apea, o le isi fa’afitauli o loo tula’i mai i le falema’i, afai e le fiafia tagata faigaluega i le Pulesili, ona tuli oso lea i le Komiti Fa’afoe ua ave i ai a latou fa’asea, ma faigata ai lava ona maua se tonu o le mau vevesi o loo tula’i mai ai i le falema’i.

Saunoa Tuaolo, e sili pe a aami le Komiti Faafoe ma le Pulega a le falema’i e o mai se’i toe fesili, ae na te le lagolagoina lona alu i ai latou te feiloa’i.

“O lea ua fa’afofoga le atunuu i nei mau tala ua fela’ua’i solo, ua pei o ni misa a tamaiti le fela’ula’ua’i solo a’o fa’afofoga le atunu’u,” o le saunoaga lea a Tuaolo ma ia poloaina ai loa le faia o le iloiloga i le taeao o le aso Lulu o le vaiaso nei.

Ae na toe fa’aopoopo atu i ai ma Gaoteote, ina ia aami na o tagata e mafai na tali i fesili, e le mafai fo’i ona taunu’u le iloiloga se’i vagana ua atoa uma mai tagata e tatau ona i ai i le iloiloga.