[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea na te’i ai Veli ina ua fa’amalo atu le fafine o Mekala ia te ia a o tau tatau le pe’epe’e o le fa’alifu fa’i.]

O le fafine o Mekala, ua silia ma le 15 tausaga talu oga nofo tane i le aiga o le tamaloa Palisi lea la te nonofo nei, e faigaluega le tamaloa i le Ofisa o Galuega a le malo, ae gafa lava Mekala ma le fatuaiga aemaise ai o le tausiga o matua o lona to’alua fa’apea ai ma le isi au fa’alafua o lo o nonofo i le fale e leai ma ni galuega, ae na o le la’u mai i lalo pepe fou ma ua atili ai ona fa’aopoopo le lisi o tagata aai i totonu o le aiga.

“Kalofa siaula Mekala, ou ke vaai aku e foliga mai ua vela sau fa’alifu o le afiafi, a ea?”, o le fesili atu lea a Veli i le fafine, ae na te’i Veli ina ua fa’apea mai le tali a le fafine, “e le masagi keige Savai’i i ga mea o fa’alifu, o le la ua pulou le suavai o le afiafi, faigaka kele fo’i le olaga gofo kage ali’i brother ...” na pei e puni le manava a Veli ina ua ia fa’alogo atu i le talanoa mai a le mafine lea, ona saofa’i ifo loa lea i lalo o Mekala ma ifa le la talanoaga ma Veli i tua o le umukuka, o iina na fa’atoa manino ai le mata o le vai, e tasi lava le itumalo e o mai fa’atasi ai Veli ma Mekala, pau le eseesega e eseese nuu e nonofo ai.

Sa na o le fa’alologo o Veli a o fa’amatala e Mekala le pologa o le olaga o lo o i ai le aiga o lona to’alua lea la te nonofo ai, e usu i le umukuka i le taeao e tunu le ti a le olomatua ma le toeaina, sosoo ai loa lea ma le faiga o le taga mea a le aiga atoa, fetaui ai loa ma le meaai o le aoauli, ae fa’ai’u i le umu o le afiafi leaga o le toeaina ma le olomatua e na o meaai tao lava e tausami ai.

“Fai mai fo’i i Apia legei ae ou ke fai aku ali’i Veli, e sili fa’a afe ai le olaga i Savaii gai lo le mea lea ou ke i ai, aga leai si a’u fagau ua leva oga ou koe fo’i i Savai’i, ua ou le lava ola pologa i legei aiga, ae se’i masepu lava saka gaioiga e fai po o se kala ka ke faia a, oka, koe koe a kuli oso mai e gagali aku loga ulu i le kele o le mau kala faikio ma kala mamafa e la’u mai ma feau mai mea sa kukupu i le fia kausaga ua ke’a, ae le mafaufau i le afu sisiga o lo o fai i aso uma mo le kausiga o le aiga ...” e fai lava tala a le fafine o Mekala ae na o le nofo nofo o le tamaloa o Veli e aunoa ma se tala na tali atu ai, se’i vagana ai le fa’alologo o ona taliga i le olaga pologa lea o lo o feagai ma si nei fafine nofo tane, pau lava le tala na fia fa’alogologo ai Veli, o sina fa’amatalaga mai ia Mekala e fa’atatau i le aiga o Tania lea ua la nonofo ai, aua o lea ua tele tausaga o latou mafuta, ua tatau fo’i ona lava sona silafia i ituaiga tagata e i ai le aiga lea, ae na motu fa’afuase’i le talanoaga a le to’alua lea ina ua la fa’alogoina le tina o Tania ua ee atu ma le leo tele ma fa’apea atu, “Eh Mekala, ia o le a lega, o le a le mea eke sau ai fua e fa’a kalagoa le maguki a Tagia, alu oe ia e fa’akalagoa lau oe maguki ...”