[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le toe faaauauina lenei o le tatou tala fa’asolo, lea na gata mai i le vaiaso na te’a nei i le taimi lea na fiu ai Tania e autilo si ona to’alua i tua o le la fale ae ua leai se isi.]

Na umi se taimi o tu le fafine o Tania i tua o le la faleo’o ma tau mafaufau po o fea se vaega o le vaomatua ua galoma i ai Veli. A mafaufau atu i le leai o se isi e masani ai le tamaloa i le aai atoa, ona oso lea o lona popole, ae a toe mafaufau atu foi i le pogisa lea ua aga’i mai, ae poo fea se fanua o tapena umu mai ai Veli, ona atili ai loea ona oso lagona le mautonu o le fafine, ma saofa’i ifo ai loa i luga o le maa o lo o i tua o le faleo’o ma po namu ai, ae o le taimi foi lea ua tau fai pepese faigalotu a aiga o le latou pitonuu, sei vagana ai le latou fale e le o faia se lotu ae o lo o vavao i le tau faiga o le meaai o le afiafi.

Sei tatou tuliloaina le tamaloa o Veli ma lana sapelu lea o lo o uu ma aga’i atu i luga o le mauga, po o fea o le a fa’atutu i ai lana savaliga ao lea ua malu le pogisa o le afiafi. O le ita ma le fa’ali’i o Veli i le ote soo o le tina o lona to’alua na mafua ai ona savali atu ma uu mai le sapelu ma le pea ato, ona savali tele a’i lea aga’i i tua fale ma aga’i atu ai lava i le auvae mauga lea o lo o tele ina galulue ai aiga o le latou pito nuu, sei tau saili mai ni mea e tapena ai le umu o le aso Sa. E malu ane la le afiafi ae taunuu loa Veli i ma’umaga a aiga o lo o pito mai luma, ona nofonofo ai loa lea i luga o le pa ma’a ma mafaufau i se gaioiga o le a fai. E leai se vaipanoa o le vaomatua e le masani ai le tamaloa o Veli, aua o ia o le tagata o le vaomatua, e le gata ua masani i le galue pogisa i lona aiga i Savaii, ae ua tele tausaga o auai i aumoega a le aumaga a lona nuu i uta i le talaloa, lea e toeititi atoa le tausaga o momoe ma isi taulele’a i uta ona o le tausiga ma le leoleoina o a latou fa’atoaga mai tagata gaoi faapea ai ma pua’a ta’aloa.

E lei toe faatali Veli ina ua toe maua lona malosi mai lana malologa sa fai, ae ua lala’a atu loa i le ma’umaga muamua lea na tau atu ai lana savali ma amata loa ona fafai talo ma tuu i totonu o lana pea ato na alu atu ma ia, ao susulu manaia mai le masina o le afiafi. E silia ma le itula o i ai Veli i le ma’umaga lea, e le gata o talo ma luau ae sa maua foi tau e taufi ai le umu, ma sauni loa e toe fo’i i tai. E taunu’u ane le tamaloa i tuafale o aiga ma ia vaaia ai le moli o le latou fale ua pe, ona faasasa’o lea o le savali a le tama i le umukuka ma tuu lemu ai i lalo lana amoga e aunoa ma se iloa atu o ia e ese tasi. Na uma lea ona toe savali lea o le tama aga’i i le la faleoo ma si ona to’alua ma ia vaaia ai, ua uma ona fofola le la moega ae le o ia i Tania, ona manatu lea o le ali’i, ai ua moe si ona to’alua i luma o le fale tele, ma e le i toe fa’atali Veli ae ua toe savali atu loa i le umukuka ua fofola laufa’i na sau ma ia i luga o laupapa ma taoto ai loa.