Ina ua fa’alogoina ua mae’a tapunia a’oga i Samoa ona o le pepesi o le Misela i le taimi nei, ua tula’i mai ai le Matagaluega o le Soifua Maloloina ma fa’amalosia le fe’au taua mai le Centers for Disease Control and Prevention (CD) a le malo tele, “Ina ia mautinoa ua faia tui puipuia o le fanauiti ma fanau talavou matutua i le atunu’u.”

E tolu fa’ama’i ua fa’asolo mai o latou tui puipuia ina ia mautinoa ua faia mo fanau uma e afua mai le 6 masina le matutua seia o’o fo’i i fanau i a’oga maualuluga. “O le Mami, Rupella ma le Misela, e ao ina mautinoa ua mae’a faia ai tui puipuia nei e fa’asolo, pe afai fo’i o le a malaga i nisi o malo tuaoi, po’o fafo fo’i i malo tetele, e tatau ona mua’i mita’i e matua pe ua mae’a faia nei tui puipuia fa’atulaga mo le fanau uma lava.”

O le ulua’i tui puipuia mo nei uma fa’ama’i e amata faia lea i le taimi a’o tasi le tausaga o le fanau seia oo i le 15 masina le matutua.

O le fautuaga fo’i ua tu’uina mai e le Matagaluega o le Soifua Maloloina, ua fa’ailoa mai ai, “E ao i le fanau uma lava ona taulimaina o latou pepa tui ao le’i tu’ua le atunu’u e malaga i Samoa, Niu Sila, Ausetalia po’o Tonga, o malo uma nei ua mae’a pepesi ai le Misela i le taimi nei. E tatau ona o ua mae’a faia o latou tui puipuia.”

O le inumaga lona lua mo le fanau e fa’ato’a toe faia i le taimi ua atoa ai le 4-6 tausaga le matutua o i latou.

Ua faailoa mai fo’i e ta’ita’i o le Soifua Maloloinai le au fa’asalalau, “Talu mai ona pepesi le misela, maliliu ai fanau ma ua taofia nei fo’i a’oga ina ia le fa’ateteleina i Samoa, ua matua u’una’ia a’ia’i le matagaluega ma latou aufaigaluega uma, ina ia matua tima’ia le mamalu lautele o matua, e alofagia, fa’aititia se fa’aletonu e ono o’o mai i Amerika Samoa, ia faia tui puipuia o le fanau uma.”

Ua fa’alauiloa fo’i i fanau a’oga matutua ina ia fesiligia latou matua ina ia mautinoa ua fa’aatoa o latou tui pe afai e le’i mae’a, ia mautinoa e leai se tasi e sofa’i mai e lenei gasegase, a’o le’i malu puipuia lona tino, ia fa’afaigofie ona tete’e o latou tino pe a tau pesia mai i le misela.

Ua le toe i ai nisi ripoti fou i nisi ma’i misela ua fa’ao’o ane i le falema’i i Moto’otua talu mai lipoti na fa’auia mai i le fa vaiaso ua te’a i fanau e to’alua ua maliliu i le misela.