Vaega: 1

Fa’atalofa atu i lou alafa’i mai i fanuga lelei o lenei aso fou, e ala i le tausiga alofa a lo tatou Matai o i le lagi. E ao ai ona o tatou fa’apea ifo, “Le Atua e, e maualuga lava Lou vi’iga e fa’avavau, fa’avavau lava. Matou te folasia pea i ou luma o matou mana’oga fa’atasi ai ma o matou fa’amoemoe o le a E fesoasoani mai i a i matou i lenei aso. A ma’ea, ona o matou fa’apea ifo lea, o i matou lava o ni tagata e le aoga, a’o le vi’iga o le fa’afetai ma le fa’amanu, matou te fa’afo’i atu i Lau Afio, Amene.”

Ona ou fa’apea atu ai lea ma le agaga maualalo, fa’afetai tele i le tapua’iga a le mamalu o le atunu’u i Samoa nei, ae maise fo’i o le mamalu o le atunu’u o lo’o alaala ma papaa’ao i atunu’u mamao. O i latou o lo’o maua a tatou tala fa’asolo e ala i aupega tafa’ilagi i luga o initeneti, fa’atalofa atu, ma fa’afeiloa’i atu, o fea lava e lele i ai le toloa, ae ma’au lava i le vai, e le o outou fo’i o ni lupe o le ta’alaelae, o outou o lupe o le filifili. Afai lava ua i ai se pati ua sala pe ua le tautamali’i i lau faitau i nisi o a tatou tala, ou te avatu malu i pu’ega i lou finagalo, aua e poto lava le tautai ae se se lana atuiama.

O upu a le atunu’u, e le sili le ta’i, na i lo le tapua’i, e i ai pea le fa’amoemoe maualuga, o lo’o lalago pea i ina le tofa ma le fa’autautaga e malu ai le taumafaiga a le auauna fa’atauva’a. O la’u tatalo i le Atua Soifua ia mamao ni ao lealea, ia ‘aua nei to le timu pe gasetoto le masina, ae ia fati pea galu fati sisina i le soifua lau lelei o le atunu’u, Fa’afetai, fa’afetai tele. Ae alo maia, o la tatou tala fou ua fa’aigoaina, “Lupe o le Filifili.”

O suafa matai ma ‘ele’ele fa’apea ma ana measina, o le fa’asinomaga lea o le tagata Samoa, ma o fea lava e aga’i i ai le tagata e sa’ili manuia ai i atunu’u mamao, po’o mau paolo ai fo’i, o ia lava o le lupe o le filifili. Aua o lo’o mau pea ma iloga lona fa’asinomaga i totonu o lona aiga, e leai se tasi na te ave’eseina lona aia. O le uso tu ‘ofe, e tasi le aluga, tasi le ie’afu, tasi le fala, po’o fea lava la e alo i ai le sa o le tagata, ae ua i ai lona fa’asinomaga i totonu o lona aiga. Ua sau le va’a na tiu, tau mai i le va’a na tau, ae o lo’o lalago pea le va’a na folau.

O la tatou tala fa’asolo la ua fa’aigoaina, Lupe o le Filifili, o le a e faitau ai i le soifuaga na ola ai le aiga o Paulo, o ona uso ma lo latou tuafafine e to’atasi o Salamasina. O le aiga o Paulo, o lo’o i ai lona to’alua o Eseta ma le la fanau e to’alua o Petelo ma Samuelu. O le uso lona lua o Paulo, e igoa i a Sila, o lo’o avea ma Faifeau fa’apea ma lona Faletua e igoa i a Su’e ma le la fanau. O le tama’ita’i o Salamasina ma lona to’alua Palagi fa’apea ma le la fanau. O le a tatou faitau ai i tulaga sa ola ma soifua ai o tatou aiga mai le amataga, se ia o’o mai i aso nei.

E ui lava ina fa’apea ua mou ‘ese atu aso faigata o le soifuaga, ae o ni aso fo’i sa lagona le filemu o le loto, ona sa leai ni suiga fou, e pei ona i ai i nei vaitau o le soifuaga ua o tatou i ai, i le tele o suiga, ma o nisi lava suiga o ni suiga lelei, a’o nisi fo’i suiga, o ni suiga leaga. Ae ui i lea, e moni ai le upu, o le aso ma lona ‘ai, o le lou ma lona fuata. Afai ua o tatou maitauina le tele o suiga ua ofi mai i totonu o Samoa, ia o tatou manatua pea lo tatou fa’avae e pei ona asa mai e o tatou tua’a ua saga mai i ao pouli ma tao’oto mai i ti’a sa, “Samoa, ia muamua le Atua” ma le “Fa’avae i le Atua, Samoa.”

O tala fatu ma tala fa’afagogo, o fa’ailo’aga ia o manatu ma mafaufauga o le tusi tala, ae e ui ina fa’apea o se tala fatu, ae o lo’o i ai fo’i ma a’oa’oga lelei mo i tatou, tatou te toe manatua ai tulaga na o tatou ola ma soifua ai i aso ua mavae i totonu o aiga.

I le fa’asologa o la tatou tala, o le a e faitau ai i upu na lafo e le tama’ita’i o Salamasina e fa’apea, “Ou te le toe fia manatua le faigata ma le mativa, e moni, e le toe fia manatu i ai, ae o upu moni lava ma upu tu’u sa’o, “E le mafai ona galo.” Aisea, aua na o’o i ai lona olaga, na ola a’e ai i totonu o lona aiga Samoa, na va’ai i ai ona mata ma fa’alogo i ai ona taliga. Na va’ai i ai, a’o ola i le aiga o lona tina i Samoa, e ui lava la ina fa’apea ua mau paolo i le ali’i papalagi e igoa i a Larry, ae e le mafai lava ona galo lona olaga na ola ma soifua ai.

E fa’apea fo’i la o tatou tagata, aua o upu moni, tatou te le i ola a’e ua tutu ni fale papalagi, tatou te le i ola a’e o feoa’i o tatou tua’a i ni ta’avale, e leai, o suiga ia o le olaga ua o tatou i ai i aso nei. O lea la ua o tatou sa’a nei i ma’a o malie i lenei vaitau o le soifuaga, ae e le mafai lava ona galo lo tatou tupu’aga ma lo tatou fa’asinomaga, o lou aiga, ou ‘ele’ele ma au measina, ona o tatou fa’apea ifo lea, “E le o tatou o ni Lupe o le ta’alaelae, e leai, o tatou o Lupe o le Filifili”

Tatou feiloa’i i le aso a taeao mo le amataina o la tatou tala fa’asolo, ae ia manuia le alo faiva o le atunu’u, i feau ma galuega o le a feagai ai i lenei aso. ia i ai pea fa’amanuiaga a le Atua i totonu o ou pa, ia si’omia ai ou maota ma ou laoa, ma ia tutumu ai ou la’oa’i, e fa’alelei ai aiga, nu’u ma Ekalesia.

E faia pea…