Vaega:102

Fa’amalo le onosa’i i faiva ma tiute o lo’o feagai ai ma le mamalu o le atunu’u, e i ai pea le fa’amoemoe o lo’o aoina pea le masina i le soifua manuia o le atunu’u i lenei taeao fou. E ao ai ona o tatou momoli la’au i foga ma sula lapalapa o malo i lo tatou Atua, ona o Ana fa’amanuiaga o lo’o tatou a’ea’e ai pea lea manu ua ulu i aso uma o lo tatou ola ma lo outou soifua.

Na ou nanati mai nei i le au faigaluega o lo’o tutu ma fa’alogologo mai ina ia vala’au le ta’avale e ave ai si o’u tama i le falema’i. Ua le mautonu lo’u mafaufau i lea taimi, ona ua i ai lo’u manatu, sa ou alu ane e asi si o’u tama, a’o lea ua ou toe sau toe fai le mea ua oso ai lona ma’i.

Ua fa’anatinati atu nei lo’u tama i le falema’i, ma sa o ma fa’atasi ai pea, ae na ou fiu e tau va’ava’ai mai Makerita ma Peteru, e leai nisi na o ane i le falema’i. Ua ave nei lo’u tama i totonu o le potu tele lava mo ona togafitiga, ae e le i umi ae tutu mai tagata faigaluega o lo’o galulue i totonu o le Ofisa Tutotonu o lo’u tama.

Ina ua taunu’u ane tagata faigaluega a lo’u tama, sa o latou iloa ai le tulaga ua ou o’o i ai, ma ua le mafai ona toe taofiofia o’u loimata i lea taimi. Na saofa’i ifo nei i o’u talane ia si a’u uo o Malia, ma ua a’apa mai ua u’u lo’u lima. “Averia, ia e loto tele, onosa’i, ou te talitonu o le a manuia lou tama, ae ‘aua e te popole ae ia e onosa’i.” Na ou fa’ailoa atu i le aufaigaluega le mea o lo’o tupu i lo’u tama, o le a fai lona ta’otoga, ona o le ma’i fatu lea ua maua ai.

Na fa’ate’ia tagata faigaluega a lo’u tama, o le toeaina lea o lo’o ta’ita’ia le ofisa Loia a lou tama, ua na o le nofo ifo nei i luga o le nofoa, ma lulu lona ulu. Na ou iloa atu foliga fa’anoanoa o lenei tama ua loa tausaga o tautua i lo’u tama e ala i le galuega o lo’o galue ai.

Na tu nei ma savali mai i le nofoa lea ma te nonofo ai nei ma si a’u uo o Malia, ma fesili mai ia te a’u, pe o le a le mea o le a fai e foma’i i lenei taimi, na ou tali atu i ai, ua uma ona ma talanoa ma le ali’i foma’i, ma ua uma fo’i ona ou sainia pepa e fai fa’avave ai le ta’otoga o si o’u tama.

Na ou fesili nei po’o fea o i ai Makerita ma Peteru, ae sau le tali a la’u uo o Malia, o lo’o i totonu pea o le Ofisa, ma o lo’o su’esu’e uma pepa o le kamupani. Na ou lagona i lea taimi lo’u fa’anoanoa tele, ma e tasi lava le manatu na o’o mai ia te a’u, o lona uiga, e le o mamafa i loto o Makerita ma Peteru le ma’i o lo’u tama, ae ua sili ifo ia i la’ua ona su’esu’e mea o le kamupani.

Ua ou lagona lava le vaivai o lo’u loto i lea taimi, “ioe, o le a ou faia lava, ae fa’amolemole lava, pe mafai ona vala’au vave Tino ma logo atu ia te ia le mea ua tupu i lo’u tama, ma fai i ai, e ‘aua le popole mai ia te a’u.”

Ua amata le ta’otoga o si o’u tama, ona o lo’u mana’o ia vave ona fa’atino i lea taimi, ua uma fo’i ona matou talanoa ma ali’i foma’i o le a o latou faia mea uma ina ia manuia ai le ta’otoga o lo’u tama.

Ua matou fa’amavae nei ma le aufaigaluega a lo’u tama, ae ua nofo mai si a’u uo o Malia ma te mafuta i lenei taimi o mafatiaga. Ua taumafai nei si a’u uo ina ia ave’ese lo’u loto mai i lo’u tama, peita’i, ua le mafai lava.

“Malia, ua ou lagona lo’u salamo, ae talosia ia fa’amagalo a’u e lo’u tama, talosia ia manuia lona ta’otoga, ona ou talatalanoa lea i ai.”

E faia pea