E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na vaaia ai e leoleo ia Veli ua na o le taatia i tua o le Sipi ua le manava.

Ua le mautonu le mafaufau o le leoleo o lo o aveina le ta’avale, pe tu le ta’avale ae se’i tau togafiti Veli lea ua maua tala ua le manava, pe fa’aauau pea ona alu i le falema’i, lea e tusa ma le 15 minute le mamao e alu ai le ta’avale ona taunu’u lea. Na ona taunuu lava o le ta’avale i le falema’i, pisi loa ma leoleo i le faanatinati lea ona momoli atu le tino o Veli lea o lo o taatia i tua o le keli o le Sipi ma sii atu loa i le potu mo gasegase tigaina. “O le a le mea ua tupu?”, o le fesili lea a le foma’i sa tiute i le afiafi lea, “O si kamaloa ga lavea i le misa i Palisi”, o le tali lea a le leoleo na tu i fafo o le faitoto’a, ao taumafai e su’e le pepa na tusi ai le fa’amatalaga a le tina o Tania lea o lo o pipi’i ai ma le numera o le telefoni, sei tau faafesootai ai le aiga o Veli e logo i ai le mea lea ua tupu.

E pisi foma’i e tau faate’i Veli ae o le taimi lea o lo o fesoasoani atu ai ma leoleo i le tau fa’ato’ato’aina o le fa’alavelave lea ua vavala e ono tula’i mai.

“Talofa, o le tina lea o Veli?”, o le fesili lea a le leoleo i le olomatua na taliina maia le telefoni, ae na te’i le leoleo ina ua sau le tali a le olomatua, “E leai se kagaka fa’apega i le aiga legei, makou ke le koe magaga’o fo’i i se kagaka fa’apega”. “Se fa’amolemole lava .....”na fiu le leoleo e toe tau talanoa atu ae ua i i mai le telefoni ua tapuni. Ua atoa le 15 minute talu ona taunu’u Veli i le falema’i, ae foliga mai e le o i ai lava se suiga ia te ia, e lei te’i mai lava i luga, pau le mea o lo o vaaia, e na o le taagulu pei o se tagata o lo o moe gase ae ua ia le toe iloa mai se tagata. Na tete’i le aiga o Veli i Palisi ina ua toe afe atu le ta’avale leoleo, na logo loa le olomatua ma lana fanau i le tulaga lea ua i ai Veli, “E a?” o le fesili te’i atu lea a Tania e tusa ai o le fa’amatalaga a le leoleo, “E fa’afefea ona e fai maia lena tala na avatu lava lo’u to’alua iinei o lo o malosi ma manava, ae fa’afefea na e faia lena tala fai mai ua fiu e fa’amanava Veli”, e valo atu lava le gutu o Tania ae o lima o lo o pisi i le teuina o lavalava i totonu o le ato mo ia ma Veli i le falema’i,

“Mama!, fa’atali atu ma tamaiti i le fale, se’i o’u alu e asi si o’u to’alua i le falema’i po o a mai, afai e i ai se suiga ona ou toe feso’ota’i mai lea ia te oe nanei”, o le tala lea a Tania i lona tina ma savali aga’i i le ta’avale a leoleo, ma latou aga’i atu ai loa i le falema’i, peita’i na te’i Tania ina ua taunuu i le falema’i ae fa’ailoa i ai e le tama’ita’i foma’i, “Tina, e le mafai ona toe vaai se isi ia Veli i le taimi nei, se’i tau fa’amae’a nai togafitiga laiti e manaomia le faia ona toe maua lea o se isi avanoa e feiloa’i atu ai ia te ia”, o le tala lea a le foma’i, ae oso atu Tania, “Se fa’amolemole lava, o ola si o’u to’alua o Veli?”.