Vaega 5

[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea ua taofi ai e Veli le taxi la te o ai ma Tania i Palisi.]

Na ona tu lava o le taxi, autilo mai le sifi o Simeki, e le masani i le tagata lea na ia taofia le taxi, ona tuu lea i fafo o le ulu o Simeki ma le faitoto’a o le ta’avale ae valaau ane ia Veli, “Uso, o fea eke fia malaga i ai,?” ae na pei o le pe’a pe’a le oso atu a Veli, “Palisi.” E fetaui le uma ane o le tali a Veli ae vaaia loa e Simeki le savali mai o se tamaitai lalelei ma tu tonu lava i tua o Veli, ae ina ua manino le vaai a le alii ave taxi, sa ia iloaina ai o le tamaitai foma’i lea sa masani ona alu momoli i Palisi pe a manava.

“Se malo Simeki le sifi o pepelo o le lalolagi,” o le tala ata lea a Tania ma savali mai ua tuu lana ato o lo o asoa ia Veli, ae tago atu ua sii le isi la ato ta’ita’i lanu uliuli i tua o le keli o le ta’avale, ona toe oso atu lea o le isi ana tala, “oi, a e gofo gofo mai lou alii ae le oso mai i fafo e ka sii aku ako a kagaka o lea faakoa kauguu le va’a.” e vevesi mai lava Tania ae na o le fai fai lemu o gaioiga a Simeki ona o le te’i tele o lana vaai i le valavala o le lalelei ma le pa’epa’e o Tania ma lenei tamaloa ta’u ga uli la te o mai, mautinoa lava o lona to’alua lea.

Ua tuli oso Tania ma Veli i totonu o le taavale, e nonofo uma lava i tua, ona alu loa lea o le taavale i Palisi, ae o mata o Veli e le malolo mai le au tilo tilo solo i fafo i nei mau oga auala ua tau i ai lana vaai, faatoa oo foi lea o lana vaai i nei nofoaga faapenei. “A’o ai le suafa o si au uo,” o le fesili tofotofo lea a Simeki, ae na ata Tania ma tali atu, “O lo’u to’alua lea o Veli le igoa, o lea ua ma move ai iinei ma te nonofo ai ma tausi o’u matua ma se’i tau saili se galuega, aunasa e na o le nofo lava i le fale le mea sa fai i Amouta i le nuu o lenei tamaloa, e leai ma se mafaufauga fou e maua mai ai na o le nofo lava i le fale ma fai feau le mea sa fai.” o le tomumu lea a Tania na te’i ai le faalogo a Veli, ona ata lea ma faapea atu ana upu, “sole, e fou la’u faalogo i le tele o nei mau faasea ete nofo ma oe Tania, ae aisea ete lei faapena ai i taimi ao ta mafuta i lo’u aiga.”

Na motu faafuasei le talanoaga a le toatolu lea ina uafaafuasei ona afe le taavale i luma o se fale, ma vaaia ai e Veli se fale tele lava ma se malae mutia tele o lo o taaalo mai ai tamaiti laiti e toafa, ona musu musu atu lea o Tania i le taliga o Veli, “o le matou fale lea, o nai o’u tei laiti ia e taaalo mai i luma o le fale, ae pei lava o lo’u tina la le e nofo mai i le fale Samoa o lo o tu mai i le isi itu o le fanua.” Na ona vaaia lava e tamaiti ma le olomatua o le taavale, tau fai alu loa i le atoa le latou tuli e vaai le taavale po o ai, ae na te’i le olomatua ina ua ia faalogoina lana fanau ua alalaga ma valaau atu ia te ia, “Mama, o Tania ma le tamaloia mea uli lea e o mai i le taxi.”