Ads by Google Ads by Google

Faataua e Samoa e lua le tausia lelei o le Soifua Maloloina

O le fetufaa’i o auala e mafai ai ona faamalosia soifua maloloina o tagata, atoa ai ma le sailia o auala e tete’e atu ai i gasegase le pipisi ua aafia ai le toatele, o ni isi ia o autu o le Fonotaga lona 3 i le va o Ofisa o le Soifua Maloloina a Samoa e lua, lea na tatalaina i le taeao ananafi i le Fale Laumei i Utulei.

O le aumalaga mai Samoa na taitaia mai e le afioga i le Minisita o le Soifua Maloloina a Samoa, afioga Tuitama Dr. Leao Talalelei Tuitama, o Minisita Fesoasoani e toatolu, sui Sinia o le Soifua Maloloina, Foma’i atoa ai ma ni isi o lo o galulue soosoo tauau ma le malo i le unaia o tulaga tau soifua maloloina i Samoa.

O le usugafono a Amerika Samoa sa taitaia e le Faatonu le Tumau o le Matagaluega Soifua Maloloina, o Elizabeth Ponausuia, o alii ma tamaitai Foma’i faapea ai vaega eseese o lo o galulue i le faatauaina o le soifua maloloina i le teritori nei.

O le susuga i le Faifeau Toeaina ia Rev. Siaosi Mageo na saunia le tatalo e tatala aloaia ai le fonotaga i le taeao ananafi, ona sosoo ai loa lea ma le saunoaga a le susuga Ponausuia e faafeiloai ai le au usufono mai Samoa.

O le maea ai o le saunoaga a Ponausuia, na maua ai le avanoa o le afioga i le alii Minisita ia Tuitama e saunoa e faalauiloa le manulauti o le faamoemoe, ina ua le oo atu le afioga i le Kovana Sili le tumau, le alii Loia Sili ia Fepulea’i A. Ripley e fai ma sui o le malo.

Na taua e Ponausuia e faapea, o le autu o lenei fonotaga e pei ona amata mai ai i le tolu tausaga talu ai, o le taumafai lea e saili vaifofo ma fetufaai manatu i ni auala e foia ai faama’i le pipisi lea ua aafia ai le soifua maloloina o le toatele o tagata i Samoanalua.

I le talimalo ai o Amerika Samoa i lenei fonotaga, ua faaautu ai le fonotaga mo lenei tausaga i manatu faapea, “Soifua Maloloina mo se soifuaga umi - Fuafua nei mo le soifua maloloina o a taeao.”

Ae na taua e le alii Minisita i lana saunoaga, o le fonotaga i lenei tausaga o lo o faaauau mai ai galuega ma fesootaiga i le va o Samoa e lua, i le sailia lea o auala e faataua ai mataupu tau soifua maloloina i atunuu e lua.

Na faafetaia e le afioga Tuitama le malo o Amerika Samoa faapea ai ma le matagaluega o le soifua maloloina, i lo latou asaina lea o le gasu mo le tau sailiga o ni fofo o ma’i ua aafia ai soifua o tagata.

Fai mai le alii Minisita, ao tau saili mai e tuaa ua lagomau mai tiasa se saolotoga mo Samoa, sa unaia faatasi atu ai ma le mataupu e faatatau i le soifua maloloina o tagata, ma avea ai loa le matagaluega o Soifua Maloloina a Samoa o se tasi o matagaluega faavae a le malo o Samoa.

I lona talitonuga e tusa ai ma faamaumauga, o le falema’i lava ia e faapitoa mo tagata mama’i, peitai ina ua amata mai le soifuaga o Samoa i tausaga ua mavae, sa i ai tulaga faailogalanu i le tulaga o le tausiaina o le soifua maloloina o tagata, ina ua i ai lava le falema’i e faapitoa mo tagata papalagi, falema’i mo tagata Saina, atoa ai ma le falema’i mo tagata Samoa lava ia, lea na amata mai i se tama’i faleoo.

Fai mai Tuitama, i tausaga ua mavae, sa feavea’i gasegase i faamalu i timuga ma le mugala, peitai sa le’i avea ia lu’itau ma itu na faavaivaia ai le lagona o tagata Samoa, e taua le soifua maloloina o ona tagata.

“I le taimi nei, ua i ai lu’itau tetele ua agai atu i ai le matagaluega o le soifua maloloina a Samoa, ina ia laualuga ai pea le faatauaina o le ola maloloina o tagata,” o le saunoaga lea a le alii Minisita.

I le faagasolo mai ai o le faalauteleina o le tautua tau i le soifua maloloina, na faavaeina ai i le tausaga e 1978 le Primary Health Care, lea e talitonu le malo o Samoa, o le isi lea laasaga manuia mo le tausiaina o le soifua o ona tagata.

O le tausaga e 1986 na faavaeina ai le Health Promotion ma faasolosolo mai ai lava i le faavaeina o le Healthy Island seia oo mai i le taimi nei.

“O gaioiga uma nei latou te puipuia le soifua maloloina i totonu o Samoa, lea foi ua maitauina ai le galulue faatasi ai o atunuu o le Pasefika e unai malosi lenei faamoemoe taua,” o le saunoaga lea a le alii Minisita.

Ao faagasolo ai lenei fonotaga, o le a faalauiloa e alii ma tamaitai foma’i auala e mafai ai ona tete’e atu i faama’i le pipisi lea ua toatele tagata o le atunuu ua aafia ai.