E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’ailoa atu ai e le tuagane laititi o Tania i lona tina, sa ia vaaia Veli o ti’eti’e i le loli la’u oloa a le Saina e alu i Savaii.

“E a lau kala?” o le fesili tuli tatao atu lea a le olomatua i le fa’amatalaga a lana tama, ae o le tamaititi i le taimi lea, ua na o le punou e lei toe tali i se upu, e foliga mai e i ai se mea o lo o ia iloa e fa’atatau i le alu ese atu o Veli. “Ga lua kalagoa ma Veli ao lei alu i le Loli ga eke kaua mai?” o le toe fesili atu lea a le olomatua i lana tama, ae ua na o le lua o le ulu o le tamaititi e aunoa ma se gagana. “O le a la saga kala ia oe ali’i Lui, fai mai o fea e alu i ai?”, o le tao tau tua atu lea a Tania ma tu’i fesili lona tuagane laititi lea na alu atu ma le tala e fa’atatau ia Veli, ae ua le toe gagana lava le tamaititi i se upu, sei vagana ai lava le punou ma tagi, e foliga mai e matuia se mea o lo o tupu i le la talanoaga ma Veli.

“A o le a se kala a Veli ia oe ali’i Lui, e i ai se mea ua kupu i le la aiga ma Kagia ua alu ese ai fa’apega, ae o fea fo’i lea ua alu aga’i i ai?”, na lologo uma taliga o le aiga i le aoauli o le aso Sa lea, ao fa’amatala e Lui le la talanoaga atoa ma Veli atoa ai ma le mafua’aga o lona alu ese ma le aiga, ae o le itu sa sili ona mafatia ai le loto o le olomatua, o le fa’amatalaga sa Veli sa fai i lana tama, “o lo o iloa uma e le olomatua le mea o lo o tupu i le va o Tania ma le ali’i ave taxi, ae leai ma sana upu o fai i ai”. Ua toe fa’aauau le fa’amatalaga a Lui i le la talanoaga ma Veli, ma fa’ai’u ai loa i le tautinoga a Veli sa fai atu ia te ia, e oo mai lona oti e le toe fo’i atu i le latou aiga, e le toe fo’i atu fo’i i le la aiga ma Tania, aua ua ia iloa, ua alofa Tania i le ave taxi, ma ua ia vaai fo’i i pine fa’amau o le le mafutaga, i le mama ma le filifili auro na alu atu ma Tania i le la faleoo ma fa’amatamata ai o ia, ae o le itu e sili ona matuia ai, na ia iloa lelei le taimi na alu atu ai le ave taxi piki Tania i le taeao, ma la o ai lava i le taeao atoa, fa’atoa momoli atu lava Tania ua latalata i le taimi e tuua ai lotu.

“O fea la lea ua alu i ai Veli”, o le toe fesili atu lea a le olomatua i lana tama, “O Veli lea ua toe fo’i i lona aiga i Savai’i, e le toe sau, o lana tala ia te a’u, na te le toe fia taua lo tatou aiga, e le toe fia oo mai fo’i i le aiga”, o le tali atu lea a le tamaititi i le toe fesili ane a lona tina. “Siaula Kagia, ua e vaai la i mea ia ua kukupu mai, ou ke le’i fai aku ea ia ke oe e soia eke ki’eki’e soo i le ka’avale a lea alii ia, ua uma la aso e lei faia sou ko’alua, e kiga foi oga e iloa ua fai lou koalua ae le mafai lava ona kuua lou fai ma oso i le kaavale, lea la ua kukupu mai gei mea masei, ga o loka maasiasi se le mea ua oo mai”.