Ads by Google Ads by Google

Faatali se faaiuga a le Faamasinoga i le talosaga VA

Ua taoto atu nei i se faaiuga a le Faamasinoga Maualuga le talosaga na faila e le loia a le Asosi o Fitafita Tuai a Amerika Samoa (A.S.V.A), e talosagaina ai le faamasinoga ina ia toe iloilo lana faaiuga lea na ia teena ai se talosaga na faila e le VA mo se faaiuga a le faamasinoga.

Na taua e le loia a le VA o Mark Ude i luma o le faamasinoga maualuga i le Aso Lua, e ui o lea ua tuuina mai le faaiuga a le faamasinoga, e taua ai le maea o le taimi o le lisi i le va o le VA ma le malo o Amerika Samoa, peitai o loo tumau pea le talitonuga a le VA, e lei maea tausaga o le lisi sa sainia ma le malo.

Na faailoa e Ude i le faamasinoga, o le lisi o loo tumau pea lona aoga seia aulia le tausaga e 2017, ma o le talitonuga lava lea o loo tumau i loto ma mafaufau o sui uma o le VA.

Na taua e Ude i le faamasinoga, o le lisi lenei e ui na sainia i le tausaga e 1977 mo le umi e 30 tausaga, ae na faatoa lesitala i le 1987 i le Ofisa Lesitala, o le tausaga foi lea na amata faitau mai ai loa tausaga e 30 o le lisi, lea faatoa maea i le 2017.

Na taua e Ude i le faamasinoga le maea lea ona totogi e le VA o le tau atoa o le lisi, ma ua lea toe i ai foi se isi mea e toe faalavelave ai fua le faaauauina o le lisi sei vagana ua maea.

O le masina o Oketopa na tuuina mai ai le faaiuga a le faamasinoga maualuga, e lagolagoina ai le itu a le malo ma lana faaiuga, o le lisi a le VA ma le malo na maea i le 2007.

I lea faaiuga, na poloaina ai loa e le faamasinoga le VA ina ia toe faafoi le fanua o le malo  o loo latou nonofo ai i Tafuna, peitai na faila e le VA sa latou talosaga i le faamasinoga ina ia toe iloilo lana faaiuga ua tuuina mai e uiga i le lisi ua maea.

I le masina o Novema na tea nei, na teena ai e le faamasinoga le talosaga a le VA ina ia toe iloilo lana faaiuga, ona e talitonu le faamasinoga, o loo lava mau e lagolagoina ai lana faaiuga ua maea ona tuuina mai.

O le taimi lava foi lea na faila ai loa e le VA lana talosaga e apili ai le faaiuga a le faamasinoga, ma o lea talosaga o loo i luma nei o le faamasinoga e faatulaga ai se taimi e fofogaina ai lea mataupu i luma o le faamasinoga apili.

E ui o lea ua i luma o le faamasinoga le talosaga a le VA mo se faaiuga a le faamasinoga e toe iloilo ai lana faaiuga, ae o loo tumau pea le talitonuga o le itu a le malo, o le lisi ma le VA ua maea, ma e tatau foi i le faamasinoga ona faatumauina lana faaiuga ua maea ona tuuina mai.

E ui i le tulaga o loo i ai lenei mataupu i le va o le VA ma le malo, peitai na taua e nisi o sui o le VA lo latou talitonu pea e tumau pea lo latou nofoia o le fanua o le malo ona e lei maea le lisi sa sainia.

Ua maea ona tuuina atu e le kovana ia Togiola Tulafono se fanua e 3 eka i le isi itu o fanua o le malo i le Tafuna Industrial Park, e fausia ai se isi nofoaga fou a le VA e aofia ai ma le fausiaina ai o se  Maa Faamanatu mo Fitafita Tuai.

Ua tofia e Togiola le afioga i le alii Senatoa ia Lemanu Peleti Mauga, o se tasi o tamalii sa tautua i vaega au a le malo tele, e taitaia le faatautaia o le toe fausiaina o le nofoaga fou lea mo Fitafita tuai.

Ua faapea foi ona tuuina atu i ai e le malo se vaega tupe e $100,000 e amata ai le fausiaina o le galuega ma ua i ai le faamoemoe o se taimi o le tausaga fou e maea ai lenei galuega e pei ona faamaonia mai e nisi o fitafita tuai o loo i totonu o le vaega lea o loo fausiaina le nofoaga fou.