E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na tau ai le vaai a le tamaloa o Veli i le filifili auro ma le mama i le lima o Tania.

“O fea e ke sau ai ma ga mea siaula Kagia, loga uiga o mea ga sa aumai i le ave taxi lea na lua ti’eti’e agagei le kaeao, ou ke ofo Kagia i le mafai oga e faia o ga mea ia ke a’u ae o lo o pupula o’u maka, ua ga o se gaka e fasia ae pupula maka solo, sa saili ai ga e sau ma se maka kao fagoka la le kukui ai lo’u faku gai lo le fai mai o ga amioga fa’apena”. E fai lava tala a le tamaloa o Veli ma tu sasae i luga, ona aapa atu lea ua uu mai lona mitiafu o lo o tautau i le puipui o le faleoo ma faaauau lava lana savali aga’i tua o le fale ma fa’asolo atu ai lava i le umukuka, ae o Tania i le taimi nei,  o lo o tauvalaau mai lava i le igoa o si ona to’alua ma tau mulimuli ane ai.

“Veli! Veli! Veli ea! e ese lava ma oe ia, e tiga ona e fa’alogo mai o lea ou te valaau atu ae ete savali lava ae le faatali mai se’i fai atu la’u tala,” e fai lava tala a Tania ma mulimuli atu lava i tua o Veli, ae o Veli i le taimi lea, ua matua tuia lava le fatu o le tamaloa i le mea lea ua ia vaai i ai, ma ua tonu nei i lona manatu o le a le toe i ai loa ni isi upu e toe fai ae o le a alu mo’i loa i lona aiga i Savaii, ua le lava pologa i upu ma tala aemaise ai amioga a lona to’alua lea ua fai atu ia te ia. “Ai e ke fa’apea ou ke makiva, ou ke le maua foi gi mea i lo’u aiga ua e faapupula ai a’u i gei ikuaiga mea faapenei, faapea oe ou ke lei vaai kigo i le kaimi ga lua o mai ai ma le ave taxi i laga kaavale ao o’u ku i luma o le faleoloa lea e sosoo ma le falesa agaleila”, o upu ia na tali atu ai Veli i lona to’alua, ona toe fa’aauau lea o lana savali, ae o Tania, ua na o le tu ma vaai atu i le savali fa’ali’i atu o lona to’alua aga’i i le auala galue a le nuu, ma i’u ai loa i le toe fo’i o le fafine i lona aiga ua le iloa se mea e fai.

“Ao fea siaula lou oe ko’alua, o legei ua aai uma aiga o le auloku ae koe lava o le kakou aiga o legei lava e gogofo e lei aai”, o le ote lea a le olomatua ia Tania, ae pei lava o le timu e pau i le papatua o le pato lea ote a le olomatua i fika a Tania, e na o le nofonofo lava ma faasagasaga i le aualatele. “ E i ai sou guku, o fea lou ko’alua ua le sau ai e laulau mai le kakou meaai a feoki age kagaka i le fia faai”. Na motu fa’afuase’i le ote a le olomatua ina ua ia fa’alogoina se ta’avale o lo o paka mai i luma o le latou fale, ma ia vaaia ai Tania ua savali aga’i i luma. “Siaula Kagia, o fea fo’i a e alu i ai ae le kiagi mai i i e laulau mai le kooga’i lea, kafefe e, ai e ke maga’o makou ke o i le loku oga koe o mai lea ua laulau le meaai, ae leai ma se galuega a oukou ga gogofo i le fale e fai, a ea?”. E fetaui lava le uma ane o le ote a le olomatua, ae ona vaaia loa Tania ma le alii ave taxi o Pale lea e masani ona latou ti’eti’e ai ua savavali fa’atasi atu aga’i i le fale.