Vaega: 103

Fa’atalofa atu i lou alafa’i mai i le manuia i lenei taeao fou, taeao toto’a i le tausiga alofa a lo tatou Matai i le lagi, e ao ai ona o tatou momoli le fa’afetai ma si’i le vi’iga i lo tatou Tapa’au i le lagi, ona o Ana fa’amanuiaga ma lona alofa mo i tatou i aso uma o lo outou soifua ma lo’u nei ola. Ae alo maia, o le a toe fa’aauau atu la tatou tala fa’asolo e pei ona masani ai mo lenei aso.

Ua ou lagona le fa’anoanoa tele ona o le ma’i o si o’u tama e pele i lo’u loto, afai o a’u ua mafua ai, ona ou lagona ai lea o le tagi aue, aua ua foliga mai ua ou le usita’i i lo’u tama, ae maisea ai o fautuaga na tu’u mai e si o’u tina tausi o Ana, “Ia ou alofa i lo’u tama, ma ia ‘aua ne i o’u faia se mea e fa’atiga ai lona loto ma lona mafaufau.”

Ua toe fafagu uma nei mea i lo’u mafaufau, ona ou tagi ai lava lea ma ou talotalo i le Atua, ia alofa ma fesoasoani i si o’u tama i lea taimi. Na fai lava si umi o o ma fa’atalitali ma si a’u uo o Malia. Ua le mafai lava ona alu ‘ese, ona o lona alofa mai ia te a’u.

Na tamo’e mai nei si o’u to’alua ma fusi atu a’u, ae ua le mafai ona taofiofi le maligi ifo o o’u loimata i lea taimi. Ua taunu’u atu le solo a lo’u tina tausi o Ana ma si ona tama, ma ua fa’apea lava ona matou tutu ma fusifusi e le tasi le isi. Na ou lagona le loto fa’afetai i si o’u to’alua, ona o le vave ona tali mai i nei taimi o faigata. Ua matou nonofo ifo nei i luga o le nofoa ma o matou talatalanoa loa e uiga i le ma’i o lo’u tama.

Na ou fa’amatala uma nei le mea na tupu, ae maise ai o le ma tauga upu ma Makerita fa’apea Peteru. Ua le mafai ona taofiofi lo’u tina tausi i lea taimi. “Oi ta inoino e, ia Makerita ma Peteru, ua ou le iloa ia ituaiga tagata, pe o ni tagata ola po’o ni tagata ua liu fa’atiapolo.”

Ua le mafai ona taofiofi o’u loimata i lea taimi, ua pei o le to’ulu ifo o timuga ua le mafai ona taofiofia. Na ou tilotilo atu nei I si o’u tina tausi o Ana, ma na iloa lelei mai lava e le lo’omatua o’u fa’alogona tiga i lea taimi.

O le fesili a le tama o Ana Ia te a’u, po’o fea la o i ai Makerita ma Peteru ae na ou tali atu, o lo’o i totonu lava o le Ofisa Tutotonu, ae fa’atoa o ‘ese atu le au faigaluega na o ane e asi a’u ma fia iloa po’o le a le tulaga ua o’o i ai lo’u tama.

Ua atili ai ona fa’ataitai o lo’u tina tausi i lea taimi, “Oi talofa e, ia Mikaele, ona talofa e, Averia, ia e loto tele, tu’u atu lou loto atoai i le Ali’i, oi talofa e ia Mikaele, e se mea a leaga o nei mea fa’apenei.”

Na tu nei i luga le tama o Ana, ma savali atu i le fa’amalama o lo’o i le isi itu o le falema’i, ua u mai lona tua ia matou i lea taimi, ae sa lilo i o matou manatu, o lo’o mamafa le loto o le toeaina i le alofa i lo’u tama.

Na ou toe fa’ailoa i ai le tulaga e pei ona fai mai ai le foma’i ia te a’u, e fai lava si umi o le ta’otoga o lo’u tama, ma ia ou maua pea le onosa’i. Ae o le mea e sili ona taua, o lea ua uma ona ou sainia pepa e taoto ai si o’u tama.

E faia pea