Na faaalia le le fiafia o ni isi o sui o le Fono i le le o’o atu o Faatonu a ni isi o Ofisa o le malo, e molimau i a latou Paketi, ae na faaalia e isi sui o le Fono lo latou le fiafia i isi fo’i sui o le Fono, i le le auai atu uma i iloiloga o le paketi a le malo o loo faagasolo i le taimi nei.

O le taimi o le iloiloga o le paketi a le Matagaluega o le Puipuiga o le Saogalemu Lotoifale i le aoauli o le Aso Lua na te’a nei, na tulai mai ai le faaletonu, ina ua amata ane le iloiloga e na o le toatasi le Senatoa ma le Faipule e toatasi sa auai, e ese mai i taitaifono o komiti o le paketi a maota e lua, afioga i le Senatoa ia Lamanu Peleti Mauga ma le alii Faipule ia Vailiuama Steve Leasiolagi.

O sui e toalua na i ai i le taimi o le iloiloga na aofia ai Senatoa Alo Dr. Paul Stevenson ma le alii faipule ia Tuumolimoli Saena Moliga, peitai e fetaui lava le mae’a o le iloiloga lea e tusa ma le 8 minute le umi, ae taunuu atu loa isi sui.

E le i auai le faatonu o le matagaluega ia Mike Sala ona o lo o malaga i fafo, e pei ona faaalia e sui o lona ofisa na molimau i le latou paketi. Na taua foi e Lemanu e faapea, ua uma ona faanoi atu Sala e le auai i le iloiloga.

O le faasea a le Fono i le le auai o Faatonu i iloiloga na faaleo e  Alo, ina ua valaau le paketi a le Ofisa e Pulea Oloa a le malo (Procurement), ae vaaia ai le sui faatonu ma se tasi o sui o le latou ofisa na molimau, ae le’i i ai le faatonu ia Ivy Taufaasau.

Na fesiligia e Alo ia molimau po o fea le latou faatonu, ae tali le sui faatonu, o lo o malaga i fafo.  Sa le i nofo lelei le finagalo o Alo ma isi sui faitulafono i lea tali.  Na saunoa le ali’i Senatoa, e foliga mai ua amata ona le amanaia e faatonusili le paketi a le malo lea ua i luma o le fono, “ae afai o le tulaga lea o le a i ai iloiloga o le paketi, e sili ai loa ona faamalolo le paketi,” o le saunoaga lea a Alo.

“O lo o manino le tulafono, e tatau ona avanoa faatonu mo iloiloga o le paketi a le malo i soo se taimi e valaau atu ai le fono, ae taoto atu pea i se finagalo a le komiti,” o le saunoaga lea a Alo.

Na faamanino e Alo e faapea, e tasi lava le mafuaaga e ala ai ona valaau iloiloga a le Fono mo le paketi, ina ia faamalamalama e ofisa o le malo i le Fono tulaga uma e uiga i le paketi, peitai afai e le malamalama le Fono, e sili ai loa pe a taofi le paketi.

Na faaalia foi e Fonoti lona faanoanoa ona o le toatele o faipule ma Senatoa e le o auai atu i le iloiloga o le paketi.   Saunoa Fonoti, sa tele lava finagalo e faatatau i le paketi, peitai o lea ua oo i le taimi e tatau ai ona fesili le fono i le malo, ae o lea ua vaaia le gaogao o iloiloga o lo o faia.