Ads by Google Ads by Google

FAGOGO: ALOFA E OO I LE OTI

E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’ateia ai Tania ma le foma’i ina ua la fa’alogoina le e e fa’afuase’i mai o se masini mai totonu o le potu o lo o togafiti ai Veli.

 

O fesili eseese uma nei ua tau fai saputu atu i le mafaufau o le foma’i, ina ua vaaia e Tania suiga o ona foliga i le taimi na e e leotele mai ai le masini mai totonu o le potu lea o lo o togafiti ai Veli si ona to’alua.

 

“Vaai oe tina, fa’atali atu i i, ae se i o’u alu i totonu o le potu e fesoasoani i le tama’ita’i foma’i o lo o i ai, ona ou toe sau ai lea ma se tali”, o le talanoa atu lea a le ali’i foma’i ia Tania, ma tula’i lava i luga ma savali telea’i atu loa i totonu o le potu o lo o i ai Veli ma le isi foma’i. E le i sese masalosaloga a le ali’i foma’i ina ua ia fa’alogoina le e e atu o le masini, ina ua ia taunu’u atu i totonu o le potu, ua na o le tu tu mai o le tama’ita’i foma’i ma uu lona ulu, ua le iloa se isi gaioiga e toe fai ina ua fiu lava le masini e fesoasoani atu i le tau pamuina lea o le fatu o le ali’i o Veli, ae ua leai lava, ua maliu o ia.

 

Na toe taumafai atu le foma’i mo le faia o ni isi gaioiga fa’anatinati e toe fa’asao mai ai le ola o le tamaloa, ae ua siliga tali i seu e fesoasoani, ua le mafai ona toe gaioi Veli, ua maliu lava. A o Tania i le taimi lea, na avea lona naunau na te fia iloa le mea ua tupu i lona to’alua, aemaise ai o le fiu e fa’atali le foma’i na alu i totonu e le i toe sau lava i fafo, ma itu na savali telea’i atu ai loa Tania ma tatala le faitoto’a o le potu ma ulufale loa i totonu. Oi aue, se vaaiga a fa’amomoi loto na fetaia’i ma le pupula a le fafine, ina ua ia vaaia Veli si ona to’alua pele o lo o taoto lava i luga o le moega, ua maliu o ia. E le i toe gagana Tania i se isi upu se’i vagana ai le saofa’i ifo loa i lalo i tafatafa lava o le moega ma tagi fa’ataitaio ai loa na o ia, ina ua ia iloaina ua le toe i ai sona fa’amoemoe o totoe, ua maliu si ona to’alua.

 

Ua faigata i le ali’i ma le tama’ita’i foma’i ona la toe faia se isi gaioiga e fa’ato’a filemu ai le mafaufau o Tania i le aso, ona ua matua lagona le mafatia o le teine, o lea na manatu ai loa e sili pe a tu’u ai pea na o ia i totonu o le potu e tagi ai, atonu e fai fai lava mae’a, ua fa’alogo foma’i i le tagi talatala a le fafine ma fa’amatala le la aiga ma si ona to’alua, amata mai i le ulua’i taimi o le mafutaga seia o o mai lava i le taimi na tula’i mai ai le fa’alavelave e pei ona maliu ai. Ua iloa e Tania ua toe o ia o lo o i totonu o le potu, o lea na tula’i ai loa le fafine ma savali atu i le pito o lo o taoto mai ai Veli, ona ia kisi lea ma fa’amavae atu i ai ma lana folafolaga, “Honey, ou te le malolo seiloga e falepuipui le tagata na mafua ai ona motusia le ta mafutaga.” Na ona uma atu lava o upu ia a Tania, faliu loa ma savali aga’i i le faitoto’a ma tatala, ma savali ese loa ma le falema’i.