Ua taoto atu nei i se fa'aiuga a le Vaega Apili o le Fa'amasinoga Maualuga a Amerika Samoa, le tagi sa fa'aulu e se tasi o sui tauva sa tausinio i le palota a le Itumalo o Alataua, Fatumalalala Al-Sheri, fa'asaga i ni fa'aletonu sa ia maitauina i le faiga palota a le itumalo na se'i mavae atu nei.

O lenei mataupu na fofogaina i luma o afioga i ali'i fa'amasino e aofia ai le fa'amasino sili ia Michel Kruse, Lyle L. Richmond, John Ward II, ma afioga i ali'i fa'amasino lagolago ia  Logoai Siaki ma Fa'amausili Pomele.

Na fa'avae le tagi a Al-Sheri i luga o lona talitonuga, sa i ai ni gaioiga e le tusa ma tulafono tau palota sa fa'atinoina i le aso tonu o le palota, ma ua avea lea ma itu e talitonu ai lona taofi, ua soli ai tulafono tau palota.

Mo se fa'ata'ita'iga e pei ona taua e Al-Sheri, lea sa tula'i lava mo ia lava e fa'apea, sa i ai tagata o le itumalo sa palota i le aso 4 Novema, ae tusa ai ma fa'amaumauga a le Ofisa o Femalagaiaga a le atunu'u, o i latou nei o lo o i fafo ma le atunu'u.

E talitonu le itu tagi, ua leva ona fa'amuta le taimi e faia ai palota mo i latou o lo o aumau i fafo o le atunu'u.

O isi tu'uaiga na fa'avae ai i luga le tagi a Al-Sheri, o ni tama matutua o le itumalo na o atu i le aso o le palota e fai a laua palota, peita'i sa le mafai ona o o atu i le vaega e fai ai le palota, ona fesoasoani ai lea o nisi o la fanau i le faiga o a la palota, ae i lalo o tulafono tau palota e le fa'atagaina lea ituaiga gaioiga.

Ma le vaega mulimuli o le tagi, o le sui vaai palota a le sui tauva ia Savali Talavou Ale na alu atu i le fale palota ae le o i ai sona igoa i le lisi o tagata vaai palota.

O molimau na valaau e Al-Sheri e fesoasoani i lana tagi e aofia ai Sinatauala Misipati, o ia lea sa fai ma vaai palota a le isi sui tauva o Samatua Hollister, lea na ia molimauina ni isi o faiga le sa'o sa tutupu i le taimi o le palota.

Na taua e Misipati i lana molimau e fa'apea, sa fa'ataga e le tama'ita'i fai palota ia Folole Fagaima le tama'ita'i vaai palota ia Ailini Asiata e nofo i totonu o le vaega e fai ai le palota, e ui e le o i ai lona igoa i le lisi o tagata vaai palota mo Savali.

Ae ina ua molimau le tofa Savali, sa ia taua ai i le fa'amasinoga e fa'apea, e ui e lei i ai le igoa o Asiata i le lisi muamua sa tu'uina atu mo ana tagata vaai palota, ona sa manatu e pisi o ia i lana galuega, ae sa toe aofia lona igoa i le lisi lona lua sa ia tu'uina atu i le Ofisa o Palota.

Na taua fo'i e Savali e fa'apea, o ia na fa'afeso'ota'iina le Ofisa o Palota, pe aisea ua le fa'atagaina ai Asiata e avea ma ana teine vaai palota, ae o lea sa aofia lona igoa i le lisi, ma fa'afeso'ota'i ai loa e le Ofisa o Palota ia le tama'itai o Fagaima e fa'ataga Asiata ona nofo i totonu o le fale e fai ai le palota, o ia o le sui faitau palota mo le sui tauva ia Savali.

Na fesiligia e le loia na tula'i mo le Ofisa o Palota ia Gwen Tauiliili-Langkidle ia Al-Sheri pe sa ia fa'ailoa nei mau fa'asea uma i le aso o le palota, ae na tali le molimau e leai.

I fa'afinauga fa'ai'u o lenei mataupu a'o le'i tu'uina atu i ali'i fa'amasino mo sa latou fa'aiuga, na taua ai e Gwen e fa'apea, o le mataupu atoa lenei, e autu i le le malamalama e fa'atatau i tulafono tau palota.

O tama matutua o lo o fesiligia e Al-Sheri, na taua e Gwen e fa'apea, o lo o i ai aia o i laua nei i lalo o tulafono tau palota e faia ai le la palota i le aso o le palota, e le fesiligia lea tulaga.

Ua taoto atu nei se fa'aiuga o lenei mataupu i se fa'aiuga mai afioga i ali'i fa'amasino.