Ads by Google Ads by Google

Fa’avae Vaega ou Ofisa Femalagaaiga sailia tagata “Overstayer”

Ua fa’avaeina nei se vaega fou i totonu o le Ofisa o Femalagaiga a le malo ua fa’aigoaina o le “Overstayer Unit”, o le latou galuega tupito, o le gafa lea ma le sailia o tagata uma o lo o nonofo fa’asolitulafono i totonu o le teritori, ina ia toe fa’afo’i atu i latou i nu’u ma aiga na o mai ai.

 

Ina ua fesiligia e le Samoa News le Pulesili o le Ofisa o Femalagaaiga e tusa ai o lenei mataupu, e le gata sa fa’amaonia mai ai e le afioga a Tamasa Dennis Lutu lea tulaga, ae sa ia taua fo’i e fa’apea, o le isi “ta’iala fou” lea ua fa’amalosia nei e le afioga i le Loia Sili, e le toe taliaina le toe fa’aopoopo o se isi 30 aso e nofo ai le tagata mai fafo i le teritori, pe afai e mae’a le pemita e 30 aso na malaga mai ai.

 

Talu ona fa’avae le Vaega Fou lea i totonu o le Ofisa o Femalagaaiaga a le malo, e lata i le to’a 250 tagata nonofo fa’asolitulafono ua maua ma toe fa’afo’i i o latou atunu’u, e pei ona saunoa Tamasa.

 

O le to’atele o i latou nei o tagata mai le Usoga a Tumua ma Pule i Samoa, fa’atasi ai ma nai tagata to’aititi mai Fiti, Tonga, Asia ma Filipaina.

 

Na toe fa’amaonia mai e le tofa Talauega Eleasalo Ale le fa’amalosia o le tulafono e taofi ai le toe fa’aopoopo o le pemita e 30 aso, peita’i, e le o talosaga uma e le talia, ae i ai lava talosaga e iloilo toto’a lelei ina ia mautinoa le mafua’aga autu o le talosaga e toe fa’aopoopo aso e nofo ai le tagata.

 

Talu mai le masina o Tesema 2014 e pei ona saunoa Tamasa, o iina na amata fa’atino ai e le Vaega Fou lea a le Ofisa o Femalagaaiga la latou galuega, o le o lea i nofoaga eseese i le atunu’u e saili mai ai tagata o lo o nonofo fa’asolitulafono i le teritori.

 

E ese mai i le asia o afioaga eseese mo le tau sailia o tagata nonofo fa’asolitulafono, e muamua ona latou fa’afesootaia le ‘sponsor’ na aumaia le tagata mai fafo, e fa’amanatu i ai le taimi ma le aso e fa’amuta ai le aoga o le pemita na malaga mai ai lea tagata.

 

Sa fesiligia fo’i e le Samoa News le afioga a Tamasa, e tusa ai o le osofaiga sa latou fa’atinoina i le nofoaga o le ‘Chinatown’ i Pago Pago i se taimi e le i mamao atu, lea sa taua i ni ripoti le maua ai o ni tagata o lo o nonofo fa’asolitulafono i le atunu’u.

 

Na fa’amaonia mai e Tamasa e fa’apea, to’a sefulu sui o le latou Vaega sa auai i le osofaiga lea, lea na latou maua ai tagata mai Asia e to’a 7, to’a 5 tama’ita’i ma ali’i e to’a 2, ma ua mae’a ona toe fa’afo’i uma atu i latou i atunu’u na malaga mai ai.

 

Na taua e ni isi o tagata faigaluega a le Ofisa o Femalagaaiga e le fa’ataga ona talanoa i tusitala i mataupu fa’apenei e fa’apea, o le latou osofaiga sa faia i lea nofoaga, na fa’avae mai lea ina ua fa’asea ni isi o tagata o le afioaga i Pago Pago, i le toe amata fo’i lea o faiga a tama’ita’i Asia, o le avea o le fale mautotogi o lo o nonofo ai o se nofoaga e faia ai a latou “pisinisi”, e ala i le mafuta ai ma ali’i faifaiva mai va’a fagota eseese e aga’i mai i le teritori.

 

Ae ina ua fesiligia Tamasa i lea tulaga, sa ia teena ai lea ripoti, ae o le latou osofaiga, o galuega masani lava a le Ofisa o lo o fa’atino e sailia ai tagata o lo o nonofo fa’asolitulafono i le atunu’u.