Vaega: 71

Fa’atalofa atu ma fa’afeailoa’i atu i le mamalu o le atunu’u i lenei taeao fou, malo le soifua manuia malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’afo’i le vi’iga ma le fa’afetai i le Atua Soifua, ona o Lana tausiga alofa mo i tatou i aso uma o lo tatou ola.

Ae alo maia, o le a toe fa’aauau atu la tatou tala fa’asolo e pei ona masani ai. Na muta mai la tatou tala ina ua talanoa lo’u tuagane o Ioane i lo ma tina, ae e le i uma atu talaa Ioane ae tapuni mai e lo’u tina le telefoni.

Ua alu pea la matou ta’avale e aga’i atu i le fale ua leai se tasi o matou na toe tautala i lea taimi. Ae sa ou va’aia foliga le fiafia o lo’u tama, na ou a’apa atu nei ma u’u mai lona lima, “Dad, ‘aua e te popole, ua ou iloa mea uma, ma e leai se mea e tasi ou te le iloa, ‘aua e te popole i nei mea, e vave ai ona e ma’i, tu’u mea uma e sau se aso ma se taimi e fa’ato’ato’a lelei ai mea uma o lo tatou aiga.”

Na ou va’aia i lea taimi le mu o mata o si o’u tama, ona ua o’o ia te ia lagona fa’anoanoa i uiga o lo’u tina o Makerita. Ua alu pea la matou ta’avale i lea taimi, ma ua toetiti o matou taunu’u i lo matou fale lea o lo’o matou nonofo ai nei ma si o’u tama ma le tama o Ana.

Na o ou fa’apea nei i lo’u loto, atonu o lo’o i ai ni mea o lo’o fia talanoa mai ai lo’u tama ia te a’u, ae matou te le i toe fo’i i lo matouaiga. Ma sa ou fa’atalitali pea pe sa’o la’u mate pe leai.

Ua alu nei la matou ta’avale, ma ua matou aga’i atu i le isi itu o le a’ai o Peretania, ma ua afe nei i totonu o le fale tele lava, e foliga mai o se fale mata’aga. Fa’atoa o’u o’o fo’i lea i lea fale, ma o se fale ua sili ona matagofie i le va’ai, ua le masino le mau fa’atagata o lo’o tutu mai i fafo e teuteu ai le fale atoa lenei.

Na ou tilotilo atu nei i si o’u tama i lea taimi ae ua ‘ata mai ia te a’u ma a’apa mai ua u’u atu lo’u lima.

“Averia, sau ta o se i ta matamata i le matagofie o lenei fale mata’aga, ma o se fale fo’i e tumutumu i tagata i aso uma e tau le ofi.” Na ma savavali atu nei ma lo’u tama i totonu o le fale ma ua ou va’aia ai nei le to’atele o tagata o lo’o feoa’i solo ma matamata i le tele o mea o lo’o i totonu o lenei fale mata’aga.

Ae na ou te’i ina ua fa’atalofa mai le leoleo i lo’u tama ma fa’apea mai, “Mikaele, talofa lava, e le i logoina mai a’u e le ofisa o le a e malaga mai, ae tala mai a’ao tatou o i totonu o le ofisa.”

Ua ‘ata atu nei i ai lo’u tama i lea taimi ma fa’atalofa, “Eneliko, o a fo’i si o’u to’alua ma si au fanau.?” Na tali mai i ai le leoleo ma ‘ata i lo’u tama. Na liliu nei ma fa’apea atu i le Leoleo, “Eneliko, o lo’u afafine lenei, o Averia.”

Ua tu’u mai nei le lima o le leoleo ma ma fa’atalofa loa, “Averia, talofa lava, fa’afetai ua maua lo’u avanoa ou te feiloa’i ai i se alo e fa’asino ia Mikaele.”

Ua leai se tala na mafai ona ou fai atu i le leoleo ona ua fa’ate’ia a’u i lenei mea ua tupu, ae sa ou mafaufau e fa’apea, po’o le a fo’i lenei mea ua fai e lo’u tama ia te a’u. Ai fo’i o taumafai e fa’aofo a’u i nisi mea ou  te le o iloaina, ae maise ai o mea uma ia o lo’o aofia i totonu o kamupani ma pisinisi o lo’o ia mauaina.

E faia pea