E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’ateia ai le olomatua ina ua ia vaaia le alii ave taxi ma Tania ua savavali atu i totonu o le fale.

Na te’i le olomatua i le tulaga lea ua ia vaaia, ona nofo ai lava lea ua le toe gagana i se upu, ae o Tania ma le ali’i ave taxi o Kome, ua savavali to’alua ane nei ma saofafa’i mai i le nofoa umi o lo o i luma o le laulau ‘ai a le aiga, ona fa’asasaga lea i le itu o lo o saofa’i mai ai le olomatua, o le fa’atau na alu atu ma le ali’i ave taxi o Kome o lo o taatitia mai i luga o le laulau ‘ai, o pepa mamoe, fasipovi ma isi lava meaai tuu’aisa e fa’aaoga e le aiga o Tania, ma pepa sikaleti e lua a le olomatua. “ali’i Kome, e i ai se mea ua kupu ua e sau ai i le makou aiga i legei aso Sa?” o le fesili fia malamalama lea a le olomatua ma ona foliga ua le mautonu, ae o Kome i le taimi lea, ua musu le tamaloa e fai sana tala, sei vagana ai lona autilotilo ia Tania ma faanunumi lona muaulu.

“Siaula Kagia, se’i fai sau oe kala, o le a le mea lea e kupu, aisea ua sau ai Kome i le kakou aiga i legei aso, a’o fea lou oe ko’alua o lea ua oo i le kaimi o le ko’oga’i ae ua le sau e laulau mai le meaai?”, o le mau fesili ia na saputu atu e le olomatua ia Tania, ao saofafa’i to’alua mai ma Kome i luga o le nofoa, ona vaaia lea e le olomatua o Tania ua seesee laititi i le isi itu o le nofoa ma ua foliga mai o sana lauga lea o le a foli foli e fai. “Malie oe Mama”, o ulua’i upu ia a Tania ao punou lava i lalo e le ea i luga lona ulu, “O Kome lea ua sau e fa’amalamalama mai ia te oe e tusa ai o le ma mafutaga ua leva .....” na motu fa’afuase’i le tala a Tania ina ua toe faasalavei e le olomatua i le isi ote leotele, “O le a le uiga o lau kala siaula Kagia, loga uiga o Kome lea ua sau e fia fai ko’alua ia ke oe, ae faafefea o lea e fai lou ko’alua, e faafefea oga e faia legei mea i legei kamaloa ....?” ua na o le faalologo o taliga o tei laiti a Tania ma saofafa’i mai e fa’atali le taimi o le to’ona’i o le aso Sa, a’o agi le ote a le olomatua ia Tania ma Kome, ma fa’ai’u ai lona tuliina i fafo o le ali’i ave taxi ma le fale.

“Vaai oe Kome, e le faakauiga la’u kama igi pepa mamoe ma fasi povi, afai sa i ai se lua mafukaga ma Kagia i aso ua mavae, o lea ua fai le ko’alua a Kagia, ga fo’i ua e vaai i le kamaloa, ae sili ai loa pe a e alu ese ma le fale magu o lelei ...” e fai lava tala a le olomatua ma tu i luga ma savali aga’i i le potu, ae o le taimi lea na pei ai o le emo o le mata gaioiga a le ali’i o Kome, i lona tu i luga ma savali telea’i i fafo ma le fale, fa’aola lana ta’avale ma alu ese loa e lei toe tautala i se tala pe toe talanoa fo’i ia Tania, ae o le fafine o Tania i le taimi lea, ua na o le nofo punou lava i luga o le nofoa o le laulau ‘ai ma ona lagona ootia, e pei lava o se tagata ua leai se fa’amoemoe.