Ads by Google Ads by Google

Faai’u i le falema’i le misa a se ulugalii

Na faai’u i le falema’i le laumoli a se ulugalii talavou i le Aso Faraile na te’a nei, ina ua sulu i ai si fafine mo se mapusaga i manu’a mitimiti na aafia ai lona tino, e mafua mai ina ua fasi o ia e lona toalua.

O se alii e 25 tausaga le matua lea na tuuaia i lenei mataupu, e mafua mai ina ua ia masalomia se faiga faalilolilo a lona toalua ma se isi tagata, ua fautuaina e le alii faamasino o John Ward II ina ia aua ne’i ona toe taumafai e faafesootai le fafine se’i vagana ua tuuina atu se isi poloaiga a le faamasinoga.

Ina ua tulai le ua molia i luma o le faamasinoga i le taeao ananafi, sa ia teena le moliaga o le faaoolima i le tulaga tolu ma le faatupu vevesi i nofoaga faitele o lo o tuuaia ai o ia e le malo.

O le a le mafai e le Samoa News ona faalauiloa le suafa o le alii ua molia, ona o puipuiga mo le fafine i lalo o le tulafono.

O le mataupu lenei na tofu atu i le ofisa o leoleo i le taeao o le Aso Faraile na tea nei, ina ua faafesootai e le fomai o Dr. Laititi le leoleo mo se fesoasoani, ona o se tasi o ana ma’i o lo o masalomia sa fasi e se tagata.

Na faamatala e le tina talavou, e 20 tausaga, i leoleo, o se taugaupu i le la va ma lona toalua, ina ua masalomia e le tamaloa o lo o fai se la faanunumi ma se isi alii, na mafua ai ona fasi o ia e lona toalua ma ia teva mai ai mai le latou aiga.

Ao faatali sana taavale i luma o le fale ta lavalava i Gataivai e alu ai i le fale, na faafuasei ona pasi ane se taavale o lo o alu atu ai lona toalua, ma tu atu, oso i fafo lona toalua ma toe fasi o ia.

Na fesili leoleo i le tamaitai pe aisea na ia le ripotia ai i le ofisa o leoleo le mea sa tupu, ae sa tali e le’i mana’o i ai, peitai ina ua fesiligia e leoleo le ua molia i le mafuaga o le faalavelave, na faamaonia e le ua molia i leoleo lona fasiga o lona toalua i luma le fale ta lavalava i Gataivai, ina ua ia faalogo i tala o lo o fai le faanunumi a lona toalua ma lona tausoga.

Na taua e le ua molia e faapea, ao alu atu i le taavale e alu e faatau i le vaveao lea o le aso Faraile, sa te’i lana vaai ina ua ia vaaia lona toalua o lo o uulima mai ma lona tausoga  i luma o le fale ta lavalava i Gataivai, o le mafuaaga lea o le oso o lona ita, ma toe liliu mai ai lana taavale i le vaega o lo o i ai lona toalua.

Na ta’ua e le ua molia, le sola o le tausoga ina ua ia o’o mai i luma o le fale ta lavalava.

Na faamaonia e le fafine i leoleo o lo o fai le la faanunumi ma le tausoga o lona toalua.