E toe fa’atalofa atu i le mamalu o le aufaitau i le fa’aiuga o lenei vaiaso, malo le onosa’i, malo fo’i le galulue, fa’amoemoe sa outou maua se vaiaso fiafia ma le manuia, ae alo mai loa, o le sosooina lenei o le tatou tala fa’asolo, lea na gata mai i le vaiaso na te’a nei i le taimi lea ua toe fa’asolosolo ai mafaufauga a le fafine o Tania i le la mafutaga ma si ona to’alua o Veli ua maliu

E ui i le fa’atauva’a o le tamaloa o Veli i le vaai a tagata o le nuu o Palisi, peita’i e le o le tulaga lena o lo o i ai le mafaufau o Tania isi ona to’alua, e le gata o ia o se tagata e alofa fa’amaoni i le la aiga, ae o ia fo’i o se tamaloa e tausi aiga lelei. Talofa e i le mafutaga sa amata mai i si tama’i faleo’o a le tamaloa o Veli i lona aiga i Savai’i, le faleo’o la te tau fa’aofiofi ai i afiafi uma mo le 5 tausaga na la nonofo ai i Savai’i, ao le’i toe malaga ane i lona aiga i Palisi, lea ua i’u ai lava le ola o si tamaloa ona o le finau e tausi le aiga o si ona to’alua. O le fa’amoemoega uma o Tania sa tu’u atu i si ona to’alua ua tafea i le ‘au ‘au o le vasa, ma ua pei le fafine o se va’a ua leai se taula, ua tafetafea na o le tino i peau sousou, e fai o lona mafatia i le motusia o le mafutaga ma Veli, ae ua faigata i lona mafaufau pe fa’apefea nei ona ia ta’u i matua o le tamaloa i Savai’i le mea ua tupu.

“Nia, o le a se tala mai ia Veli”, o le fesili fia iloa lea a le ali’i ave taxi o Meki lea ua amata ona tau vavala mai le la mafutaga fa’alilolilo ma le fafine o Tania. “Nia, suga Nia, e i ai se mea ua tupu ua e le talanoa mai ai, ua a mai le ma’i o Veli ....” e fiu lava le alii o Meki e saputu atu le mau fesili ae pei lava o le timu e pau i le tua o le pato le mau fesili o lo o fai atu, e aunoa ma se tali ane i ai o le fafine, sei vagana ai le nofo ma tuu ona alofilima i lona muaulu, pei o se tagata o lo o tau to manatu i se mataupu faigata ua fiu e toe tau mafaufau ua galo lava. Na lava vaaiga ia na vaaia e Meki ia Tania na ia iloa ai le mea ua tupu i le tamaloa o Veli, o lea na savali fa’anatinati atu ai loa le ali’i ave taxi i totonu o le falem’i i lona fia iloa o le mea ua tupu, ae na matua segia le mauli o le ali’i ave taxi i le fetaui o lona savali atu i totonu o le potu tigaina lea na taofia ai Veli mo aso e lua ae toso mai loa le moega e ni tama’ita’i foma’i se to’alua, o lo o aumai ai se tagata o lo o ufi atoa lona tino i le ie pa’epa’e a le falema’i.

Na tau fesili Meki i teine foma’i po o ai le igoa o le tagata ua maliu, peita’i na fa’ateia le ali’i ave taxi ina ua savali atu le isi teine foma’i ma fesili ia Tania, “Tina, e te toe fia fa’amavae i si ou to’alua a o le i tu’uina atu o ia i totonu o le fale ‘aisa?”, e le i tali Tania sei vagana ai lona tu mai i luga ma savali atu loa ua susu’e le ie o lo o ufi ai le tino o Veli, o iina na fa’atoa fa’alogoina ai loa e teine foma’i le mafatia o le fafine ina ua tagi aueue i luga o le tino maliu o Veli, ae o Meki i le taimi lea ua na o le tu ua le iloa sana gaioiga e fai. E le i toe popoe Tania i se isi lava mea sei vagana ai lona manatu e fa’aauau pea lona alofa ia Veli se ia oo i le oti.